ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠴᠢᠬᠤᠯᠠ ᠲᠠᠷᠢᠮᠠᠯ ᠨᠠᠷᠢᠮᠣ ᠪᠠ ᠨᠠᠩᠬᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/8/12
           
      ᠨᠠᠷᠢᠮᠣ ᠪᠣᠯ ᠬᠤᠷᠴᠢᠨᠴᠣᠳ ᠤᠨ ᠴᠢᠬᠤᠯᠠ ᠲᠠᠷᠢᠮᠠᠯ ᠤᠨ ᠨᠢᠭᠡ ᠲᠦᠷᠦᠯ ᠪᠣᠯᠬᠤᠷ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠠᠴᠠ ᠨᠠᠷᠢᠮᠣ ᠶᠢ ᠲᠠᠪᠣᠨ ᠲᠠᠷᠢᠶᠠᠨ ᠤ ᠲᠣᠳᠣᠷᠠᠬᠢ ᠨᠢᠭᠡ ᠨᠢ ᠭᠡᠵᠦ ᠦᠵᠡᠳᠡᠭ᠃ ᠬᠤᠷᠴᠢᠨᠴᠣᠳ ᠨᠠᠷᠢᠮᠣ ᠶᠢ ᠮᠣᠩᠭᠤᠯ ᠠᠮᠣ᠂ ᠰᠠᠭᠠᠬ᠂ ᠨᠠᠩᠬᠢ ᠵᠡᠷᠭᠡ ᠶᠢᠨ ᠲᠠᠷᠢᠮᠠᠯ ᠠᠴᠠ ᠰᠡᠭᠦᠯ ᠳᠤ ᠲᠠᠷᠢᠬᠤ ᠪᠣᠯᠣᠬᠰᠠᠨ ᠪᠣᠯᠪᠠᠴᠦ ᠨᠠᠷᠢᠮᠣ ᠶᠢᠨ ᠣᠯᠠᠨ ᠵᠦᠢᠯ ᠤᠨ ᠬᠡᠷᠡᠭᠴᠡᠭᠡ ᠨᠢ ᠬᠤᠷᠴᠢᠨᠴᠣᠳ ᠤᠨ ᠠᠮᠢᠳᠣᠷᠠᠯ ᠠᠬᠤᠢ ᠶᠢᠨ ᠲᠡᠭᠡᠭᠰᠢᠯᠡᠯᠳᠡ ᠳᠤ ᠶᠡᠬᠡᠬᠡᠨ ᠬᠤᠪᠢ ᠨᠡᠮᠡᠷᠢ ᠦᠵᠡᠭᠦᠯᠦᠭᠰᠡᠨ ᠪᠢᠯᠡ᠃      ᠨᠠᠷᠢᠮᠣ ᠶᠢᠨ ᠡᠭᠦᠰᠦᠯ ᠭᠠᠷᠣᠯ ᠵᠢᠴᠢ ᠲᠣᠮᠤᠬ ᠶᠠᠷᠢᠶ᠎ᠠ      ᠨᠠᠷᠢᠮᠣ ᠨᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠨᠡᠯᠢᠶᠡᠳ ᠬᠤᠵᠢᠭᠤ ᠰᠢᠬ ᠲᠠᠷᠢᠬᠳᠠᠬᠤ ᠪᠣᠯᠣᠬᠰᠠᠨ ᠪᠣᠯᠪᠠᠴᠦ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠨᠠᠷᠢᠮᠣ ᠶᠢ ᠲᠠᠷᠢᠵᠦ ᠬᠡᠷᠡᠭᠯᠡᠭᠰᠡᠨ ᠨᠢ ᠨᠡᠯᠢᠶᠡᠳ ᠡᠷᠳᠡᠨ ᠤ ᠣᠴᠢᠷ ᠪᠣᠯᠣᠨ᠎ᠠ᠃ ᠪᠠᠯᠠᠷ ᠡᠷᠳᠡᠨ ᠤ ᠬᠦᠮᠦᠰ ᠤᠨ ᠠᠮᠢᠳᠣᠷᠠᠵᠦ ᠪᠠᠶᠢᠬᠰᠠᠨ ᠬᠠᠭᠤᠴᠢᠰ ᠪᠠᠭᠤᠷᠢ ᠶᠢᠨ ᠮᠠᠯᠳᠠᠮᠠᠯ ᠵᠢᠴᠢ ᠡᠷᠳᠡᠮᠳᠡᠳ ᠤᠨ ᠰᠣᠳᠣᠯᠭᠠᠨ ᠢ ᠦᠨᠳᠦᠰᠦᠯᠡᠪᠡᠯ ᠨᠠᠷᠢᠮᠣ ᠶᠢᠨ ᠡᠭᠦᠰᠦᠯ ᠭᠠᠷᠣᠯ ᠨᠢ ᠲᠣᠮᠳᠠᠳᠦ ᠣᠯᠣᠰ ᠤᠨ ᠡᠷᠳᠡᠨ ᠤ ᠬᠠᠳᠣᠨ ᠭᠤᠣᠯ ᠤᠨ ᠰᠠᠪᠠ ᠭᠠᠵᠠᠷ ᠪᠣᠯᠬᠤ ᠨᠢ ᠨᠡᠯᠢᠶᠡᠳ ᠪᠠᠳᠣᠳᠠᠢ ᠣᠴᠢᠷ ᠪᠣᠯᠵᠠᠢ᠃ ᠡᠶᠢᠮᠦ ᠠᠴᠠ ᠨᠠᠷᠢᠮᠣ ᠨᠢ ᠪᠡᠯᠡᠷ ᠡᠷᠳᠡᠨ ᠤ ᠦᠶ᠎ᠡ ᠠᠴᠠ ᠲᠠᠷᠢᠵᠦ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠦᠨᠢ ᠣᠳᠠᠭᠠᠨ ᠲᠡᠦᠬᠡ ᠲᠠᠢ ᠲᠠᠷᠢᠮᠠᠯ ᠤᠨ ᠨᠢᠭᠡ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠮᠦᠨ ᠴᠦ ᠲᠣᠮᠳᠠᠳᠦ ᠣᠯᠣᠰ ᠨᠢ ᠨᠠᠷᠢᠮᠣ ᠶᠢᠨ ᠡᠭᠦᠰᠦᠯ ᠤᠨ ᠭᠠᠵᠠᠷ ᠬᠡᠮᠡᠨ ᠲᠡᠯᠡᠬᠡᠢ ᠳ᠋ᠠᠬᠢᠨ ᠳᠤ ᠮᠡᠳᠡᠷᠡᠭᠳᠡᠵᠡᠢ᠃ ᠡᠷᠳᠡᠮᠳᠡᠳ ᠤᠨ ᠰᠣᠳᠣᠯᠭᠠᠨ ᠠᠴᠠ ᠭᠠᠳᠠᠨ᠎ᠠ ᠲᠣᠮᠳᠠᠳᠦ ᠶᠢᠨ ᠲᠠᠷᠢᠶᠠᠴᠢᠨ ᠠᠷᠠᠳ ᠤᠨ ᠲᠣᠮᠳᠠ ᠪᠠᠰᠠ ᠨᠠᠷᠢᠮᠣ ᠶᠢᠨ ᠡᠭᠦᠰᠦᠯ ᠭᠠᠷᠣᠯ ᠤᠨ ᠲᠣᠬᠠᠢ ᠦᠯᠢᠭᠡᠷ ᠲᠣᠮᠤᠬ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠣᠯᠠᠮᠵᠢᠯᠠᠬᠳᠠᠬᠰᠠᠭᠠᠷ ᠪᠠᠶᠢᠨ᠎ᠠ᠃      ᠡᠷᠳᠡ ᠣᠷᠢᠳᠦ ᠶᠢᠨ ᠴᠠᠬ ᠲᠤ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠲᠠᠷᠢᠶ᠎ᠠ ᠭᠡᠳᠡᠭ ᠢ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠤᠷ ᠬᠡᠭᠡᠷ᠎ᠡ ᠶᠢᠨ ᠡᠪᠡᠰᠦ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠢᠳᠡᠨ ᠦᠯ ᠵᠠᠯᠭᠠᠵᠦ ᠠᠮᠢ ᠭᠤᠣᠯ ᠲᠠᠢ ᠶᠠᠪᠣᠵᠦ ᠪᠠᠶᠢᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠨᠢᠭᠡ ᠡᠳᠦᠷ ᠬᠡᠳᠦᠨ ᠬᠦᠮᠦᠰ ᠬᠡᠭᠡᠷ᠎ᠡ ᠶᠢᠨ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠣᠭᠠᠳ ᠬᠦᠯᠢᠭᠡᠷ ᠴᠢᠯᠠᠭᠤ ᠶᠢ ᠲᠣᠭᠤᠷᠢᠨ ᠰᠠᠭᠤᠭᠠᠳ ᠢᠳᠡᠵᠦ ᠪᠠᠶᠢᠳᠠᠯ᠎ᠠ ᠨᠢᠭᠡᠨ ᠪᠢᠯᠵᠣᠣᠬᠠᠢ ᠰᠣᠮᠣ ᠰᠢᠬ ᠨᠢᠰᠦᠨ ᠢᠷᠡᠭᠡᠳ ᠬᠦᠮᠦᠰ ᠤᠨ ᠲᠣᠭᠤᠷᠢᠵᠦ ᠰᠠᠭᠤᠬᠰᠠᠨ ᠬᠦᠯᠢᠭᠡᠷ ᠴᠢᠯᠠᠭᠤᠨ ᠲᠡᠭᠡᠷ᠎ᠡ ᠪᠠᠭᠤᠬᠰᠠᠨ ᠭᠡᠨ᠎ᠡ᠃ ᠬᠦᠮᠦᠨ ᠵᠣᠨ ᠣᠯᠠᠨ ᠴᠣᠬᠯᠠᠷᠠᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠢ ᠴᠦ ᠬᠠᠮᠢᠶᠠᠷᠣᠯ ᠦᠭᠡᠢ ᠪᠠᠷ ᠨᠢᠰᠣᠨ ᠢᠷᠡᠭᠰᠡᠨ ᠡᠨᠡ ᠬᠦ ᠪᠢᠯᠵᠣᠣᠬᠠᠢ ᠨᠢ ᠣᠯᠠᠨ ᠤ ᠠᠩᠬᠠᠷᠣᠯ ᠢ ᠶᠡᠬᠡᠳᠡ ᠲᠠᠳᠠᠪᠠ᠃ ᠣᠯᠠᠨ ᠤ ᠲᠣᠮᠳᠠ ᠠᠴᠠ ᠨᠢᠭᠡᠨ ᠵᠠᠯᠠᠭᠤ ᠪᠢᠯᠵᠣᠣᠬᠠᠢ ᠶᠢ ᠬᠡᠰᠡᠭ ᠠᠵᠢᠬᠯᠠᠵᠦ ᠪᠠᠶᠢᠬᠰᠠᠨ ᠢᠶᠠᠨ ᠭᠡᠨᠡᠳᠳᠡ ︽ᠡᠨᠡ ᠪᠢᠯᠵᠣᠣᠬᠠᠢ ᠠᠮᠠᠨ ᠳᠠᠭᠠᠨ ᠶᠠᠭᠤ ᠵᠠᠭᠤᠵᠦ ᠪᠠᠶᠢᠬᠤ ᠪᠣᠢ︖︾ ᠭᠡᠵᠦ ᠭᠠᠶᠢᠬᠠᠰᠢᠷᠠᠨ ᠠᠰᠠᠭᠤᠬᠤ ᠳᠤ ᠣᠯᠠᠨ ᠤ ᠬᠠᠷᠠᠴᠠ ᠪᠢᠯᠵᠣᠣᠬᠠᠢ ᠶᠢᠨ ᠵᠢᠵᠢᠭ ᠬᠤᠰᠢᠭᠤ ᠦᠭᠡᠳᠡ ᠲᠦᠪᠯᠡᠷᠡᠪᠡ᠃ ᠪᠢᠯᠵᠣᠣᠬᠠᠢ ᠬᠠᠷᠢᠨ ᠬᠤᠰᠢᠭᠤᠨ ᠳᠠᠭᠠᠨ ᠬᠢᠯᠳᠦᠭᠡᠨᠡᠭᠰᠡᠨ ᠬᠢᠯᠠᠭᠠᠷ ᠰᠢᠷ᠎ᠠ ᠵᠢᠵᠢᠭ ᠮᠦᠬᠦᠯᠢᠭ ᠵᠠᠭᠤᠴᠢᠬᠠᠭᠠᠳ ᠨᠠᠭᠠᠰᠢ ᠴᠠᠭᠠᠰᠢ ᠲᠡᠪᠳᠡᠷᠢᠨ ᠦᠰᠦᠷᠴᠦ ᠪᠠᠶᠢᠬᠰᠠᠨ ᠪᠠᠶᠢᠵᠠᠢ᠃ ᠬᠦᠮᠦᠰ ᠪᠢᠯᠵᠣᠣᠬᠠᠢ ᠶᠢᠨ ᠠᠮᠠᠨ ᠳᠠᠬᠢ ᠬᠢᠯᠠᠭᠠᠷ ᠰᠢᠷ᠎ᠠ ᠶᠠᠭᠤᠮ᠎ᠠ ᠨᠢ ᠴᠣᠬᠤᠮ ᠶᠠᠭᠤ ᠪᠣᠯᠬᠤ ᠶᠢ ᠬᠠᠷᠠᠬᠤ ᠭᠡᠵᠦ ᠦᠨᠳᠡᠯᠵᠡᠨ ᠪᠣᠰᠴᠠᠭᠠᠪᠠ᠃ ᠬᠦᠮᠦᠰ ᠤᠨ ᠦᠢᠮᠡᠬᠡᠨ ᠳᠤ ᠰᠣᠴᠢᠬᠰᠠᠨ ᠪᠢᠯᠵᠣᠣᠬᠠᠢ ᠨᠢᠰᠣᠨ ᠶᠠᠪᠣᠬᠤ ᠳᠠᠭᠠᠨ ᠠᠮᠠᠨ ᠳᠠᠭᠠᠨ ᠵᠠᠭᠤᠬᠰᠠ ᠰᠢᠷ᠎ᠠ ᠮᠦᠬᠦᠯᠢᠭ ᠢᠶᠠᠨ ᠭᠠᠵᠠᠷ ᠠᠯᠳᠠᠴᠢᠬᠠᠬᠰᠠᠨ ᠪᠠᠶᠢᠵᠠᠢ᠃ ᠰᠢᠷ᠎ᠠ ᠮᠦᠬᠦᠯᠢᠭ ᠪᠦᠮᠪᠦᠷᠢᠭᠰᠡᠭᠡᠷ ᠬᠦᠯᠢᠭᠡᠷ ᠴᠢᠯᠠᠭᠤ ᠶᠢᠨ ᠵᠠᠪᠰᠠᠷ ᠣᠨᠠᠪᠠ᠃ ᠬᠦᠮᠦᠰ ᠰᠢᠷ᠎ᠠ ᠮᠦᠬᠦᠯᠢᠭ ᠢ ᠠᠪᠬᠤ ᠭᠡᠵᠦ ᠬᠦᠯᠢᠭᠡᠷ ᠴᠢᠯᠠᠭᠤ ᠶᠢ ᠰᠢᠯᠵᠢᠭᠦᠯᠵᠦ ᠪᠠᠶᠢᠳᠠᠯ᠎ᠠ ᠴᠢᠯᠠᠭᠤᠨ ᠤ ᠵᠠᠪᠰᠠᠷ ᠠᠴᠠ ᠨᠢᠭᠡᠨ ᠰᠢᠷᠭᠤᠯᠵᠢ ᠰᠢᠷ᠎ᠠ ᠮᠦᠬᠦᠯᠢᠭ ᠢ ᠵᠠᠭᠤᠬᠰᠠᠭᠠᠷ ᠭᠠᠷᠴᠦ ᠢᠷᠡᠭᠡᠳ ᠨᠦᠬᠡᠨ ᠳᠡᠭᠡᠨ ᠣᠷᠣᠬᠤ ᠨᠢ ᠬᠠᠷᠠᠬᠳᠠᠪᠠ᠃ ᠬᠦᠮᠦᠰ ᠰᠢᠷ᠎ᠠ ᠮᠦᠬᠦᠯᠢᠭ ᠢ ᠠᠪᠬᠤ ᠶᠢᠨ ᠲᠦᠯᠦᠭᠡ ᠰᠢᠷᠭᠤᠯᠵᠢ ᠶᠢᠨ ᠡᠭᠦᠷ ᠢ ᠮᠠᠯᠳᠠᠨ ᠡᠪᠳᠡᠯᠡᠭᠰᠡᠨ ᠪᠣᠯᠪᠠᠴᠦ ᠰᠢᠷ᠎ᠠ ᠮᠦᠬᠦᠯᠢᠭ ᠣᠯᠳᠠᠬᠰᠠᠨ ᠦᠭᠡᠢ ᠪᠣᠯᠬᠤᠷ ᠣᠷᠮ᠎ᠠ ᠮᠠᠭᠤᠳᠠᠢ ᠬᠠᠷᠢᠵᠠᠭᠠᠪᠠ᠃ ᠲᠠᠷᠠᠭ᠎ᠠ ᠵᠢᠯ ᠨᠢ ᠰᠢᠷᠭᠤᠯᠵᠢ ᠶᠢᠨ ᠡᠭᠦᠷ ᠤᠨ ᠬᠠᠵᠠᠭᠤ ᠠᠴᠠ ᠨᠢᠭᠡᠨ ᠴᠡᠯᠭᠡᠷᠡᠭᠰᠡᠨ ᠬᠦᠬᠡ ᠣᠷᠭᠤᠮᠠᠯ ᠣᠷᠭᠤᠭᠠᠳ ᠪᠠᠶᠢᠬᠤ ᠶᠢ ᠬᠦᠮᠦᠰ ᠣᠯᠵᠦ ᠬᠠᠷᠠᠭᠠᠳ ᠶᠡᠬᠡᠳᠡ ᠭᠠᠶᠢᠬᠠᠵᠦ ᠬᠠᠵᠠᠭᠤ ᠶᠢᠨ ᠬᠢᠨᠢ ᠡᠪᠡᠰᠦ ᠪᠣᠵᠠᠷ ᠢ ᠨᠢ ᠦᠭᠳᠡᠭᠡᠨ ᠴᠡᠪᠡᠷᠯᠡᠵᠦ ᠦᠭᠭᠦᠭᠰᠡᠨ ᠶᠣᠮ ᠭᠡᠨ᠎ᠡ᠃ ᠨᠠᠮᠣᠷ ᠪᠣᠯᠬᠤ ᠳᠤ ᠡᠨᠡ ᠬᠦ ᠣᠷᠭᠤᠮᠠᠯ ᠨᠢ ᠪᠡᠶ᠎ᠡ ᠪᠠᠨ ᠲᠠᠭᠠᠭᠠᠬᠤ ᠦᠭᠡᠢ ᠪᠣᠯᠳᠠᠯ᠎ᠠ ᠲᠣᠯᠣᠭᠠᠶᠢᠯᠠᠵᠦ᠂ ᠲᠣᠯᠣᠭᠠᠢ ᠲᠡᠭᠡᠷ᠎ᠡ ᠨᠢ ᠮᠠᠰᠢ ᠣᠯᠠᠨ ᠬᠢᠯᠠᠭᠠᠷ ᠰᠢᠷ᠎ᠠ ᠮᠦᠬᠦᠯᠢᠭ ᠪᠠᠭᠰᠢᠷᠠᠨ ᠰᠠᠭᠤᠬᠰᠠᠨ ᠨᠢ ᠬᠠᠷᠠᠬᠳᠠᠵᠠᠢ᠃ ᠬᠦᠮᠦᠰ ᠡᠨᠡ ᠬᠦ ᠬᠢᠯᠠᠭᠠᠷ ᠰᠢᠷ᠎ᠠ ᠮᠦᠬᠦᠯᠢᠭ ᠤᠳ ᠢ ᠨᠢ ᠮᠦᠯᠢᠵᠦ ᠠᠪᠣᠭᠠᠳ ᠬᠢᠮᠠᠭᠠᠳᠠᠨ ᠬᠠᠳᠠᠭᠠᠯᠠᠬᠰᠠᠭᠠᠷ ᠪᠠᠶᠢᠵᠦ ᠲᠠᠷᠠᠭ᠎ᠠ ᠬᠠᠪᠣᠷ ᠨᠢ ᠪᠣᠯᠬᠤ ᠦᠶᠡᠰ ᠡᠳᠡᠭᠡᠷ ᠮᠦᠬᠦᠯᠢᠭ ᠤᠳ ᠢᠶᠠᠨ ᠰᠢᠮᠡᠯᠢᠭ ᠭᠠᠵᠠᠷ ᠢ ᠰᠣᠩᠭᠤᠨ ᠪᠠᠶᠢᠵᠦ ᠪᠦᠬᠦᠨ ᠢ ᠲᠠᠷᠢᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠡᠨᠡ ᠮᠡᠳᠦ ᠪᠠᠷ ᠬᠤᠶᠠᠷᠬᠠᠨ ᠵᠢᠯ ᠦᠡᠭᠭᠡᠷᠡᠬᠦ ᠶᠢᠨ ᠬᠢᠷᠢ ᠳᠤ ᠬᠢᠯᠠᠭᠠᠷ ᠰᠢᠷ᠎ᠠ ᠮᠦᠬᠦᠯᠢᠭ ᠤᠨ ᠲᠠᠷᠢᠶ᠎ᠠ ᠪᠣᠢ ᠪᠣᠯᠵᠦ᠂ ᠮᠦᠬᠦᠯᠢᠭ ᠢ ᠨᠢ ᠭᠠᠳᠠᠷ ᠲᠣᠬᠳᠣᠢ ᠠᠴᠠ ᠨᠢ ᠰᠠᠯᠭᠠᠨ ᠠᠪᠣᠪᠠᠯ ᠬᠦᠨᠡᠰᠦ ᠪᠣᠯᠭᠠᠨ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠶᠢ ᠬᠦᠮᠦᠰ ᠮᠡᠳᠡᠭᠡᠳ ︽ᠨᠠᠷᠢᠮᠣ︾ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠶᠣᠮ ᠭᠡᠨ᠎ᠡ᠃      ᠠᠷᠠᠳ ᠤᠨ ᠲᠣᠮᠳᠠ ᠣᠯᠠᠮᠵᠢᠯᠠᠬᠳᠠᠬᠰᠠᠨ ᠡᠨᠡ ᠬᠦ ᠦᠯᠢᠭᠡᠷ ᠨᠢ ᠨᠠᠷᠢᠮᠣ ᠶᠢᠨ ᠪᠣᠢ ᠪᠣᠯᠣᠬᠰᠠᠨ ᠲᠣᠬᠠᠢ ᠪᠠᠳᠣᠳᠠᠢ ᠡᠰᠡᠬᠦ ᠨᠢ ᠲᠣᠳᠣᠷᠬᠠᠢ ᠪᠢᠰᠢ ᠪᠣᠯᠪᠠᠴᠦ ᠨᠠᠷᠢᠮᠣ ᠭᠡᠳᠡᠭ ᠲᠠᠷᠢᠮᠠᠯ ᠢ ᠬᠡᠷᠭᠢᠵᠦ ᠲᠠᠷᠢᠬᠤ ᠪᠣᠯᠣᠬᠰᠠᠨ ᠲᠣᠬᠠᠢ ᠬᠦᠮᠦᠰ ᠲᠤ ᠲᠦᠭᠦᠮ ᠣᠶᠢᠢᠯᠠᠭᠠᠯᠳᠠ ᠦᠭᠴᠦ ᠴᠢᠳᠠᠬᠤ ᠨᠢ ᠯᠠᠪᠳᠠᠢ᠃ ᠶᠠᠭᠤ ᠴᠤ ᠭᠡᠰᠡᠨ ᠨᠠᠷᠢᠮᠣ ᠶᠢᠨ ᠪᠣᠢ ᠪᠣᠯᠣᠬᠰᠠᠨ ᠭᠠᠵᠠᠷ ᠢ ᠲᠡᠯᠡᠬᠡᠢ ᠶᠢᠨ ᠣᠯᠠᠨ ᠡᠷᠳᠡᠮᠳᠡᠨ ᠠᠴᠠ ᠲᠣᠮᠳᠠᠳᠦ ᠣᠯᠣᠰ ᠤᠨ ᠣᠮᠠᠷᠠᠳᠦ ᠣᠷᠣᠨ ᠭᠡᠵᠦ ᠨᠢᠭᠡᠳᠦᠯᠳᠡᠢ ᠦᠵᠡᠳᠡᠭ ᠪᠦᠭᠡᠳ ᠲᠡᠦᠬᠡ ᠰᠣᠳᠣᠷ ᠲᠤ ᠴᠦ ᠮᠣᠩᠭᠤᠯᠴᠣᠳ ᠠᠯᠢ ᠡᠷᠳᠡ ᠠᠴᠠ ᠠᠪᠣᠭᠠᠳ ᠨᠠᠷᠢᠮᠣ ᠲᠠᠷᠢᠵᠦ ᠪᠠᠶᠢᠬᠰᠠᠨ ᠲᠡᠮᠳᠡᠭᠯᠡᠯ ᠪᠠᠶᠢᠳᠠᠬ᠃ ᠦᠷᠡᠳᠣᠬᠳᠠᠬᠤ ᠭᠡᠷᠡᠯᠴᠡᠴᠡᠭ ᠤᠨ ᠵᠣᠬᠢᠶᠠᠬᠰᠠᠨ ︽ᠮᠣᠩᠭᠤᠯ ᠤᠨ ᠲᠠᠷᠢᠶᠠᠯᠠᠩ ᠠᠵᠣ ᠠᠬᠤᠢ ᠬᠢᠭᠡᠳ ᠲᠡᠭᠦᠨ ᠤ ᠬᠤᠪᠢᠷᠠᠯᠳᠠ︾ ᠭᠡᠬᠦ ᠨᠣᠮ ᠳᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ᠂ ︽ᠣᠳᠬᠠᠴᠢ ᠲᠦᠰᠢᠮᠡᠯ ᠵᠧᠦ ᠶᠢᠨ ᠭᠤᠸᠠᠩ ᠤᠨ ᠲᠡᠭᠦᠪᠦᠷᠢ︾ ᠳᠤ᠄ ︽ᠲᠡᠷᠡ ᠭᠠᠵᠠᠷ ᠢ ᠮᠣᠩᠭᠤᠯ ᠢᠶᠠᠷ ᠵᠠᠯᠢ ᠬᠠᠷᠠᠨᠠᠪᠤ ᠭᠡᠳᠡᠭ᠂ ᠬᠤᠶᠠᠷ ᠭᠤᠣᠯ ᠤᠨ ᠵᠠᠪᠰᠠᠷ ᠢᠶᠠᠷ ᠰᠢᠪᠠᠷ ᠪᠠᠶᠢᠰᠢᠩ ᠬᠤᠸᠠ ᠲᠣᠪᠤ ᠵᠢᠭᠳᠡᠷᠡᠵᠦ ᠬᠠᠷᠠᠬᠳᠠᠮᠣᠢ᠂ ᠵᠠᠭᠤ ᠢᠯᠡᠭᠦᠦ ᠭᠠᠵᠠᠷ ᠴᠡᠯᠡᠶᠢᠭᠰᠡᠨ ᠠᠭᠤᠳᠠᠮ ᠬᠦᠨᠳᠡᠢ ᠳᠤᠷ ᠬᠠᠶᠠᠭ᠎ᠠ ᠬᠠᠶᠠᠭ᠎ᠠ ᠪᠠᠨ ᠨᠠᠭᠠᠯᠳᠣᠬᠰᠠᠨ ᠭᠤᠷᠪᠠᠨ ᠵᠠᠭᠤ ᠢᠯᠡᠭᠦᠦ ᠡᠷᠦᠬᠡ ᠰᠠᠭᠤᠮᠣᠢ᠂ ᠣᠯᠠᠨ ᠠᠶᠢᠮᠠᠬ ᠤᠨ ᠢᠷᠭᠡᠳ ᠬᠢᠳᠠᠳ ᠬᠦᠮᠦᠨ ᠯᠦᠭᠡ ᠬᠤᠯᠢᠯᠳᠣᠨ ᠨᠣᠳᠣᠬᠯᠠᠬᠰᠠᠨ ᠠᠨᠣ ᠦᠨᠡᠬᠡᠷ ᠬᠤᠳᠠ ᠵᠡᠭᠡᠯᠢ ᠮᠡᠳᠦ ᠰᠠᠨᠠᠬᠳᠠᠮᠣᠢ ᠁ ᠲᠡᠳᠡ ᠪᠠᠰᠠ ᠦᠬᠡᠷ ᠲᠡᠵᠢᠭᠡᠵᠦ᠂ ᠨᠠᠷᠢᠮᠣ ᠲᠠᠷᠢᠬᠤ ᠲᠠᠳᠬᠠᠯ ᠲᠠᠢ ᠪᠦᠭᠡᠳ ᠬᠦᠮᠦᠨ ᠤ ᠴᠢᠷᠠᠢ ᠶᠢ ᠬᠠᠷᠠᠨ ᠠᠮᠢ ᠵᠢᠭᠤᠬᠤ ᠦᠭᠡᠢ ᠪᠦᠯᠦᠭᠡ︾ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠣᠢ᠃ ᠡᠭᠦᠨ ᠠᠴᠠ ᠪᠢᠳᠡ ᠨᠠᠷᠢᠮᠣ ᠨᠢ ᠮᠣᠩᠭᠤᠯ ᠣᠷᠣᠨ ᠳᠤ ᠠᠯᠢ ᠡᠷᠳᠡ ᠠᠴᠠ ᠲᠡᠷᠢᠬᠳᠠᠵᠦ ᠪᠠᠶᠢᠬᠰᠠᠨ ᠮᠦᠷᠳᠡᠭᠡᠨ ᠮᠣᠩᠭᠤᠯᠴᠣᠳ ᠤᠨ ᠪᠣᠳᠠᠭᠠᠨ ᠰᠢᠷᠡᠭᠡᠨ ᠳᠠᠬᠢ ᠴᠢᠬᠤᠯᠠ ᠬᠦᠨᠡᠰᠦᠨ ᠤ ᠨᠢᠭᠡ ᠲᠦᠷᠦᠯ ᠪᠠᠶᠢᠬᠰᠠᠨ ᠭᠡᠳᠡᠭ ᠢ ᠴᠤ ᠮᠡᠳᠡᠵᠦ ᠪᠣᠯᠣᠨ᠎ᠠ᠃ ᠭᠡᠪᠡᠴᠦ ᠬᠤᠷᠴᠢᠨ ᠨᠣᠳᠤᠬ ᠲᠤ ᠨᠠᠷᠢᠮᠣ ᠲᠠᠷᠢᠵᠦ ᠢᠷᠡᠭᠰᠡᠨ ᠨᠢ ᠨᠡᠯᠢᠶᠡᠳ ᠬᠤᠵᠢᠭᠤ ᠰᠢᠬ ᠤᠨ ᠣᠴᠢᠷ ᠶᠣᠮ᠃ ᠡᠷᠳᠡᠮᠳᠡᠳ ᠠᠴᠠ᠄ ︽ᠬᠤᠷᠴᠢᠨ ᠨᠣᠳᠤᠬ ᠲᠤ ᠣᠣᠯ ᠳᠠᠭᠠᠨ ᠮᠣᠩᠭᠤᠯ ᠠᠮᠣ᠂ ᠰᠠᠭᠠᠬ ᠂ ᠨᠠᠩᠬᠢ ᠵᠡᠷᠭᠡ ᠶᠢ ᠪᠦᠳᠦᠭᠦᠯᠢᠭ ᠠᠷᠭ᠎ᠠ ᠪᠠᠷ ᠪᠠᠭ᠎ᠠ ᠰᠠᠭ᠎ᠠ ᠲᠠᠷᠢᠶᠠᠯᠠᠵᠦ ᠪᠠᠶᠢᠬᠰᠠᠨ ᠪᠣᠯᠪᠠᠴᠦ ᠵᠢᠩᠭᠢᠨᠢ ᠪᠠᠷ ᠲᠠᠷᠢᠶᠠᠯᠠᠵᠦ᠂ ᠡᠬᠢᠯᠡᠭᠡᠳ ᠠᠷᠠᠢ ᠭᠤᠷᠪᠠᠨ ᠵᠠᠭᠤᠨ ᠵᠢᠯ ᠴᠦ ᠪᠣᠯᠤᠭ᠎ᠠ ᠦᠭᠡᠢ ᠶᠣᠮ︾ ᠭᠡᠵᠦ ᠰᠠᠨᠠᠯ ᠨᠢᠭᠡᠳᠡᠢ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠡᠭᠦᠨ ᠠᠴᠠ ᠨᠠᠷᠢᠮᠣ ᠨᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠵᠢᠩᠭᠢᠨᠢ ᠪᠠᠷ ᠲᠠᠷᠢᠬᠳᠠᠵᠦ ᠡᠬᠢᠯᠡᠭᠡᠳ ᠲᠡᠶᠢᠮᠦ ᠣᠷᠳᠦ ᠬᠤᠭᠤᠴᠠᠭ᠎ᠠ ᠪᠣᠯᠤᠭ᠎ᠠ ᠦᠭᠡᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠲᠠᠷᠢᠶᠠᠴᠢᠨ ᠲᠣᠯᠭᠠᠭᠤᠷᠢ ᠶᠢᠨ ᠬᠠᠭᠤᠴᠢᠯᠠᠬᠰᠠᠨ ᠢᠶᠠᠷ ︽ᠮᠣᠩᠭᠤᠯᠴᠣᠳ ᠨᠠᠷᠢᠮᠣ ᠶᠢ ᠬᠡᠵᠢᠶ᠎ᠡ ᠠᠴᠠ ᠡᠬᠢᠯᠡᠵᠦ ᠲᠠᠷᠢᠵᠦ ᠪᠠᠶᠢᠬᠰᠠᠨ ᠭᠡᠳᠡᠭ ᠢ ᠨᠢ ᠲᠣᠳᠤᠷᠬᠠᠢ ᠮᠡᠳᠡᠬᠦ ᠦᠭᠡᠢ᠃ ᠭᠡᠪᠡᠴᠦ ᠮᠠᠨ ᠤ ᠨᠣᠳᠤᠬ ᠲᠤ ᠨᠠᠷᠢᠮᠣ ᠶᠢ ᠲᠠᠷᠢᠵᠦ ᠡᠬᠢᠯᠡᠭᠡᠳ ᠵᠠᠭᠤᠨ ᠵᠢᠯ ᠤᠨ ᠣᠷᠴᠢᠮ ᠯᠡ ᠪᠣᠯᠵᠦ ᠪᠠᠶᠢᠨ᠎ᠠ ᠭᠡᠵᠦ ᠨᠠᠰᠣᠳᠠᠶᠢᠴᠣᠳ ᠬᠡᠯᠡᠯᠴᠡᠳᠡᠭ᠃ ᠠᠩᠬ᠎ᠠ ᠡᠬᠢᠨ ᠳᠡᠭᠡᠨ ᠬᠠᠷᠠᠴᠢᠨ ᠮᠣᠩᠭᠤᠯᠵᠢᠨ ᠠᠴᠠ ᠨᠡᠭᠦᠳᠡᠯᠯᠡᠵᠦ ᠢᠷᠡᠭᠰᠡᠨ ᠨᠢᠭᠡ ᠪᠦᠯᠦᠭ ᠮᠣᠩᠭᠤᠯᠴᠣᠳ ᠠᠴᠠ ᠭᠡᠷ ᠤᠨ ᠢᠶᠠᠨ ᠣᠶᠢᠷᠠᠯᠴᠠᠭ᠎ᠠ ᠪᠠᠶᠢᠭ᠎ᠠ ᠦᠡᠭᠭᠡ ᠰᠢᠮᠡᠯᠢᠭ ᠭᠠᠵᠠᠷ ᠢ ᠬᠦᠷᠵᠡ ᠪᠠᠷ ᠣᠷᠪᠠᠭᠤᠯᠣᠭᠠᠳ ᠨᠣᠭᠤᠭ᠎ᠠ ᠴᠠᠭ᠎ᠠ ᠲᠠᠷᠢᠵᠦ ᠪᠠᠶᠢᠬᠰᠠᠨ ᠢᠶᠠᠨ ᠬᠤᠵᠢᠮᠳᠡᠵᠦ ᠢᠷᠡᠭᠡᠳ ᠡᠨᠡ ᠬᠦ ᠭᠠᠵᠠᠷ ᠢᠶᠠᠨ ᠦᠷᠭᠡᠳᠭᠡᠵᠦ ᠨᠠᠷᠢᠮᠣ ᠲᠠᠷᠢᠬᠤ ᠪᠣᠯᠣᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠨᠠᠷᠢᠮᠣ ᠭᠡᠳᠡᠭ ᠲᠠᠷᠢᠶ᠎ᠠ ᠨᠢ ᠣᠨᠠᠯᠳᠠ ᠪᠠᠷ ᠨᠡᠯᠢᠶᠡᠳ ᠵᠦᠭᠡᠷ ᠰᠢᠭ ᠲᠠᠷᠢᠶ᠎ᠠ ᠪᠣᠯᠬᠤᠷ ᠴᠢᠯᠦᠭᠡᠯᠡᠭᠳᠡᠭᠰᠡᠨ ᠤ ᠲᠠᠷᠠᠭ᠎ᠠ ᠣᠯᠠᠩᠬᠢ ᠬᠦᠮᠦᠨ ᠨᠠᠷᠢᠮᠣ ᠲᠠᠷᠢᠬᠤ ᠪᠣᠯᠣᠬᠰᠠᠨ ᠭᠡᠵᠦ ᠬᠡᠯᠡᠯᠴᠡᠳᠡᠭ︾ ᠭᠡᠵᠡᠢ᠃      ᠨᠠᠷᠢᠮᠣ ᠶᠢ ᠲᠠᠷᠢᠵᠦ ᠠᠷᠠᠴᠢᠯᠠᠬᠤ ᠠᠷᠭ᠎ᠠ      ᠨᠠᠷᠢᠮᠣ ᠪᠣᠯ ᠦᠶᠡᠳᠦ ᠣᠷᠭᠤᠮᠠᠯ ᠤᠨ ᠢᠵᠡᠭᠤᠷᠳᠦ ᠨᠢᠭᠡ ᠨᠠᠰᠣᠳᠣ ᠡᠪᠡᠰᠦᠯᠢᠭ ᠣᠷᠭᠤᠮᠠᠯ ᠶᠣᠮ᠃ ᠨᠠᠷᠢᠮᠣ ᠨᠢ ᠰᠢᠮ᠎ᠡ ᠲᠡᠵᠢᠭᠡᠯ ᠢᠶᠠᠷ ᠡᠯᠪᠡᠭ ᠴᠠᠬ ᠠᠭᠤᠷ ᠲᠠᠢ ᠲᠣᠬᠢᠷᠠᠯᠴᠠᠬᠤ ᠴᠢᠳᠠᠪᠣᠷᠢ ᠪᠠᠷ ᠴᠢᠩᠭ᠎ᠠ᠂ ᠭᠠᠨᠭ᠌ ᠬᠠᠭᠤᠷᠠᠢ᠂ ᠲᠠᠴᠢᠷ ᠨᠢᠮᠭᠡᠨ ᠬᠦᠷᠦᠰᠦ᠂ ᠬᠦᠢᠳᠡᠨ ᠳᠤ ᠲᠡᠰᠪᠦᠷᠢᠳᠡᠢ ᠨᠢᠭᠡ ᠵᠦᠢᠯ ᠤᠨ ᠠᠮᠣ ᠪᠣᠳᠠᠭᠠᠨ ᠤ ᠲᠠᠷᠢᠮᠠᠯ ᠶᠣᠮ᠃ ᠨᠠᠷᠢᠮᠣ ᠶᠢᠨ ᠲᠠᠷᠢᠵᠦ ᠠᠷᠠᠴᠢᠯᠠᠬᠤ ᠠᠷᠭ᠎ᠠ ᠪᠠᠷᠢᠯ ᠨᠢ ᠰᠠᠭᠠᠬ᠂ ᠨᠠᠩᠬᠢ᠂ ᠮᠣᠩᠭᠤᠯ ᠠᠮᠣ ᠶᠢ ᠪᠣᠳᠣᠪᠠᠯ ᠨᠡᠯᠢᠶᠡᠳ ᠨᠠᠷᠢᠨ ᠪᠣᠳᠣᠯᠢᠶᠠᠨᠲᠠᠢ ᠪᠠᠶᠢᠳᠠᠬ᠃ ᠨᠠᠷᠢᠮᠣ ᠲᠠᠷᠢᠬᠤ ᠲᠣᠬᠠᠢ ᠲᠣᠯᠭᠠᠭᠤᠷᠢ ᠠᠴᠠ ︽ᠨᠠᠷᠢᠮᠣ ᠶᠢ ᠬᠤᠷᠴᠢᠨ ᠳᠤ ᠡᠷᠳᠡ ᠶᠢᠨ ᠲᠠᠷᠢᠶ᠎ᠠ ᠳᠤ ᠪᠠᠭᠳᠠᠭᠠᠳᠠᠬ᠃ ᠡᠷᠳᠡ ᠶᠢᠨ ᠲᠠᠷᠢᠶ᠎ᠠ ᠭᠡᠳᠡᠭ ᠨᠢ ᠡᠷᠳᠡ ᠰᠢᠭ ᠲᠠᠷᠢᠬᠤ ᠲᠠᠷᠢᠶ᠎ᠠ ᠶᠢ ᠵᠢᠭᠠᠵᠦ ᠪᠠᠶᠢᠨ᠎ᠠ᠃ ᠨᠠᠷᠢᠮᠣ ᠶᠢᠨ ᠦᠷ᠎ᠡ ᠶᠢᠨ ᠣᠨᠴᠠᠯᠢᠬ ᠵᠢᠴᠢ ᠪᠣᠯᠪᠠᠰᠣᠷᠠᠬᠤ ᠬᠤᠭᠤᠴᠠᠭ᠎ᠠ ᠶᠢ ᠨᠢ ᠦᠨᠳᠦᠰᠦᠯᠡᠵᠦ ᠭᠤᠷᠪᠠᠨ ᠲᠦᠷᠦᠯ ᠬᠤᠪᠢᠶᠠᠳᠠᠬ᠃ ᠡᠷᠳᠡ ᠪᠣᠯᠪᠠᠰᠣᠷᠠᠬᠤ ᠨᠠᠷᠢᠮᠣ ᠨᠢ 60 — 80 ᠡᠳᠦᠷ ᠲᠤ ᠪᠣᠯᠪᠠᠰᠣᠷᠠᠵᠦ᠂ ᠬᠡᠪ ᠤᠨ ᠪᠣᠯᠪᠠᠰᠣᠷᠠᠬᠤ ᠨᠠᠷᠢᠮᠣ ᠨᠢ 90 — 110 ᠬᠤᠨᠤᠬ ᠲᠤ ᠪᠣᠯᠪᠠᠰᠣᠷᠠᠵᠦ᠂ ᠣᠷᠣᠢ ᠶᠢᠨ ᠨᠠᠷᠢᠮᠣ ᠨᠢ ᠪᠣᠯᠪᠠᠰᠣᠷᠠᠳᠠᠯ᠎ᠠ 110 ᠬᠤᠨᠤᠬ ᠠᠴᠠ ᠢᠯᠡᠭᠦᠦ ᠬᠤᠭᠤᠴᠠᠭ᠎ᠠ ᠬᠡᠷᠡᠭᠰᠡᠳᠡᠭ ᠶᠣᠮ᠃ ᠨᠠᠷᠢᠮᠣ ᠨᠢ ᠠᠭᠠᠷ ᠤᠨ ᠲᠣᠯᠠᠭᠠᠨ ᠤ ᠬᠡᠮᠵᠢᠶ᠎ᠡ 7 ᠭᠷᠡᠳᠦ᠋ᠰ ᠲᠤ ᠰᠣᠶᠣᠭᠠᠯᠠᠵᠦ᠂ 18 —25 ᠭᠷᠠᠳᠦ᠋ᠰ ᠤᠨ ᠦᠶᠡᠰ ᠬᠠᠮᠤᠬ ᠬᠤᠷᠳᠣᠨ ᠰᠣᠶᠣᠭᠠᠯᠠᠵᠦ ᠣᠷᠭᠤᠳᠠᠬ ᠪᠣᠯᠬᠤᠷ ᠠᠭᠠᠷ ᠤᠨ ᠲᠣᠯᠠᠭᠠᠨ ᠤ ᠬᠡᠮᠵᠢᠶ᠎ᠡ 10 ᠭᠷᠠᠳᠦ᠋ᠰ ᠠᠴᠠ ᠲᠡᠭᠡᠭᠰᠢ ᠪᠠᠶᠢᠬᠤ ᠦᠶᠡᠰ ᠲᠠᠷᠢᠪᠠᠯ ᠬᠠᠮᠤᠬ ᠤᠨ ᠲᠣᠬᠢᠷᠠᠮᠵᠢᠳᠠᠢ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠨᠣᠳᠤᠬ ᠲᠤ ᠨᠠᠷᠢᠮᠣ ᠶᠢ 4 ᠰᠠᠷ᠎ᠠ ᠠᠴᠠ ᠰᠡᠭᠦᠯᠴᠢ 6 ᠰᠠᠷ᠎ᠡ ᠶᠢᠨ ᠡᠬᠢ ᠪᠣᠯᠳᠠᠯᠠᠬᠢ ᠬᠤᠭᠤᠴᠠᠭᠠᠨ ᠳᠤ ᠲᠠᠷᠢᠳᠠᠬ ᠶᠣᠮ︾ ᠭᠡᠵᠡᠢ᠃ ᠨᠠᠷᠢᠮᠣ ᠶᠢ ᠬᠤᠷᠢᠶᠠᠬᠤ ᠳᠤ ᠭᠤᠣᠯᠳᠠᠭᠤ ᠭᠠᠵᠠᠷ ᠭᠠᠷᠭᠠᠬᠤ᠂ ᠲᠠᠷᠢᠬᠤ᠂ ᠠᠷᠴᠢᠬᠤ᠂ ᠲᠠᠩᠨᠠᠬᠤ᠂ ᠮᠠᠨᠠᠭᠤᠯ ᠪᠤᠰᠬᠠᠬᠤ᠂ ᠬᠠᠳᠣᠬᠤ᠂ ᠬᠤᠷᠢᠶᠠᠬᠤ ᠵᠡᠷᠭᠡ ᠶᠢᠨ ᠠᠯᠬᠤᠮ ᠢ ᠦᠡᠭᠭᠡᠷᠡᠭᠡᠳᠡᠭ ᠶᠣᠮ᠃      ᠭᠠᠵᠠᠷ ᠭᠠᠷᠭᠠᠬᠤ᠃ ᠭᠠᠵᠠᠷ ᠭᠠᠷᠭᠠᠬᠤ ᠭᠡᠳᠡᠭ ᠨᠢ ᠲᠠᠷᠢᠶᠠᠴᠢᠳ ᠠᠴᠠ ᠨᠠᠷᠢᠮᠣ ᠲᠠᠷᠢᠬᠤ ᠳᠤ ᠲᠣᠬᠢᠷᠠᠬᠤ ᠭᠠᠵᠠᠷ ᠢᠶᠠᠨ ᠰᠣᠩᠭᠤᠵᠦ ᠲᠣᠬᠳᠠᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠵᠦ ᠭᠠᠵᠠᠷ ᠢᠶᠠᠨ ᠣᠷᠪᠠᠭᠤᠯᠬᠤ ᠵᠦᠭᠡᠯᠡᠷᠡᠭᠦᠯᠬᠦ ᠶᠢ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ᠬᠤᠷᠴᠢᠨ ᠳᠤ ᠣᠣᠯ ᠳᠠᠭᠠᠨ ᠶᠠᠮᠠᠷ ᠴᠦ ᠲᠠᠷᠢᠶ᠎ᠠ ᠲᠠᠷᠢᠵᠦ ᠦᠡᠭᠭᠡᠷᠡᠭᠰᠡᠨ ᠦᠭᠡᠢ ᠭᠠᠵᠠᠷ ᠢ ᠰᠢᠨ᠎ᠡ ᠪᠠᠷ ᠡᠪᠳᠡᠵᠦ ᠲᠠᠷᠢᠶ᠎ᠠ ᠭᠠᠷᠭᠠᠬᠤ ᠶᠢ ᠪᠠᠰᠠ ᠭᠠᠵᠠᠷ ᠭᠠᠷᠭᠠᠬᠤ ᠭᠡᠵᠦ ᠬᠡᠯᠡᠳᠡᠭ᠃ ᠭᠠᠵᠠᠷ ᠭᠠᠷᠭᠠᠬᠤ ᠳᠤ ᠶᠡᠷᠦ ᠳᠡᠭᠡᠨ ᠬᠤᠶᠠᠷ ᠣᠳᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠳᠡᠭ᠃ ᠲᠦᠷᠦᠭᠦᠦ ᠣᠳᠠᠭ᠎ᠠ ᠨᠢ ᠬᠦᠷᠦᠰᠦ ᠵᠣᠵᠠᠭᠠᠨ ᠪᠣᠶᠣ ᠡᠪᠡᠰᠦ ᠢᠬᠴᠤ ᠰᠠᠬᠤᠯᠢᠬ ᠭᠠᠵᠠᠷ ᠢ ᠠᠨᠵᠢᠰᠦ ᠪᠠᠷ ᠬᠦᠷᠪᠡᠭᠦᠯᠵᠦ ᠡᠪᠡᠰᠦ ᠶᠢ ᠨᠢ ᠬᠦᠷᠦᠰᠣᠨ ᠲᠣᠣᠷ᠎ᠠ ᠨᠢ ᠲᠠᠷᠣᠵᠦ ᠲᠠᠯᠪᠢᠨ᠎ᠠ᠃ ᠬᠦᠷᠦᠰᠦᠨ ᠳᠤ ᠪᠣᠯᠠᠬᠳᠠᠬᠰᠠᠨ ᠡᠪᠡᠰᠦ ᠨᠢ ᠠᠮᠠᠷᠬᠠᠨ ᠦᠦᠵᠦ ᠢᠯᠵᠢᠷᠡᠭᠡᠳ ᠲᠠᠷᠢᠶᠠᠨ ᠳᠤ ᠪᠣᠷᠳᠣᠭᠤᠷ ᠪᠣᠯᠬᠤ ᠮᠦᠷᠳᠡᠭᠡᠨ ᠲᠠᠷᠢᠬᠰᠠᠨ ᠲᠠᠷᠢᠶ᠎ᠠ ᠳᠤ ᠪᠣᠵᠠᠷ ᠡᠪᠡᠰᠦ ᠴᠦᠬᠡᠨ ᠣᠷᠭᠤᠳᠠᠬ ᠶᠣᠮ ᠭᠡᠨ᠎ᠡ᠃ ᠲᠦᠷᠦᠭᠦᠦ ᠣᠳᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠭᠡᠳ ᠬᠡᠰᠡᠭ ᠬᠤᠭᠤᠴᠠᠭ᠎ᠠ ᠦᠡᠭᠭᠡᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠬᠤᠶᠠᠳᠣᠭᠠᠷ ᠣᠳᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠳᠡᠭ᠃ ᠡᠭᠦᠨ ᠢᠶᠠᠨ ᠬᠤᠷᠴᠢᠨᠴᠣᠳ ︽ᠭᠠᠵᠠᠷ ᠲᠠᠬᠢᠬᠤ︾ ᠭᠡᠵᠦ ᠬᠡᠯᠡᠳᠡᠭ᠃ ᠭᠠᠵᠠᠷ ᠲᠠᠬᠢᠬᠤ ᠭᠡᠳᠡᠭ ᠨᠢ ᠲᠠᠬᠢᠭᠠᠳ ᠪᠠᠰᠠ ᠨᠢᠭᠡ ᠣᠳᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠯ᠎ᠡ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠦᠭᠡ ᠶᠣᠮ᠃ ᠬᠤᠶᠠᠳᠣᠭᠠᠷ ᠣᠳᠠᠭ᠎ᠠ ᠠᠨᠵᠢᠰᠣ ᠬᠦᠳᠡᠯᠭᠡᠬᠦ ᠨᠢ ᠬᠠᠳᠠᠭᠤ ᠬᠦᠷᠦᠰᠣ ᠲᠠᠢ ᠭᠠᠵᠠᠷ ᠢ ᠵᠦᠭᠡᠯᠡᠷᠡᠭᠦᠯᠵᠦ ᠪᠣᠯᠪᠠᠰᠣᠷᠠᠭᠤᠯᠬᠤ ᠳᠤ ᠠᠰᠢᠬᠳᠠᠢ᠃      ᠲᠠᠷᠢᠬᠤ᠃ ᠨᠠᠷᠢᠮᠣ ᠶᠢᠨ ᠲᠠᠷᠢᠶᠠᠨ ᠤ ᠵᠢᠷᠤᠬ᠎ᠠ ᠶᠢᠨ ᠬᠤᠭᠤᠷᠣᠨᠳᠣᠬᠢ ᠵᠠᠢ ᠶᠢ ᠡᠩ ᠤᠨ ᠪᠠᠶᠢᠳᠠᠯ ᠳᠤ ᠦᠷᠭᠡᠨ ᠰᠢᠭ ᠪᠠᠶᠢᠯᠭᠠᠳᠠᠬ ᠶᠣᠮ᠃ ᠠᠨᠵᠢᠰᠣ ᠬᠦᠯᠭᠡ ᠵᠢᠷᠤᠬ᠎ᠠ ᠭᠠᠷᠭᠠᠵᠦ ᠡᠬᠢᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠬᠤᠶᠢᠨ᠎ᠠ ᠠᠴᠠ ᠨᠢ ᠨᠢᠭᠡ ᠬᠦᠮᠦᠨ ᠦᠷ᠎ᠡ ᠬᠠᠶᠠᠳᠠᠬ᠃ ᠨᠠᠷᠢᠮᠣ ᠶᠢᠨ ᠦᠷ᠎ᠡ ᠶᠢ ᠬᠠᠶᠠᠬᠤ ᠳᠤ ᠲᠣᠬᠰᠢᠭᠤᠷ ᠬᠤᠯᠣ ᠬᠡᠷᠡᠭᠰᠡᠳᠡᠭ ᠶᠣᠮ᠃ ᠲᠣᠬᠰᠢᠭᠤᠷ ᠬᠤᠯᠣ ᠪᠠᠷ ᠦᠷ᠎ᠡ ᠬᠠᠶᠠᠬᠤ ᠳᠤ ᠲᠣᠬᠰᠢᠬᠤ ᠮᠡᠷᠭᠡᠵᠢᠯ ᠨᠢ ᠲᠦᠢᠯ ᠤᠨ ᠴᠢᠬᠤᠯᠠ ᠪᠠᠶᠢᠳᠠᠬ᠃ ᠦᠷ᠎ᠡ ᠬᠠᠶᠠᠬᠴᠢ ᠵᠠᠪᠠᠯ ᠵᠢᠷᠤᠬ᠎ᠠ ᠶᠢ ᠲᠠᠭᠠᠵᠦ ᠠᠯᠬᠤᠬᠤ ᠶᠢᠨ ᠲᠠᠭᠠᠣ ᠮᠦᠷᠦᠪᠴᠢᠯᠡᠵᠦ ᠪᠠᠶᠢᠭ᠎ᠠ ᠲᠣᠬᠰᠢᠭᠤᠷ ᠬᠤᠯᠣ ᠪᠠᠨ ᠲᠣᠬᠰᠢᠭᠤᠷ ᠮᠣᠳᠣ ᠪᠠᠷ ᠵᠢᠭᠳᠡ ᠠᠶᠢᠵᠠᠮ ᠲᠠᠢ ᠪᠠᠷ ᠲᠣᠬᠰᠢᠵᠦ ᠦᠷ᠎ᠡ ᠶᠢ ᠨᠢ ᠵᠢᠭᠳᠡ ᠲᠡᠩ ᠲᠠᠢ ᠬᠠᠶᠠᠬᠤ ᠬᠡᠷᠡᠭᠳᠡᠢ᠃ ᠬᠡᠷᠪᠡ ᠬᠡᠳᠦᠷᠬᠡᠢ ᠣᠳᠠᠭᠠᠨ ᠲᠣᠬᠰᠢᠪᠠᠯ ᠦᠷ᠎ᠡ ᠰᠡᠶᠢᠷᠡᠭ ᠲᠣᠰᠴᠦ ᠨᠠᠷᠢᠮᠣ ᠶᠢᠨ ᠦᠵᠦᠭ ᠰᠢᠩᠭᠡᠨ ᠪᠣᠯᠵᠦ᠂ ᠬᠡᠳᠦᠷᠬᠡᠢ ᠬᠤᠷᠳᠣᠨ ᠲᠣᠬᠰᠢᠪᠠᠯ ᠦᠷ᠎ᠡ ᠨᠢ ᠬᠤᠷᠳᠣᠨ ᠢᠶᠠᠷ ᠰᠠᠳᠠᠷᠠᠨ ᠲᠣᠰᠣᠭᠠᠳ ᠨᠠᠷᠢᠮᠣ ᠶᠢᠨ ᠦᠵᠦᠭ ᠵᠣᠵᠠᠭᠠᠨ ᠪᠣᠯᠬᠤ ᠠᠶᠣᠯᠳᠠᠢ ᠶᠣᠮ᠃ ᠨᠠᠷᠢᠮᠣ ᠶᠢᠨ ᠦᠵᠦᠭ ᠤᠨ ᠵᠣᠵᠠᠭᠠᠨ ᠰᠢᠩᠭᠡᠨ ᠨᠢ ᠨᠠᠷᠢᠮᠣ ᠶᠢᠨ ᠲᠠᠷᠢᠶ᠎ᠠ ᠶᠢᠨ ᠣᠨᠠᠯᠳᠠ ᠶᠢ ᠰᠢᠭᠤᠳ ᠨᠦᠯᠦᠭᠡᠯᠡᠳᠡᠭ ᠪᠣᠯᠬᠤᠷ ᠦᠷ᠎ᠡ ᠬᠠᠶᠠᠬᠴᠢ ᠠᠴᠠ ᠲᠣᠰ ᠡᠳᠦᠷ ᠤᠨ ᠢᠶᠠᠨ ᠰᠠᠯᠬᠢ ᠵᠢᠪᠠᠷ ᠤᠨ ᠬᠦᠴᠦᠳᠡᠢ ᠰᠣᠯᠠᠬᠠᠨ ᠪᠠᠶᠢᠬᠤ ᠡᠰᠡᠬᠦ ᠶᠢ ᠴᠦ ᠠᠩᠬᠠᠷᠬᠤ ᠴᠢᠬᠤᠯᠠᠲᠠᠢ ᠪᠠᠶᠢᠳᠠᠬ ᠃ ᠦᠷ᠎ᠡ ᠬᠠᠶᠠᠬᠴᠢ ᠠᠴᠠ ᠪᠠᠰᠠ ᠴᠢᠷᠦᠭᠦᠯ ᠲᠠᠳᠠᠵᠦ ᠬᠠᠶᠠᠬᠰᠠᠨ ᠦᠷ᠎ᠡ ᠪᠠᠨ ᠰᠢᠷᠣᠢ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠨ᠎ᠠ᠃ ᠣᠯᠠᠩᠬᠢ ᠲᠠᠷᠢᠶᠠᠴᠢᠨ ᠠᠴᠠ ᠪᠠᠰᠠ ᠴᠢᠷᠦᠭᠦᠯ ᠢᠶᠠᠷ ᠦᠷ᠎ᠡ ᠪᠠᠨ ᠲᠠᠷᠣᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠡᠯᠵᠢᠭᠡ ᠪᠠᠨ ᠪᠣᠯᠣ ᠳᠤ ᠬᠦᠯᠦᠵᠦ ᠵᠢᠷᠤᠬ᠎ᠠ ᠲᠠᠷᠠᠭᠠᠯᠠᠨ ᠶᠠᠪᠣᠭᠤᠯᠳᠠᠬ ᠶᠣᠮ᠃      ᠠᠷᠴᠢᠬᠤ᠃ ᠲᠠᠷᠢᠶᠠᠨ ᠴᠢᠬᠢ ᠣᠷᠭᠤᠭᠠᠳ ᠲᠠᠯᠠᠩ ᠲᠠᠪᠠᠭ᠋ᠣ ᠦᠶᠡᠰ ᠠᠷᠴᠢᠬᠤ ᠬᠡᠷᠡᠭᠳᠡᠢ ᠪᠣᠯᠳᠠᠬ᠃ ᠣᠯᠠᠩᠬᠢ ᠲᠠᠷᠢᠶᠠᠴᠢᠨ ᠠᠴᠠ ᠨᠠᠷᠢᠮᠣ ᠶᠢ ᠬᠤᠶᠠᠷ ᠣᠳᠠᠭ᠎ᠠ ᠠᠷᠴᠢᠳᠠᠬ ᠶᠣᠮ᠃ ᠠᠵᠢᠯ ᠳᠠᠭᠠᠨ ᠰᠠᠶᠢᠨ ᠲᠠᠷᠢᠶᠠᠴᠢᠳ ᠪᠠᠰᠠ ᠭᠤᠷᠪᠠ ᠣᠳᠠᠭ᠎ᠠ ᠠᠷᠴᠢᠳᠠᠬ ᠴᠦ ᠪᠣᠢ᠃ ᠠᠷᠴᠢᠬᠤ ᠨᠢ ᠪᠣᠵᠠᠷ ᠡᠪᠡᠰᠦ ᠶᠢ ᠠᠯᠠᠬᠤ᠂ ᠬᠦᠷᠦᠰᠦ ᠰᠢᠷᠣᠢ ᠶᠢ ᠵᠦᠭᠡᠯᠡᠷᠡᠭᠦᠯᠬᠦ᠂ ᠲᠠᠷᠢᠶᠠᠨ ᠴᠢᠬᠢ ᠶᠢ ᠵᠣᠬᠢᠴᠠᠭᠤᠯᠬᠤ ᠵᠡᠷᠭᠡ ᠮᠠᠰᠢ ᠴᠢᠬᠤᠯᠠ ᠦᠢᠯᠡᠳᠦᠯ ᠲᠠᠢ ᠶᠣᠮ᠃ ᠨᠠᠷᠢᠮᠣ ᠶᠢ ᠲᠦᠷᠦᠭᠦᠣ ᠣᠳᠠᠭ᠎ᠠ ᠠᠷᠴᠢᠬᠤ ᠳᠤ ᠪᠣᠵᠠᠷ ᠡᠪᠡᠰᠦ ᠶᠢ ᠨᠢ ᠠᠯᠠᠵᠦ ᠠᠷᠢᠯᠭᠠᠬᠤ ᠶᠢᠨ ᠬᠠᠮᠳᠦ ᠵᠢᠷᠤᠬ᠎ᠠ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠲᠠᠯᠠᠩ ᠤᠨ ᠰᠢᠷᠣᠢ ᠶᠢ ᠠᠷᠴᠢᠭᠤᠷ ᠢᠶᠠᠷ ᠵᠢᠷᠤᠬ᠎ᠠ ᠣᠷᠣᠭᠤ ᠲᠡᠭᠰᠢᠯᠡᠨ ᠲᠠᠳᠠᠵᠦ ᠬᠠᠳᠠᠭᠤ ᠬᠦᠷᠦᠰᠦ ᠶᠢ ᠨᠢ ᠴᠣᠬᠢᠵᠦ ᠪᠠᠯᠪᠠᠯᠣᠨ᠎ᠠ᠃ ᠬᠤᠶᠠᠳᠣᠭᠠᠷ ᠣᠳᠠᠭ᠎ᠠ ᠠᠷᠴᠢᠬᠤ ᠳᠤ ᠪᠣᠵᠠᠷ ᠡᠪᠡᠰᠦ ᠶᠢ ᠨᠢ ᠠᠷᠴᠢᠭᠤᠷ ᠢᠶᠠᠷ ᠠᠯᠠᠬᠤ ᠶᠢᠨ ᠬᠠᠮᠳᠦ ᠵᠣᠵᠠᠭᠠᠨ ᠣᠷᠭᠤᠬᠰᠠᠨ ᠴᠢᠬᠢ ᠶᠢ ᠦᠭᠳᠡᠭᠡᠨ ᠰᠢᠩᠭᠡᠯᠡᠵᠦ ᠲᠣᠬᠢᠷᠠᠭᠤᠯᠣᠨ ᠲᠣᠬᠳᠠᠭᠠᠨ᠎ᠠ᠃ ᠵᠠᠷᠢᠮ ᠭᠠᠵᠠᠷ ᠭᠤᠷᠪᠠᠳᠣᠭᠠᠷ ᠣᠳᠠᠭ᠎ᠠ ᠠᠷᠴᠢᠳᠠᠬ ᠪᠣᠯᠪᠠᠴᠦ ᠣᠯᠠᠩᠬᠢ ᠭᠠᠵᠠᠷ ᠭᠤᠷᠪᠠᠨ ᠵᠢᠵᠢᠭ ᠬᠤᠰᠢᠭᠤ ᠲᠠᠢ ᠠᠨᠵᠢᠰᠣ ᠬᠦᠳᠡᠯᠭᠡᠵᠦ ᠲᠠᠷᠢᠶᠠᠨ ᠴᠢᠬᠢᠨ ᠳᠤ ᠲᠠᠯᠠᠩ ᠤᠨ ᠰᠢᠷᠣᠢ ᠶᠢ ᠪᠠᠭᠤᠯᠭᠠᠳᠠᠬ ᠶᠣᠮ᠃      ᠲᠠᠩᠨᠠᠬᠤ᠃ ᠲᠠᠷᠢᠶ᠎ᠠ ᠣᠷᠭᠤᠭᠠᠳ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠳᠤ ᠬᠦᠷᠪᠡᠯ ᠬᠦᠷᠣᠰᠦᠨ ᠤ ᠰᠢᠮ᠎ᠡ ᠲᠣᠳᠠᠬᠳᠠᠳᠠᠬ ᠠᠴᠠ ᠴᠢᠬᠢᠨ ᠳᠤᠨᠢ ᠬᠦᠢᠴᠡᠳ ᠬᠦᠷᠦᠰᠦ ᠬᠦᠷᠭᠡᠬᠦ ᠴᠢᠬᠤᠯᠠᠲᠠᠢ ᠪᠠᠶᠢᠳᠠᠬ᠃ ᠨᠠᠷᠢᠮᠣ ᠨᠢ ᠲᠣᠬᠤᠢ ᠵᠠᠪᠳᠣᠭᠤ ᠣᠷᠭᠤᠬᠤ ᠬᠢᠷᠢ ᠪᠠᠷ ᠲᠠᠩᠨᠠᠵᠦ ᠡᠬᠢᠯᠡᠳᠡᠭ ᠶᠣᠮ᠃ ᠨᠠᠷᠢᠮᠣ ᠲᠠᠩᠨᠠᠬᠤ ᠳᠤ ᠲᠠᠷᠢᠶᠠᠴᠢᠳ ᠠᠴᠠ ᠲᠠᠩᠨᠠᠭᠤᠷ ᠤᠨ ᠠᠨᠵᠢᠰᠣ ᠭᠡᠵᠦ ᠲᠣᠰᠬᠠᠢ ᠪᠡᠯᠡᠳᠭᠡᠳᠡᠭ᠃ ᠲᠠᠩᠨᠠᠭᠤᠷ ᠤᠨ ᠠᠨᠵᠢᠰᠣ ᠨᠢ ᠵᠢᠷᠤᠬ᠎ᠠ ᠶᠢᠨ ᠬᠤᠭᠤᠷᠤᠨᠳᠣᠬᠢ ᠲᠠᠯᠠᠩ ᠢ ᠬᠠᠭᠠᠯᠪᠣᠷᠢᠯᠠᠵᠦ ᠰᠢᠷᠣᠢ ᠶᠢ ᠨᠢ ᠭᠠᠳᠠᠬᠰᠢ ᠢᠷᠠᠭᠠᠳ ᠲᠠᠷᠢᠶᠠᠨ ᠴᠢᠬᠢᠨ ᠳᠤ ᠬᠦᠷᠭᠡᠳᠡᠭ ᠶᠣᠮ᠃ ᠣᠳᠣᠬᠠᠨ ᠳᠤ ᠵᠠᠷᠢᠮ ᠲᠠᠷᠢᠶᠠᠴᠢᠳ ᠠᠴᠠ ᠲᠠᠷᠢᠶᠠᠨ ᠴᠢᠬᠢᠨ ᠳᠡᠭᠡᠨ ᠬᠢᠮᠢ ᠶᠢᠨ ᠪᠣᠷᠳᠣᠭᠤᠷ ᠬᠦᠷᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠲᠠᠩᠨᠠᠭᠤᠷ ᠤᠨ ᠠᠨᠵᠢᠰᠣ ᠬᠦᠳᠡᠯᠭᠡᠵᠦ ᠬᠢᠮᠢ ᠶᠢᠨ ᠪᠣᠷᠳᠣᠭᠤᠷ ᠢᠶᠠᠨ ᠬᠦᠷᠦᠰᠦ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠬᠤ ᠪᠣᠯᠵᠠᠢ᠃      ᠮᠠᠨᠠᠭᠤᠯ ᠪᠣᠰᠬᠠᠬᠤ᠃ ᠨᠠᠮᠣᠷ ᠨᠠᠷᠢᠮᠣ ᠶᠢᠨ ᠲᠠᠷᠢᠶ᠎ᠡ ᠦᠷᠡᠯᠡᠵᠦ ᠡᠬᠢᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠪᠢᠯᠵᠣᠣᠬᠠᠢ ᠪᠣᠯᠵᠣᠮᠣᠷ ᠣᠯᠠᠨ ᠴᠣᠬᠯᠠᠷᠠᠵᠦ ᠨᠠᠷᠢᠮᠣ ᠶᠢᠨ ᠪᠣᠳᠠᠭ᠎ᠠ ᠶᠢ ᠨᠢ ᠢᠳᠡᠵᠦ ᠰᠦᠢᠳᠭᠡᠳᠡᠭ ᠶᠣᠮ᠃ ᠡᠨᠡ ᠦᠶᠡᠰ ᠮᠣᠳᠣ ᠪᠣᠶᠣ ᠡᠪᠡᠰᠦ ᠪᠠᠷ ᠮᠠᠨᠠᠭᠤᠯ ᠪᠣᠰᠬᠠᠵᠦ ᠲᠡᠭᠡᠷ᠎ᠡ ᠨᠢ ᠮᠠᠯᠠᠭᠠᠢ ᠬᠤᠪᠴᠠᠰᠤ ᠡᠮᠦᠰᠭᠡᠭᠡᠳ ᠪᠢᠯᠵᠣᠣᠬᠠᠢ ᠶᠢ ᠦᠷᠭᠦᠭᠡᠨ ᠠᠶᠣᠯᠭᠠᠳᠠᠬ᠃      ᠬᠠᠳᠣᠬᠤ᠃ ᠨᠠᠮᠣᠷ ᠴᠠᠬ ᠪᠣᠯᠣᠭᠠᠳ ᠨᠠᠷᠢᠮᠣ ᠭᠦᠢᠴᠡᠳ ᠪᠣᠯᠪᠠᠰᠣᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠬᠠᠳᠣᠬᠤ ᠠᠵᠢᠯ ᠡᠬᠢᠯᠡᠳᠡᠭ᠃ ᠨᠠᠷᠢᠮᠣ ᠶᠢ ᠵᠢᠷᠤᠬᠠᠯᠠᠨ ᠬᠠᠳᠣᠬᠤ ᠪᠣᠯᠣᠨ ᠬᠦᠵᠦᠭᠦᠳᠡᠨ ᠬᠠᠳᠣᠬᠤ ᠭᠡᠳᠡᠭ ᠬᠤᠶᠠᠷ ᠵᠦᠢᠯ ᠤᠨ ᠬᠠᠳᠣᠬᠤ ᠠᠷᠭ᠎ᠠ ᠪᠠᠶᠢᠳᠠᠬ᠃ ᠬᠤᠷᠴᠢᠨᠴᠣᠳ ᠨᠠᠷᠢᠮᠣ ᠶᠢ ᠭᠤᠬᠢᠭᠠᠷ ᠬᠠᠳᠣᠭᠤᠷ ᠢᠶᠠᠷ ᠬᠠᠳᠣᠳᠠᠬ ᠶᠣᠮ᠃ ᠬᠦᠵᠦᠭᠦᠳᠡᠵᠦ ᠬᠠᠳᠣᠬᠤ ᠭᠡᠳᠡᠭ ᠨᠢ ᠨᠠᠷᠢᠮᠣ ᠶᠢᠨ ᠲᠣᠯᠣᠭᠠᠢ ᠪᠣᠯᠣᠨ ᠰᠦᠷᠡᠯ ᠤᠨ ᠠᠭᠤᠯᠵᠠᠷ ᠢᠶᠠᠷ ᠬᠠᠳᠣᠨ ᠠᠪᠴᠦ ᠲᠣᠯᠣᠭᠠᠢ ᠶᠢ ᠨᠢ ᠬᠤᠷᠢᠶᠠᠨ ᠠᠪᠬᠤ ᠠᠷᠭ᠎ᠠ ᠪᠣᠯᠣᠨ᠎ᠠ᠃ ᠡᠨᠡ ᠬᠦ ᠠᠷᠭ᠎ᠠ ᠪᠠᠷ ᠬᠠᠳᠣᠵᠦ ᠠᠪᠣᠬᠰᠠᠨ ᠨᠠᠷᠢᠮᠣ ᠶᠢᠨ ᠪᠣᠳᠠᠭ᠎ᠠ ᠶᠢ ᠨᠢ ᠣᠨᠠᠭᠠᠵᠦ ᠠᠪᠬᠤ ᠳᠤ ᠰᠦᠷᠡᠯ ᠲᠠᠢ ᠨᠠᠷᠢᠮᠣ ᠶᠢ ᠣᠨᠠᠭᠠᠬᠤ ᠠᠴᠠ ᠬᠢᠯᠪᠠᠷᠬᠠᠨ ᠰᠢᠬ ᠪᠠᠶᠢᠳᠠᠬ᠃ ᠬᠤᠷᠴᠢᠨᠴᠣᠳ ᠤᠨ ᠲᠣᠮᠳᠠ ᠨᠠᠷᠢᠮᠣ ᠶᠢ ᠬᠦᠵᠦᠭᠦᠳᠡᠵᠦ ᠬᠠᠳᠣᠭᠠᠳ ᠡᠯᠵᠢᠭᠡ ᠪᠠᠷ ᠠᠶᠠᠯᠠᠵᠦ ᠪᠠᠶᠢᠭ᠎ᠠ ᠬᠦᠮᠦᠨ ᠲᠠᠢ ᠵᠣᠭᠤᠬ ᠬᠡᠯᠡᠯᠴᠡᠭᠡᠳ ᠱᠠᠩ ᠤᠨ ᠦᠵᠦᠭᠦᠷ ᠭᠠᠷᠴᠢᠬᠠᠬᠤ ᠲᠣᠬᠠᠢ ᠶᠠᠷᠢᠶ᠎ᠠ ᠬᠡᠯᠡᠯᠴᠡᠭᠡ ᠴᠦ ᠪᠠᠶᠢᠳᠠᠬ᠃ ᠵᠢᠷᠤᠬᠠᠯᠠᠵᠦ ᠬᠠᠳᠣᠬᠤ ᠭᠡᠳᠡᠭ ᠨᠢ ᠨᠢᠭᠡ ᠬᠦᠮᠦᠨ ᠨᠠᠷᠢᠮᠣ ᠶᠢᠨ ᠲᠠᠷᠢᠶ᠎ᠠ ᠶᠢᠨ ᠲᠣᠮᠳᠠᠭᠤᠷ ᠭᠤᠣᠯ ᠴᠣᠭᠤᠯᠵᠦ ᠬᠠᠳᠣᠵᠦ ᠣᠷᠣᠭᠠᠳ ᠬᠤᠶᠠᠷ ᠬᠦᠮᠦᠨ ᠬᠤᠶᠠᠷ ᠬᠠᠵᠠᠭᠤ ᠪᠠᠷ ᠨᠢ ᠲᠠᠷᠠᠭᠠᠯᠠᠨ ᠬᠠᠳᠣᠬᠤ ᠠᠷᠭ᠎ᠠ ᠪᠣᠯᠣᠨ᠎ᠠ᠃ ᠨᠠᠷᠢᠮᠣ ᠶᠢ ᠰᠦᠷᠡᠯ ᠲᠠᠢ ᠨᠢ ᠬᠠᠳᠣᠬᠤ ᠨᠢ ᠬᠦᠵᠦᠭᠦᠳᠡᠵᠦ ᠬᠠᠳᠣᠬᠤ ᠶᠢ ᠪᠣᠳᠣᠪᠠᠯ ᠢᠯᠡᠭᠦᠦ ᠪᠦᠬᠦ᠋ᠢᠵᠦ ᠭᠠᠷ ᠤᠨ ᠬᠦᠴᠦ ᠢᠯᠡᠭᠦᠦ ᠬᠡᠷᠡᠭᠰᠡᠳᠡᠭ ᠠᠴᠠ ᠶᠠᠳᠠᠷᠠᠬᠤ ᠨᠢ ᠢᠯᠡᠭᠦᠦ ᠰᠢᠭ ᠮᠦᠷᠳᠡᠭᠡᠨ ᠪᠣᠳᠠᠭ᠎ᠠ ᠶᠢ ᠨᠢ ᠣᠨᠠᠭᠠᠬᠤ ᠳᠤ ᠴᠦ ᠶᠠᠷᠰᠢᠬ ᠰᠢᠬ ᠪᠠᠶᠢᠳᠠᠬ᠃ ᠭᠡᠪᠡᠴᠦ ᠨᠠᠷᠢᠮᠣ ᠶᠢ ᠡᠰᠢ ᠰᠦᠷᠡᠯ ᠲᠠᠢ ᠨᠢ ᠬᠤᠷᠢᠶᠠᠵᠦ ᠠᠪᠳᠠᠬ ᠨᠢ ᠡᠰᠢ ᠰᠦᠷᠡᠯ ᠢ ᠨᠢ ᠴᠦ ᠠᠮᠢᠳᠣᠷᠠᠯ ᠤᠨ ᠬᠡᠷᠡᠭᠯᠡᠭᠡᠨ ᠳᠤ ᠣᠷᠣᠭᠤᠯᠵᠦ ᠪᠣᠯᠳᠠᠬ᠃      ᠦᠳᠦᠷᠮᠡᠯᠡᠬᠦ᠃ ᠬᠠᠳᠣᠬᠰᠠᠨ ᠨᠠᠷᠢᠮᠣ ᠶᠢ ᠦᠳᠦᠷᠮᠡᠯᠡᠬᠦ ᠳᠤ ᠲᠡᠭᠡᠭᠡᠬᠦ ᠪᠠ ᠦᠳᠦᠷᠮᠡᠯᠡᠬᠦ ᠭᠡᠬᠦ ᠬᠤᠶᠠᠷ ᠠᠯᠬᠤᠮ ᠢᠶᠠᠷ ᠶᠠᠪᠣᠬᠳᠠᠳᠠᠬ ᠶᠣᠮ᠃ ᠬᠠᠳᠣᠬᠰᠠᠨ ᠨᠠᠷᠢᠮᠣ ᠭᠦᠢᠴᠡᠳ ᠬᠠᠳᠠᠬᠰᠠᠨ ᠤ ᠲᠠᠷᠠᠭ᠎ᠠ ᠪᠣᠭᠤᠵᠢᠯᠠᠭᠠᠳ ᠲᠡᠷᠭᠡᠨ ᠲᠡᠭᠡᠷ᠎ᠡ ᠲᠣᠯᠣᠭᠠᠢ ᠶᠢ ᠨᠢ ᠲᠣᠳᠣᠬᠰᠢ ᠬᠠᠨᠳᠣᠭᠤᠯᠵᠦ ᠲᠡᠭᠡᠭᠡᠨ᠎ᠡ᠃ ᠲᠡᠷᠭᠡ ᠶᠢᠨ ᠬᠤᠶᠠᠷ ᠬᠠᠵᠠᠭᠤ ᠪᠠᠷ ᠨᠠᠷᠢᠮᠣ ᠶᠢᠨ ᠡᠰᠢ ᠶᠢ ᠭᠠᠳᠠᠬᠰᠢ ᠬᠠᠨᠳᠣᠭᠤᠯᠵᠦ ᠲᠣᠯᠣᠭᠠᠢ ᠶᠢ ᠨᠢ ᠲᠣᠳᠣᠬᠰᠢ ᠬᠠᠨᠳᠣᠭᠤᠯᠵᠦ ᠨᠢᠭᠡ ᠮᠦᠷ ᠲᠡᠭᠰᠢᠯᠡᠵᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠨᠠᠷᠢᠮᠣ ᠶᠢᠨ ᠠᠭᠤᠯᠵᠠᠷ ᠢ ᠪᠠᠰᠠ ᠨᠢᠭᠡ ᠮᠦᠷ ᠨᠠᠷᠢᠮᠤ ᠶᠢᠨ ᠪᠤᠭᠤᠵᠢ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠨ᠎ᠡ᠃ ᠡᠭᠦᠨ ᠢᠶᠠᠨ ᠭᠤᠣᠯ ᠲᠠᠷᠣᠬᠤ ᠭᠡᠵᠦ ᠬᠡᠯᠡᠳᠡᠭ᠃ ᠡᠨᠡ ᠮᠡᠳᠦ ᠪᠠᠷ ᠬᠡᠳᠦᠨ ᠮᠦᠷ ᠲᠡᠭᠡᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠲᠡᠷᠭᠡ ᠲᠦᠭᠦᠷᠳᠡᠭ ᠶᠣᠮ᠃ ᠬᠠᠰᠢᠷ ᠲᠠᠷᠢᠶᠠᠴᠢᠳ ᠤᠨ ᠬᠠᠭᠤᠴᠢᠯᠠᠬᠰᠠᠨ ᠢᠶᠠᠷ ᠪᠣᠯ ᠲᠦᠷᠪᠡ ᠬᠦᠯᠦᠭᠰᠡᠨ ᠬᠠᠰᠠᠬ ᠲᠡᠷᠭᠡ ᠨᠢ 70 ᠠᠴᠠ 110 ᠪᠣᠭᠤᠵᠢ ᠣᠷᠴᠢᠮ ᠨᠠᠷᠢᠮᠣ ᠲᠡᠭᠡᠭᠡᠵᠦ ᠲᠡᠶᠢᠯᠳᠡᠭ ᠶᠣᠮ ᠭᠡᠨ᠎ᠡ᠃ ᠣᠳᠣᠬᠠᠨ ᠳᠤ ᠮᠠᠰᠢᠨ ᠮᠧᠬᠠᠨᠢᠬ ᠬᠡᠷᠡᠭᠯᠡᠭᠰᠡᠨ ᠠᠴᠠ ᠡᠭᠦᠨ ᠠᠴᠠ ᠴᠦ ᠬᠤᠯᠠ ᠢᠯᠡᠭᠦᠦ ᠲᠡᠭᠡᠭᠡᠵᠦ ᠲᠡᠶᠢᠯᠬᠦ ᠪᠣᠯᠵᠠᠢ᠃ ᠲᠡᠭᠡᠭᠡᠭᠰᠡᠨ ᠨᠠᠷᠢᠮᠣ ᠪᠠᠨ ᠦᠳᠦᠷᠮ᠎ᠡ ᠳᠤ ᠬᠤᠷᠢᠶᠠᠬᠤ ᠳᠠᠭᠠᠨ ᠲᠣᠯᠣᠭᠠᠢ ᠶᠢ ᠨᠢ ᠲᠣᠳᠣᠬᠰᠢ ᠬᠠᠨᠳᠣᠭᠤᠯᠵᠦ ᠬᠤᠷᠢᠶᠠᠭᠠᠳ ᠣᠷᠣᠢ ᠶᠢ ᠨᠢ ᠨᠠᠷᠢᠮᠤ ᠶᠢᠨ ᠪᠤᠭᠤᠵᠢ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠨ᠎ᠡ᠃ ᠢᠡᠭᠭᠢᠵᠦ ᠬᠤᠷᠢᠶᠠᠪᠠᠯ ᠰᠢᠪᠠᠭᠤ ᠪᠣᠯᠵᠣᠮᠣᠷ ᠪᠣᠳᠠᠭ᠎ᠠ ᠶᠢ ᠨᠢ ᠰᠦᠢᠳᠭᠡᠬᠦ ᠨᠢ ᠪᠠᠭ᠎ᠠ ᠭᠡᠳᠡᠭ᠃      ᠨᠠᠷᠢᠮᠣ ᠶᠢ ᠦᠳᠦᠷᠮᠡᠨ ᠳᠤ ᠠᠪᠬᠤ      ᠨᠠᠷᠢᠮᠣ ᠶᠢ ᠦᠳᠦᠷᠮ᠎ᠡ ᠳᠤ ᠲᠡᠭᠡᠭᠡᠵᠦ ᠣᠷᠣᠭᠤᠯᠤᠭᠠᠳ ᠨᠠᠮᠣᠷ ᠤᠨ ᠬᠤᠷᠢᠶᠠᠯᠳᠠ ᠶᠢᠨ ᠠᠵᠢᠯ ᠨᠡᠯᠢᠶᠡᠳ ᠵᠦᠭᠰᠢᠷᠡᠨ᠂ ᠲᠡᠭᠡᠭᠡᠵᠦ ᠣᠷᠣᠭᠤᠯᠣᠬᠰᠠᠨ ᠲᠠᠷᠢᠶ᠎ᠠ ᠬᠠᠳᠠᠵᠦ ᠬᠠᠭᠤᠷᠠᠢ ᠪᠣᠯᠣᠬᠰᠠᠨ ᠤ ᠲᠠᠷᠠᠭ᠎ᠠ ᠦᠳᠦᠷᠮ᠎ᠡ ᠠᠪᠬᠤ ᠠᠵᠢᠯ ᠡᠬᠢᠯᠡᠳᠡᠭ᠃ ᠨᠠᠷᠢᠮᠣ ᠶᠢ ᠠᠪᠬᠤ ᠳᠤ ᠪᠣᠳᠠᠭ᠎ᠠ ᠰᠠᠯᠭᠠᠬᠤ᠂ ᠯᠠᠢ ᠰᠠᠶᠢᠵᠠᠳᠠᠬᠤ᠂ ᠡᠰᠢ ᠰᠦᠷᠡᠯ ᠢ ᠨᠢ ᠡᠳ᠋ᠰᠢᠭᠦᠯᠬᠦ ᠭᠡᠬᠦ ᠭᠤᠷᠪᠠᠨ ᠠᠯᠬᠤᠮ ᠢᠶᠠᠷ ᠶᠠᠪᠣᠬᠳᠠᠳᠠᠬ ᠶᠣᠮ᠃      ᠪᠣᠳᠠᠭ᠎ᠠ ᠰᠠᠯᠭᠠᠬᠤ᠃ ᠬᠦᠵᠦᠭᠦᠳᠡᠵᠦ ᠬᠠᠳᠣᠬᠰᠠᠨ ᠨᠠᠷᠢᠮᠣ ᠶᠢ ᠪᠣᠯ ᠵᠢᠭᠳᠡᠬᠡᠨ ᠲᠡᠪᠢᠰᠴᠦ ᠲᠠᠯᠪᠢᠭᠠᠳ ᠪᠣᠯᠣ ᠪᠠᠷ ᠪᠣᠯᠣᠳᠠᠵᠦ ᠣᠨᠠᠭᠠᠳᠠᠬ ᠶᠣᠮ᠃ ᠰᠦᠷᠡᠯ ᠲᠠᠢ ᠨᠢ ᠬᠠᠳᠣᠬᠰᠠᠨ ᠨᠠᠷᠢᠮᠣ ᠶᠢ ᠲᠣᠯᠣᠭᠠᠢ ᠶᠢ ᠨᠢ ᠲᠣᠳᠣᠬᠰᠢ ᠬᠠᠨᠳᠣᠭᠤᠯᠣᠨ ᠵᠢᠭᠳᠡᠬᠡᠨ ᠲᠠᠪᠢᠰᠴᠦ ᠲᠠᠯᠪᠢᠭᠠᠳ ᠲᠣᠯᠣᠭᠠᠢ ᠨᠡᠶᠢᠯᠡᠭᠰᠡᠨ ᠬᠡᠰᠡᠭ ᠢᠶᠠᠷ ᠨᠢ ᠪᠣᠯᠣ ᠭᠦᠶᠦᠯᠭᠡᠵᠦ ᠡᠰᠢ ᠰᠦᠷᠡᠯ ᠠᠴᠠ ᠨᠢ ᠰᠠᠯᠭᠠᠨ ᠣᠨᠠᠭᠠᠵᠦ ᠠᠪᠳᠠᠬ᠃ ᠵᠠᠷᠢᠮ ᠲᠠᠷᠢᠶᠠᠴᠢᠳ ᠪᠠᠰᠠ ᠦᠭᠡᠷ ᠪᠣᠶᠣ ᠮᠣᠷᠢ ᠶᠢ ᠬᠤᠯᠪᠣᠨ ᠬᠦᠳᠦᠯᠦᠭᠡᠳ ᠭᠢᠰᠭᠢᠭᠦᠯᠵᠦ ᠠᠪᠳᠠᠬ ᠴᠦ ᠪᠣᠢ᠃ ᠬᠡᠷᠪᠡ ᠲᠡᠪᠢᠰᠦᠭᠰᠡᠨ ᠲᠠᠷᠢᠶᠠᠨ ᠤ ᠬᠡᠪᠴᠢᠶ᠎ᠡ ᠨᠢ ᠪᠠᠭ᠎ᠠ ᠪᠣᠯ ᠬᠤᠶᠠᠷ ᠪᠣᠶᠣ ᠭᠤᠷᠪᠠᠨ ᠦᠬᠡᠷ ᠮᠣᠷᠢ ᠪᠠᠷ ᠭᠢᠰᠭᠢᠭᠦᠯᠵᠦ ᠠᠷᠪᠢᠨ ᠪᠣᠯ ᠨᠡᠩ ᠣᠯᠠᠨ ᠦᠬᠡᠷ ᠮᠣᠷᠢ ᠬᠡᠷᠡᠭᠰᠡᠳᠡᠭ ᠶᠣᠮ ᠃ ᠨᠠᠷᠢᠮᠣ ᠶᠢ ᠡᠰᠢ ᠰᠦᠷᠡᠯ ᠠᠴᠠ ᠨᠢ ᠰᠠᠯᠭᠠᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠵᠢᠪᠡᠷ ᠰᠠᠯᠬᠢᠨ ᠨᠢ ᠲᠣᠬᠢᠷᠠᠮᠵᠢᠳᠠᠢ ᠡᠳᠦᠷ ᠢ ᠰᠣᠩᠭᠤᠵᠦ ᠮᠣᠳᠣᠨ ᠬᠦᠷᠵᠡ ᠪᠠᠷ ᠬᠠᠶᠠᠵᠦ ᠪᠣᠳᠠᠭ᠎ᠠ ᠶᠢ ᠨᠢ ᠢᠯᠭᠠᠷᠠᠭᠤᠯᠵᠦ ᠠᠪᠳᠠᠬ᠃ ᠡᠭᠦᠨ ᠢ ᠪᠣᠳᠠᠭ᠎ᠠ ᠬᠡᠶᠢᠰᠭᠡᠬᠦ ᠭᠡᠨ᠎ᠡ᠃ ᠡᠭᠦᠨ ᠤ ᠲᠣᠬᠠᠢ ᠲᠣᠯᠭᠠᠭᠤᠷᠢ ᠠᠴᠠ᠄ ︽ᠡᠰᠢ ᠰᠦᠷᠡᠯ ᠠᠴᠠ ᠨᠢ ᠰᠠᠯᠭᠠᠬᠰᠠᠨ ᠨᠠᠷᠢᠮᠣ ᠪᠠᠨ ᠦᠳᠦᠷᠮ᠎ᠡ ᠶᠢᠨ ᠲᠣᠯᠢ ᠳᠤ ᠣᠪᠣᠭᠠᠯᠠᠵᠦ ᠲᠠᠯᠪᠢᠭᠠᠳ ᠲᠡᠮ ᠲᠠᠢ ᠰᠢᠭ ᠬᠦᠮᠦᠰ ᠨᠢ ᠮᠣᠳᠣᠨ ᠬᠦᠷᠵᠡ ᠪᠠᠷ ᠵᠢᠪᠠᠷ ᠦᠭᠡᠳᠡ ᠪᠣᠳᠠᠭ᠎ᠠ ᠪᠠᠨ ᠬᠠᠶᠠᠨ᠎ᠠ᠃ ᠪᠣᠳᠠᠭ᠎ᠠ ᠣᠷᠣᠬᠰᠠᠨ ᠢᠶᠠᠷ ᠰᠠᠶᠢᠨ ᠨᠠᠷᠢᠮᠣ ᠨᠢ ᠵᠢᠪᠠᠷ ᠤᠨ ᠲᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠲᠣᠰᠴᠦ᠂ ᠭᠡᠶᠢᠳᠡᠮ ᠴᠣᠣᠬᠠᠯ ᠪᠣᠶᠣ ᠬᠤᠬ ᠯᠠᠢ ᠨᠢ ᠵᠢᠪᠠᠷ ᠤᠨ ᠲᠣᠣᠷ᠎ᠠ ᠲᠠᠯ᠎ᠠ ᠳᠤ ᠪᠠᠭᠤᠳᠠᠬ᠃ᠡᠨᠡ ᠦᠶ᠎ᠡ ᠳᠤ ᠵᠢᠪᠠᠷ ᠤᠨ ᠲᠣᠣᠷ᠎ᠠ ᠲᠠᠯ᠎ᠠ ᠳᠤ ᠵᠣᠬᠰᠣᠵᠦ ᠪᠠᠶᠢᠭ᠎ᠠ ᠬᠦᠮᠦᠨ ᠠᠴᠠ ᠲᠣᠯᠣᠭᠠᠢ ᠪᠠᠨ ᠠᠯᠴᠢᠭᠤᠷ ᠢᠶᠠᠷ ᠣᠷᠢᠶᠠᠵᠦ᠂ ᠨᠠᠬᠢᠯᠵᠠᠭᠤᠷ ᠪᠣᠷᠭᠠᠰᠣᠨ ᠱᠦᠬᠦᠷ ᠢᠶᠠᠷ ᠪᠣᠳᠠᠭ᠎ᠠ ᠲᠠᠢ ᠬᠤᠯᠢᠯᠳᠣᠬᠰᠠᠨ ᠬᠤᠬ ᠯᠠᠢ ᠶᠢ ᠬᠦᠡᠭᠭᠡᠬᠡᠨ ᠰᠢᠭᠰᠢᠵᠦ ᠱᠦᠭᠦᠷᠳᠡᠨ᠎ᠡ᠃ ᠡᠭᠦᠨ ᠢᠶᠠᠨ ᠨᠠᠷᠢᠮᠣ ᠮᠦᠶᠡᠳᠡᠬᠦ ᠭᠡᠵᠦ ᠶᠠᠷᠢᠳᠠᠬ᠃ ᠬᠡᠷᠪᠡ ᠰᠠᠯᠬᠢ ᠪᠠ ᠬᠠᠶᠠᠬᠤ ᠬᠦᠮᠦᠨ ᠤ ᠭᠠᠷ ᠤᠨ ᠡᠪ ᠲᠠᠭᠠᠷᠠᠬᠰᠠᠨ ᠪᠠᠶᠢᠪᠠᠯ ᠭᠠᠭᠴᠠᠬᠠᠨ ᠣᠳᠠᠭ᠎ᠠ ᠳᠤ ᠪᠣᠳᠠᠭ᠎ᠠ ᠪᠠ ᠯᠠᠢ ᠨᠢ ᠢᠯᠭᠠᠷᠠᠴᠢᠬᠠᠳᠠᠬ ᠶᠣᠮ︾ ᠭᠡᠵᠡᠢ᠃ ᠨᠠᠷᠢᠮᠣ ᠶᠢᠨ ᠮᠦᠬᠦᠯᠢᠭ ᠨᠢ ᠵᠢᠵᠢᠭᠬᠡᠨ ᠪᠣᠯᠬᠤᠷ ᠮᠣᠩᠭᠤᠯ ᠠᠮᠣ ᠶᠢ ᠬᠠᠶᠠᠬᠤ ᠲᠠᠢ ᠬᠠᠷᠢᠴᠠᠭᠤᠯᠪᠠᠯ ᠨᠡᠩ ᠶᠡᠭᠡ ᠲᠡᠮ ᠬᠡᠷᠡᠭᠰᠡᠳᠡᠭ ᠶᠣᠮ᠃ ᠡᠶᠢᠮᠦ ᠠᠴᠠ ᠲᠠᠷᠢᠶᠠᠴᠢᠳ ᠨᠠᠷᠢᠮᠣ ᠶᠢ ᠬᠤᠶᠠᠷ ᠠᠴᠠ ᠭᠤᠷᠪᠠ ᠣᠳᠠᠭ᠎ᠠ ᠨᠢᠮᠪᠠᠢ ᠬᠠᠶᠠᠵᠦ ᠪᠠᠶᠢᠭᠠᠳ ᠰᠠᠶ᠋ᠢ ᠭᠦᠢᠴᠡᠳ ᠰᠠᠯᠭᠠᠵᠦ ᠠᠪᠣᠭᠠᠳ ᠬᠦᠮᠦᠷᠭᠡᠯᠡᠵᠦ ᠲᠠᠯᠪᠢᠳᠠᠬ ᠶᠣᠮ᠃      ᠯᠠᠢ ᠰᠠᠶᠢᠵᠠᠳᠠᠬᠤ᠃ ᠨᠠᠷᠢᠮᠣ ᠶᠢᠨ ᠬᠡᠶᠢᠳᠡᠮ᠂ ᠴᠣᠣᠬᠠᠯ ᠪᠣᠶᠣ ᠬᠡᠮᠬᠡᠷᠡᠭᠰᠡᠨ ᠨᠠᠪᠴᠢ ᠵᠡᠷᠭᠡ ᠶᠢ ᠬᠤᠷᠢᠶᠠᠩᠭᠤᠶᠢᠯᠠᠭᠠᠳ ᠬᠤᠷᠴᠢᠨ ᠳᠤ ᠨᠠᠷᠢᠮᠣ ᠶᠢᠨ ᠯᠠᠢ ᠭᠡᠳᠡᠭ᠃ ᠯᠠᠢ ᠶᠢ ᠮᠣᠳᠣᠨ ᠬᠦᠷᠵᠡ ᠪᠣᠶᠣ ᠱᠦᠬᠦᠷ ᠢᠶᠠᠷ ᠦᠳᠦᠷᠮ᠎ᠡ ᠶᠢᠨ ᠲᠣᠯᠢ ᠲᠡᠭᠡᠷ᠎ᠡ ᠪᠠᠨ ᠣᠪᠣᠭᠠᠯᠠᠵᠦ ᠲᠠᠯᠪᠢᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶᠢᠵᠠ ᠪᠠᠷ ᠰᠢᠷᠣᠢ ᠶᠢ ᠨᠢ ᠰᠠᠶᠢᠵᠠᠳᠠᠵᠦ ᠭᠠᠷᠭᠠᠭᠠᠳ ᠣᠭᠤᠳᠠᠨ ᠳᠤ ᠬᠢᠵᠦ ᠬᠠᠳᠠᠭᠠᠯᠠᠵᠦ ᠲᠠᠯᠪᠢᠨ᠎ᠠ᠃ ᠡᠭᠦᠨ ᠢᠶᠠᠨ ᠯᠠᠢ ᠬᠤᠷᠢᠶᠠᠬᠤ ᠭᠡᠳᠡᠭ᠃ ᠬᠤᠷᠢᠶᠠᠬᠰᠠᠨ ᠯᠠᠢ ᠪᠠᠨ ᠬᠠᠯᠠᠭᠤᠨ ᠣᠰᠣᠨ ᠳᠤ ᠲᠡᠪᠳᠦᠭᠡᠭᠡᠳ ᠭᠠᠭ᠋ᠠᠢ ᠲᠠᠬᠢᠶ᠎ᠠ ᠪᠣᠷᠳᠣᠬᠤ ᠳᠤ ᠬᠡᠷᠡᠭᠯᠡᠳᠡᠭ     ᠶᠣᠮ᠃      ᠨᠠᠷᠢᠮᠣ ᠶᠢᠨ ᠡᠰᠢ ᠰᠦᠷᠡᠯ ᠢ ᠡᠳ᠋ᠰᠢᠭᠦᠯᠬᠦ᠃ ᠨᠠᠷᠢᠮᠣ ᠶᠢᠨ ᠡᠰᠢ ᠰᠦᠷᠡᠯ ᠨᠢ ᠰᠢᠮ᠎ᠡ ᠲᠡᠵᠢᠭᠡᠯ ᠰᠠᠶᠢᠳᠠᠢ ᠪᠣᠯᠬᠤᠷ ᠦᠬᠡᠷ ᠬᠤᠨᠢ ᠪᠣᠷᠳᠣᠬᠤ ᠳᠤ ᠴᠢᠬᠤᠯᠠ ᠪᠣᠷᠳᠤᠭ᠎ᠠ ᠪᠣᠯᠳᠠᠬ ᠶᠣᠮ᠃ ᠭᠡᠪᠡᠴᠦ ᠨᠠᠷᠢᠮᠣ ᠶᠢᠨ ᠡᠰᠢ ᠨᠢ ᠬᠠᠳᠠᠭᠤ ᠮᠦᠷᠳᠡᠭᠡᠨ ᠱᠦᠷᠦᠭᠦᠨ ᠪᠣᠯᠬᠤᠷ ᠬᠤᠨᠢ ᠮᠠᠯ ᠳᠤ ᠪᠦᠬᠦᠯᠢ ᠪᠠᠷ ᠨᠢ ᠬᠠᠶᠠᠵᠦ ᠢᠳᠡᠭᠦᠯᠪᠡᠯ ᠭᠡᠭᠡᠵᠦ ᠣᠷᠬᠢᠬᠳᠠᠬᠤ ᠨᠢ ᠢᠯᠡᠭᠦᠦ ᠮᠦᠷᠳᠡᠭᠡᠨ ᠦᠬᠡᠷ ᠤᠨ ᠬᠡᠯᠡ ᠶᠢ ᠵᠣᠯᠭᠠᠭᠠᠵᠦ ᠠᠪᠬᠤ ᠠᠶᠣᠯᠳᠠᠢ ᠭᠡᠳᠡᠭ᠃ ᠡᠨᠡ ᠬᠦ ᠪᠠᠶᠢᠳᠠᠯ ᠳᠤ ᠲᠣᠬᠢᠷᠠᠭᠤᠯᠣᠨ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠠᠴᠠ ᠨᠠᠷᠢᠮᠣ ᠶᠢᠨ ᠰᠦᠷᠡᠯ ᠢ ᠬᠡᠷᠴᠢᠭᠡᠳ ᠡᠷᠳᠡᠨᠢ ᠰᠢᠰᠢ ᠶᠢᠨ ᠡᠰᠢ ᠰᠦᠷᠡᠯ ᠵᠡᠷᠭᠡ ᠶᠢᠨ ᠪᠣᠰᠣᠳ ᠡᠪᠡᠰᠦ ᠪᠣᠷᠳᠤᠭ᠎ᠠ ᠲᠠᠢ ᠬᠤᠯᠢᠵᠦ ᠪᠠᠶᠢᠭᠠᠳ ᠦᠬᠡᠷ ᠮᠠᠯ ᠢᠶᠠᠨ ᠪᠣᠷᠳᠣᠳᠠᠬ ᠶᠣᠮ᠃ ᠣᠤᠯ ᠳᠠᠭᠠᠨ ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠨᠠᠷᠢᠮᠣ ᠶᠢᠨ ᠡᠰᠢ ᠰᠦᠷᠡᠯ ᠢᠶᠠᠷ ᠭᠡᠷ ᠤᠨ ᠣᠷᠣᠢ ᠪᠠᠨ ᠡᠯᠪᠡᠵᠦ ᠪᠠᠶᠢᠬᠰᠠᠨ ᠭᠡᠨ᠎ᠡ᠃      ᠪᠣᠳᠠᠭ᠎ᠠ ᠪᠠ ᠯᠠᠢ᠂ ᠡᠰᠢ ᠰᠦᠷᠡᠯ ᠵᠡᠷᠭᠡ ᠶᠢ ᠭᠦᠢᠴᠡᠳ ᠬᠤᠷᠢᠶᠠᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠨᠠᠷᠢᠮᠣ ᠶᠢ ᠦᠳᠦᠷᠮᠡᠨ ᠳᠤ ᠠᠪᠬᠤ ᠠᠵᠢᠯ ᠲᠠᠭᠤᠰᠳᠠᠬ᠃      ᠨᠠᠷᠢᠮᠣ ᠪᠠᠷ ᠬᠤᠭᠤᠯᠠ ᠪᠣᠳᠠᠭ᠎ᠠ ᠪᠣᠯᠪᠠᠰᠣᠷᠠᠭᠤᠯᠬᠤ      ᠬᠤᠷᠴᠢᠨ ᠳᠤ ᠨᠠᠷᠢᠮᠣ ᠶᠢ ᠴᠠᠶᠢᠯᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠴᠣᠯᠭᠤᠢ ᠪᠠᠷ ᠴᠢᠨᠠᠭᠠᠳ ᠱᠦᠭᠦᠵᠦ ᠢᠳᠡᠳᠡᠭ᠃ ᠪᠠᠰᠠ ᠰᠢᠩᠭᠡᠨ ᠪᠣᠳᠠᠭ᠎ᠠ ᠴᠢᠨᠠᠵᠦ ᠢᠳᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠲᠤ ᠪᠠᠰᠠ ᠨᠠᠷᠢᠮᠣ ᠶᠢ ᠰᠢᠷ᠎ᠠ ᠲᠣᠰᠣᠨ ᠳᠤ ᠬᠠᠭᠤᠷᠣᠭᠠᠳ ᠪᠣᠳᠠᠭ᠎ᠠ ᠲᠠᠢ ᠴᠠᠢ ᠴᠢᠨᠠᠵᠦ ᠣᠣᠭᠤᠳᠠᠬ ᠪᠣᠶᠣ ᠰᠢᠷ᠎ᠠ ᠲᠣᠰᠣ᠂ ᠦᠷᠦᠮ᠎ᠡ ᠲᠠᠢ ᠠᠮᠣᠰᠣ ᠬᠢᠵᠦ ᠢᠳᠡᠳᠡᠭ᠃ ᠪᠠᠰᠠ ᠲᠠᠯᠬᠠᠳᠠᠭᠠᠳ ᠪᠣᠣᠪᠤ ᠬᠠᠭᠠᠷᠢᠬᠤ ᠪᠣᠶᠣ ᠮᠣᠩᠭᠤᠯ ᠠᠮᠣ ᠰᠢᠬ ᠬᠠᠭᠤᠷᠴᠦ᠂ ᠬᠠᠭᠤᠷᠣᠬᠰᠠᠨ ᠠᠮᠣ ᠪᠣᠯᠭᠠᠨ ᠢᠳᠡᠵᠦ ᠪᠠᠶᠢᠳᠠᠬ᠃ ᠡᠳᠡᠭᠡᠷ ᠬᠤᠭᠤᠯᠠ ᠣᠮᠳᠠ ᠶᠢ ᠪᠡᠯᠡᠳᠭᠡᠬᠦ ᠠᠴᠠ ᠡᠮᠦᠨ᠎ᠡ ᠡᠩ ᠲᠡᠷᠢᠭᠦᠨ ᠳᠤ ᠨᠠᠷᠢᠮᠣ ᠶᠢ ᠲᠡᠭᠡᠷᠮᠡᠳᠡᠵᠦ ᠴᠠᠶᠢᠯᠭᠠᠬᠤ ᠪᠣᠶᠣ ᠲᠠᠯᠬᠠᠳᠠᠬᠤ ᠠᠵᠢᠯ ᠶᠠᠪᠣᠬᠳᠠᠳᠠᠬ᠃      ᠨᠠᠷᠢᠮᠣ ᠴᠠᠶᠢᠯᠭᠠᠬᠤ᠃ ᠲᠡᠭᠡᠷᠮᠡᠳᠡᠭᠡᠳ ᠴᠠᠭᠠᠨ ᠪᠣᠳᠠᠭ᠎ᠠ ᠪᠣᠯᠭᠠᠬᠤ ᠶᠠᠪᠣᠴᠠ ᠶᠢ ᠨᠠᠷᠢᠮᠣ ᠴᠠᠶᠢᠯᠭᠠᠬᠤ ᠭᠡᠳᠡᠭ᠃ ᠨᠠᠷᠢᠮᠣ ᠴᠠᠶᠢᠯᠭᠠᠬᠤ ᠨᠢ ᠮᠣᠩᠭᠤᠯ ᠠᠮᠣ ᠴᠠᠶᠢᠯᠭᠠᠬᠤ ᠠᠴᠠ ᠬᠢᠯᠪᠠᠷᠬᠠᠨ ᠰᠢᠬ ᠪᠠᠶᠢᠳᠠᠬ᠃ ᠶᠠᠭᠤᠨ ᠤ ᠣᠷᠢᠳ ᠨᠠᠷᠢᠮᠣ ᠪᠠᠨ ᠴᠢᠬᠢᠭ ᠦᠭᠡᠢ ᠪᠣᠯᠳᠠᠯ᠎ᠠ ᠭᠦᠢᠴᠡᠳ ᠬᠠᠳᠠᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠲᠡᠭᠡᠷᠮᠡᠳᠡᠵᠦ ᠪᠣᠯᠳᠠᠬ᠃ ᠲᠡᠭᠡᠷᠮᠡᠳᠡᠬᠦ ᠶᠠᠪᠣᠴᠠ ᠨᠢ ᠣᠯᠠᠩᠬᠢ ᠳᠠᠭᠠᠨ ᠬᠤᠶᠠᠷ ᠶᠠᠪᠣᠴᠠ ᠶᠢ ᠦᠡᠭᠭᠡᠷᠡᠭᠡᠳᠡᠭ᠃ ᠡᠩ ᠲᠡᠷᠢᠭᠦᠨ ᠳᠤ ᠠᠯᠠᠬᠰᠢᠭᠤᠯᠬᠤ ᠶᠠᠪᠣᠴᠠ ᠪᠣᠯᠣᠨ᠎ᠠ᠃ ᠡᠨᠡ ᠬᠦ ᠶᠠᠪᠣᠴᠠ ᠳᠤ ᠨᠠᠷᠢᠮᠣ ᠶᠢᠨ ᠭᠠᠳᠠᠷ ᠲᠣᠬᠳᠣᠢ ᠨᠢ ᠪᠣᠳᠠᠭᠠᠨ ᠠᠴᠠ ᠪᠠᠨ ᠬᠤᠪᠬᠤᠷᠠᠨ ᠣᠨᠠᠨ᠎ᠠ᠃ ᠬᠤᠶᠠᠳᠣᠭᠠᠷ ᠶᠠᠪᠣᠴᠠ ᠨᠢ ᠴᠠᠶᠢᠯᠭᠠᠬᠤ ᠶᠠᠪᠣᠴᠠ ᠪᠣᠯᠣᠨ᠎ᠠ᠃ ᠡᠨᠡ ᠬᠦ ᠶᠠᠪᠣᠴᠠ ᠳᠤ ᠨᠠᠷᠢᠮᠣ ᠶᠢᠨ ᠪᠣᠳᠠᠭᠠᠨ ᠤ ᠭᠠᠳᠠᠭᠤᠷᠬᠢ ᠨᠢᠮᠬᠡᠨ ᠬᠠᠯᠢᠰᠣ ᠨᠢ ᠬᠤᠪᠬᠤᠷᠠᠨ ᠭᠠᠷᠣᠨ᠎ᠠ᠃ ᠴᠠᠶᠢᠯᠭᠠᠬᠰᠠᠨ ᠨᠠᠷᠢᠮᠣ ᠶᠢᠨ ᠭᠠᠳᠠᠷ ᠲᠣᠬᠳᠣᠢ ᠪᠣᠶᠣ ᠬᠡᠮᠬᠡᠷᠡᠭᠰᠡᠨ ᠢ ᠨᠢ ᠨᠠᠷᠢᠮᠣ ᠶᠢᠨ ᠠᠭᠠᠬ ᠭᠡᠳᠡᠭ᠃ ᠨᠠᠷᠢᠮᠣ ᠶᠢᠨ ᠠᠭᠠᠬ ᠢ ᠪᠣᠴᠠᠯᠣᠬᠰᠠᠨ ᠣᠰᠣᠨ ᠳᠤ ᠲᠡᠪᠳᠦᠭᠡᠭᠡᠳ ᠭᠠᠭ᠋ᠠᠢ ᠲᠠᠬᠢᠶ᠎ᠠ ᠪᠣᠷᠳᠣᠬᠤ ᠳᠤ ᠬᠡᠷᠡᠭᠯᠡᠳᠡᠭ ᠶᠣᠮ᠃ ᠴᠠᠶᠢᠯᠭᠠᠬᠰᠠᠨ ᠨᠠᠷᠢᠮᠣ ᠶᠢᠨ ᠴᠠᠭᠠᠨ ᠢ ᠰᠢᠭᠤᠳ ᠠᠬᠰᠢᠭᠠᠵᠦ ᠢᠳᠡᠬᠦ ᠪᠣᠶᠣ ᠲᠣᠳᠣᠷᠭ᠎ᠠ ᠪᠣᠳᠠᠭ᠎ᠠ ᠲᠠᠢ ᠬᠤᠯᠢᠵᠦ ᠢᠳᠡᠪᠡᠯ ᠰᠢᠮ᠎ᠡ ᠲᠡᠵᠢᠭᠡᠯ ᠰᠠᠶᠢᠳᠠᠢ ᠪᠠᠶᠢᠳᠠᠬ᠃ ᠨᠠᠷᠢᠮᠣ ᠶᠢᠨ ᠴᠠᠭᠠᠨ ᠢᠶᠠᠷ ᠵᠤᠳᠠᠩ ᠴᠢᠨᠠᠭᠠᠳ ᠬᠠᠪᠣᠷ ᠤᠨ ᠣᠯᠠᠷᠢᠯ ᠤᠨ ᠲᠠᠷᠳᠠᠬᠰᠠᠨ ᠦᠬᠡᠷ ᠮᠠᠯ ᠳᠤ ᠢᠳᠡᠭᠦᠯᠪᠡᠯ ᠮᠠᠯ ᠤᠨ ᠲᠠᠷᠭᠤ ᠬᠦᠴᠦ ᠬᠤᠷᠳᠣᠨ ᠨᠡᠮᠡᠭᠳᠡᠳᠡᠭ ᠶᠣᠮ᠃      ᠨᠠᠷᠢᠮᠣ ᠲᠠᠯᠬᠠᠳᠠᠬᠤ᠃ ᠨᠠᠷᠢᠮᠣ ᠶᠢᠨ ᠴᠠᠭᠠᠨ ᠢᠶᠠᠨ ᠦᠷᠭᠦᠯᠵᠢᠯᠡᠨ ᠭᠤᠯᠢᠷ ᠪᠣᠯᠳᠠᠯ᠎ᠠ ᠲᠠᠯᠬᠠᠳᠠᠨ ᠬᠡᠮᠬᠡᠯᠡᠬᠦ ᠶᠠᠪᠣᠴᠠ ᠶᠢ ᠨᠠᠷᠢᠮᠣ ᠲᠠᠯᠬᠠᠳᠠᠬᠤ ᠭᠡᠨ᠎ᠡ᠃ ᠲᠠᠯᠬᠠᠳᠠᠬᠰᠠᠨ ᠨᠠᠷᠢᠮᠣ ᠶᠢᠨ ᠴᠠᠭᠠᠨ ᠢᠶᠠᠷ ᠨᠠᠷᠢᠮᠣ ᠶᠢᠨ ᠪᠣᠣᠪᠤ ᠬᠢᠵᠦ ᠵᠢᠩᠨᠡᠬᠦ ᠪᠣᠶᠣ ᠬᠠᠭᠠᠷᠢᠵᠦ ᠢᠳᠡᠳᠡᠭ᠃ ᠨᠠᠷᠢᠮᠣ ᠶᠢᠨ ᠪᠣᠣᠪᠤ ᠨᠢ ᠰᠢᠮ᠎ᠡ ᠲᠡᠵᠢᠭᠡᠯ ᠢᠶᠠᠷ ᠰᠠᠶᠢᠨ ᠮᠦᠷᠳᠡᠭᠡᠨ ᠶᠡᠭᠡ ᠦᠯ ᠲᠠᠢ ᠪᠠᠶᠢᠳᠠᠬ ᠶᠣᠮ᠃      ᠨᠠᠷᠢᠮᠣ ᠶᠢᠨ ᠬᠠᠭᠤᠷᠣᠬᠰᠠᠨ ᠠᠮᠣ᠃ ᠨᠠᠷᠢᠮᠣ ᠶᠢ ᠬᠦᠭᠡᠭᠡᠯᠭᠡᠭᠡᠳ ᠬᠠᠭᠤᠷᠠᠢ ᠪᠣᠳᠠᠭ᠎ᠠ ᠪᠣᠯᠭᠠᠵᠦ ᠪᠣᠯᠳᠠᠬ᠃ ᠭᠡᠬᠦ ᠳᠡᠭᠡᠨ ᠬᠦᠭᠡᠭᠡᠯᠭᠡᠬᠦ ᠶᠠᠪᠣᠴᠠ ᠨᠢ ᠮᠣᠩᠭᠤᠯ ᠠᠮᠣ ᠶᠢ ᠪᠣᠳᠣᠪᠠᠯ ᠬᠤᠷᠳᠣᠨ ᠮᠦᠷᠳᠡᠭᠡᠨ ᠬᠦᠭᠡᠭᠡᠯᠭᠡᠬᠦ ᠬᠤᠭᠤᠴᠠᠭ᠎ᠠ ᠨᠢ ᠣᠬᠤᠷ ᠪᠠᠶᠢᠳᠠᠬ᠃ ᠬᠦᠭᠡᠭᠡᠯᠭᠡᠭᠰᠡᠨ ᠨᠠᠷᠢᠮᠣ ᠪᠠᠨ ᠬᠠᠯᠠᠭᠠᠬᠰᠠᠨ ᠰᠢᠷᠣᠢ ᠳᠤ ᠬᠠᠭᠤᠷᠣᠬᠰᠠᠨ ᠤ ᠲᠠᠷᠠᠭ᠎ᠠ ᠲᠠᠬᠢᠨ ᠲᠡᠭᠡᠷᠮᠡᠳᠡᠭᠡᠳ ᠨᠠᠷᠢᠮᠣ ᠶᠢᠨ ᠬᠠᠭᠤᠷᠠᠢ ᠪᠣᠳᠠᠭ᠎ᠠ ᠪᠣᠯᠭᠠᠳᠠᠬ᠃ ᠨᠠᠷᠢᠮᠣ ᠪᠠᠷ ᠬᠠᠭᠤᠷᠣᠬᠰᠠᠨ ᠬᠠᠭᠤᠷᠠᠢ ᠪᠣᠳᠠᠭ᠎ᠠ ᠨᠢ ᠮᠦᠬᠦᠯᠢᠭ ᠢᠶᠠᠷ ᠵᠢᠵᠢᠭ᠂ ᠲᠡᠪᠳᠦᠭᠰᠡᠨ ᠤ ᠲᠠᠷᠠᠭ᠎ᠠ ᠠᠬᠰᠠᠶᠢᠬᠤ ᠨᠢ ᠶᠡᠭᠡ ᠪᠣᠯᠬᠤᠷ ᠦᠯ ᠶᠡᠬᠡᠳᠡᠢ ᠮᠦᠷᠳᠡᠭᠡᠨ ᠬᠡᠳᠦᠷᠬᠡᠢ ᠢᠳᠡᠪᠡᠯ ᠬᠤᠳᠣᠭᠤᠳᠣ ᠡᠪᠡᠳᠬᠦ ᠠᠶᠣᠯᠳᠠᠢ ᠭᠡᠳᠡᠭ᠃ ᠨᠠᠷᠢᠮᠣ ᠪᠣᠳᠠᠭ᠎ᠠ ᠨᠢ ᠰᠢᠮ᠎ᠡ ᠲᠡᠵᠢᠭᠡᠯ ᠰᠠᠶᠢᠨ᠂ ᠰᠢᠬᠢᠷ ᠪᠠᠭ᠎ᠠ ᠪᠣᠯᠬᠤᠷ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠲᠠᠢ ᠬᠦᠮᠣᠨ ᠢᠯᠡᠭᠦᠬᠡᠨ ᠢᠳᠡᠪᠡᠯ ᠬᠦᠴᠦ ᠲᠠᠮᠢᠷ ᠰᠡᠯᠪᠢᠵᠦ ᠬᠤᠳᠣᠭᠤᠳᠦ ᠭᠡᠳᠡᠰᠦ ᠶᠢ ᠨᠢ ᠰᠠᠶᠢᠵᠢᠷᠠᠭᠤᠯᠬᠤ ᠳᠤ ᠶᠡᠭᠡ ᠲᠣᠰᠠᠳᠠᠢ᠃      ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠵᠠᠷᠢᠮ ᠭᠠᠵᠠᠷ ᠲᠤ ᠨᠠᠷᠢᠮᠣ ᠶᠢ ᠠᠷᠢᠬᠢ ᠨᠡᠷᠡᠬᠦ ᠮᠡᠳᠦ ᠪᠠᠷ ᠠᠰᠢᠬᠯᠠᠵᠦ ᠬᠡᠷᠡᠭᠯᠡᠵᠦ ᠪᠠᠶᠢᠨ᠎ᠠ᠃      ᠨᠠᠷᠢᠮᠣ ᠶᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠨᠡᠯᠢᠶᠡᠳ ᠣᠷᠣᠢ ᠰᠢᠬ ᠲᠠᠷᠢᠵᠦ ᠬᠡᠷᠡᠭᠯᠡᠭᠰᠡᠨ ᠪᠣᠯᠪᠠᠴᠦ ᠨᠠᠷᠢᠮᠣ ᠶᠢᠨ ᠪᠣᠳᠠᠭ᠎ᠠ ᠠᠴᠠ ᠡᠰᠢ ᠰᠦᠷᠡᠯ ᠳᠤᠨᠢ ᠬᠦᠷᠳᠡᠯ᠎ᠡ ᠠᠮᠢᠳᠣᠷᠠᠯ ᠤᠨ ᠦᠷᠭᠡᠨ ᠬᠡᠷᠡᠭᠴᠡᠭᠡᠨ ᠳᠤ ᠣᠷᠣᠵᠦ᠂ ᠠᠷᠠᠳ ᠲᠦᠮᠡᠨ ᠤ ᠠᠵᠤ ᠠᠮᠢᠳᠣᠷᠠᠯ ᠤᠨ ᠲᠡᠭᠡᠭᠰᠢᠯᠡᠯᠳᠡ ᠳᠤ ᠶᠡᠬᠡᠬᠡᠨ ᠠᠰᠢᠬ ᠲᠣᠰᠠ ᠬᠦᠷᠳᠡᠭᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃      ᠨᠠᠩᠬᠢ      ᠨᠠᠩᠭᠢ ᠶᠢ ᠬᠤᠷᠴᠢᠨ ᠠᠴᠠ ᠪᠣᠰᠣᠳ ᠭᠠᠵᠠᠷ ᠪᠠᠰᠠ ᠰᠢᠯᠦᠭᠡᠢ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠨᠠᠩᠬᠢ ᠨᠢ ᠮᠣᠩᠭᠤᠯ ᠣᠷᠣᠨ ᠳᠤ ᠨᠡᠯᠢᠶᠡᠳ ᠡᠷᠳᠡ ᠲᠠᠷᠢᠬᠳᠠᠵᠦ ᠡᠬᠢᠯᠡᠭᠰᠡᠨ ᠣᠷᠭᠤᠮᠠᠯ ᠪᠣᠯᠣᠨ᠎ᠠ᠃ 1221 ᠣᠨ ᠳᠤ ᠡᠮᠦᠨᠡᠳᠦ ᠰᠦᠡᠭ ᠣᠯᠣᠰ ᠤᠨ ᠡᠯᠴᠢ ᠵᠣᠣ ᠾᠧᠡᠭ ᠤᠨ ᠮᠣᠩᠭᠤᠯ ᠭᠠᠵᠠᠷ ᠠᠴᠠ ᠪᠣᠴᠠᠭᠠᠳ ᠪᠢᠴᠢᠭᠰᠡᠨ ︽ᠮᠣᠩᠭᠤᠯ— ᠲᠠᠲ᠋ᠠᠷ ᠤᠨ ᠲᠣᠬᠠᠢ ᠪᠦᠷᠢᠨ ᠲᠡᠮᠳᠡᠭᠯᠡᠯ︾ ᠳᠤ᠄ ︽ᠲᠡᠳᠡᠨ ᠤ ᠣᠯᠣᠰ ᠲᠤ ᠨᠠᠩᠬᠢ ᠮᠣᠩᠭᠤᠯ ᠠᠮᠣ ᠭᠠᠷᠳᠠᠬ ᠪᠣᠯᠬᠤᠷ ᠲᠡᠳᠡ ᠪᠠᠰᠠ ᠡᠭᠦᠨ ᠢᠶᠠᠷ ᠪᠣᠳᠠᠭ᠎ᠠ ᠪᠣᠴᠠᠯᠭᠠᠨ ᠰᠢᠩᠭᠡᠯᠡᠨ ᠢᠳᠡᠳᠡᠭ ᠶᠣᠮ︾ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠭᠡᠳᠡᠭ᠃ ᠮᠢᠩ ᠣᠯᠣᠰ ᠤᠨ ᠸᠠᠨ ᠯᠢ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠲᠦᠮᠡᠳ ᠣᠷᠣᠨ ᠣᠳᠣ ᠶᠢᠨ ᠬᠦᠬᠡᠬᠤᠳᠠ ᠣᠷᠣᠨ ᠢᠶᠠᠷ ᠡᠯᠴᠢᠯᠡᠵᠦ ᠢᠷᠡᠭᠰᠡᠨ ᠫᠸᠢᠲ᠋ᠠᠯᠢᠨ ᠢᠶᠠᠷ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠦᠬᠡᠬᠤᠳᠠ ᠣᠷᠣᠨ ᠤ ᠲᠠᠷᠢᠶᠠᠯᠠᠩ ᠤᠨ ᠪᠠᠶᠢᠳᠠᠯ ᠢ ᠪᠢᠴᠢᠬᠦ ᠳᠡᠭᠡᠨ᠄ ︽ᠮᠣᠩᠭᠤᠯ ᠨᠢ ᠡᠯᠳᠡᠪ ᠠᠮᠣ ᠪᠣᠳᠠᠭ᠎ᠠ ᠶᠢᠨ ᠭᠠᠷᠣᠯᠳᠠ ᠲᠠᠢ᠃ ᠵᠢᠱᠢᠶᠡᠯᠡᠪᠡᠯ ᠮᠣᠩᠭᠤᠯ ᠠᠮᠣ᠂ ᠰᠢᠯᠦᠭᠡᠢ᠂ ᠪᠣᠭᠤᠳᠠᠢ᠂ ᠬᠠᠪᠣᠷ ᠲᠠᠷᠢᠬᠤ ᠬᠠᠷ᠎ᠠ ᠪᠣᠭᠤᠳᠠᠢ᠂ ᠠᠷᠪᠠᠢ ᠨᠣᠬᠠᠢ ᠶᠢᠨ ᠬᠤᠰᠢᠭᠤ ᠵᠡᠷᠭᠡ ᠪᠠᠶᠢᠵᠦ ᠪᠠᠰᠠ ᠨᠡᠷ᠎ᠡ ᠶᠢ ᠨᠢ ᠦᠯᠦ ᠮᠡᠳᠡᠬᠦ ᠮᠠᠰᠢ ᠣᠯᠠᠨ ᠲᠠᠷᠢᠮᠠᠯ ᠲᠠᠢ ᠪᠠᠶᠢᠬᠰᠠᠨ ᠁︾ ᠭᠡᠵᠡᠢ᠃ ᠲᠡᠭᠦᠨ ᠤ ᠶᠠᠷᠢᠬᠰᠠᠨ ᠰᠢᠯᠦᠭᠡᠢ ᠭᠡᠳᠡᠭ ᠨᠢ ᠲᠠᠷᠣᠢ ᠨᠠᠩᠬᠢ ᠶᠢ ᠵᠢᠭᠠᠵᠦ ᠪᠠᠶᠢᠭ᠎ᠠ ᠶᠣᠮ᠃ ᠡᠭᠦᠨ ᠠᠴᠠ ᠪᠢᠳᠡ ᠨᠠᠩᠬᠢ ᠶᠢ ᠮᠣᠩᠭᠤᠯ ᠣᠷᠣᠨ ᠳᠤ ᠨᠡᠯᠢᠶᠡᠳ ᠡᠷᠳᠡ ᠠᠴᠠ ᠲᠠᠷᠢᠵᠦ ᠬᠡᠷᠡᠭᠯᠡᠵᠦ ᠪᠠᠶᠢᠯ᠎ᠠ ᠭᠡᠳᠡᠭ ᠢ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃      ᠨᠠᠩᠬᠢ ᠶᠢᠨ ᠢᠵᠡᠭᠤᠷ ᠣᠷᠭᠤᠴᠠ ᠨᠢ ᠮᠣᠩᠭᠤᠯ ᠠᠮᠣ ᠲᠠᠢ ᠲᠦᠰᠦᠭᠡᠳᠡᠢ ᠮᠦᠷᠳᠡᠭᠡᠨ ᠲᠠᠷᠢᠵᠦ᠂ ᠠᠷᠠᠴᠢᠯᠡᠵᠦ᠂ ᠬᠤᠷᠢᠶᠠᠬᠤ ᠶᠠᠪᠣᠴᠠ ᠨᠢ ᠴᠦ ᠮᠣᠩᠭᠤᠯ ᠠᠮᠣ ᠲᠠᠢ ᠨᠡᠯᠢᠶᠡᠳ ᠣᠶᠢᠷᠠᠯᠴᠠᠭ᠎ᠠ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠳᠤ ᠨᠠᠩᠭᠢ ᠶᠢ ᠭᠤᠤᠯᠳᠠᠭᠤ ᠭᠤᠯᠢᠷ ᠲᠠᠯᠬᠠᠳᠠᠨ ᠪᠣᠣᠪᠤ ᠪᠣᠭᠤᠷᠰᠤᠬ ᠬᠢᠵᠦ ᠢᠳᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠲᠤ ᠪᠠᠰᠠ ᠠᠬᠰᠢᠭᠠᠭᠠᠳ ᠨᠠᠩᠭᠢ ᠪᠣᠳᠠᠭ᠎ᠠ ᠪᠣᠯᠭᠠᠨ ᠢᠳᠡᠳᠡᠭ ᠴᠦ ᠪᠣᠢ᠃ ᠬᠤᠷᠴᠢᠨ ᠳᠤ ᠨᠠᠩᠬᠢ ᠶᠢᠨ ᠪᠣᠣᠪᠤ ᠶᠢ ᠴᠠᠭᠠᠨ ᠰᠢᠬᠢᠷ᠂ ᠭᠠᠭ᠋ᠠᠢ ᠶᠢᠨ ᠲᠣᠰᠣ ᠲᠠᠢ ᠵᠢᠭᠤᠷᠠᠵᠦ ᠢᠳᠡᠳᠡᠭ᠃ ᠪᠠᠰᠠ ᠰᠢᠷ᠎ᠠ ᠲᠣᠰᠣ ᠪᠠ ᠴᠠᠭᠠᠨ ᠰᠢᠬᠢᠷ ᠲᠠᠢ ᠵᠢᠭᠤᠷᠠᠵᠦ ᠢᠳᠡᠳᠡᠭ᠃ ᠨᠠᠩᠬᠢ ᠶᠢᠨ ᠪᠣᠣᠪᠤ ᠨᠢ ᠦᠯ ᠰᠠᠶᠢᠳᠠᠢ ᠪᠣᠯᠬᠤᠷ ᠦᠷᠯᠦᠭᠡ ᠪᠣᠶᠣ ᠦᠳᠡ ᠳᠤ ᠢᠳᠡᠪᠡᠯ ᠡᠳᠦᠷ ᠤᠨ ᠠᠵᠢᠯ ᠳᠤ ᠲᠡᠮᠡᠢ ᠦᠯᠦᠰᠴᠦ ᠣᠮᠳᠠᠭᠠᠰᠬᠤ ᠦᠭᠡᠢ ᠪᠠᠶᠢᠳᠠᠬ ᠶᠣᠮ᠃ ᠬᠤᠷᠴᠢᠨᠴᠣᠳ ᠪᠠᠰᠠ ᠨᠠᠩᠬᠢ ᠶᠢᠨ ᠲᠣᠮᠳᠠ ᠠᠯᠠᠬ ᠪᠣᠷᠴᠠᠬ ᠬᠠᠪᠴᠢᠭᠤᠯᠵᠦ ᠪᠣᠣᠪᠤ ᠪᠣᠯᠭᠠᠨ ᠢᠳᠡᠬᠦ ᠪᠣᠶᠣ ᠲᠣᠰᠣᠨ ᠳᠤ ᠪᠣᠴᠠᠯᠭᠠᠨ ᠬᠠᠭᠠᠷᠢᠵᠦ ᠢᠳᠡᠳᠡᠭ ᠶᠣᠮ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠨᠠᠩᠬᠢ ᠶᠢᠨ ᠪᠣᠣᠪᠤ ᠶᠢ ᠪᠡᠯᠭᠡ ᠲᠠᠢ ᠢᠳᠡᠭᠡᠨ ᠢᠶᠠᠷ ᠦᠵᠡᠵᠦ ᠦᠳᠦᠷᠮ᠎ᠡ ᠲᠠᠬᠢᠬᠤ ᠪᠣᠶᠣ ᠣᠪᠣᠭ᠎ᠠ ᠱᠠᠩᠰᠢ ᠲᠠᠬᠢᠬᠤ ᠳᠤ ᠬᠡᠷᠡᠭᠯᠡᠬᠦ ᠪᠠᠷ ᠦᠯᠦ ᠪᠠᠷᠠᠨ ᠬᠠᠭᠤᠴᠢᠨ ᠳᠤ ᠪᠠᠰᠠ ᠬᠠᠷᠢ ᠳᠤ ᠦᠭᠭᠦᠭᠰᠡᠨ ᠬᠡᠦᠬᠡᠨ ᠢᠶᠠᠨ ᠨᠠᠩᠬᠢ ᠶᠢᠨ ᠪᠣᠣᠪᠤ ᠪᠠᠷ ᠡᠷᠭᠢᠳᠡᠭ ᠴᠦ ᠦᠵᠡᠭᠳᠡᠯ ᠪᠠᠶᠢᠵᠠᠢ᠃
           
  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠠᠷᠨᠨᠴᠢᠮᠡᠭ᠄ ᠬᠤᠷᠴᠢᠨ ᠤ ᠤᠯᠠᠮᠵᠢᠯᠠᠯᠲᠤ ᠬᠤᠪᠴᠠᠰᠦ ᠵᠠᠰᠠᠯ ᠤᠨ ᠦᠪᠡᠷᠮᠢᠴᠡ ᠷᠢᠳᠢ ᠰᠢᠳᠢ ᠶᠢ ᠤᠯᠠᠮᠵᠢᠯᠠᠨ ᠁
ᠨᠢᠬᠡ ᠬᠥᠮᠤᠨ ᠤ ᠡᠬᠡ ᠶᠢᠨ ᠬᠡᠪᠡᠯᠢ ᠳᠤ ᠪᠥᠳᠤᠭᠦ ᠠᠴᠠ ᠨᠠᠰᠤ ᠡᠴᠤᠰᠯᠡᠬᠦ ᠬᠥᠷᠳᠡᠯᠡᠬᠢ ᠬᠤᠷᠢᠨ ᠲᠠᠪᠤᠨ ᠥᠶ᠎ᠡ ᠶᠢᠨ ᠁
ᠬᠦᠬᠡ ᠤᠰᠤ ᠨᠠᠭᠤᠷ ᠤᠨ ᠲᠤᠮᠤᠭ
ᠬᠤᠷᠴᠢᠨ — ᠬᠤᠷ ᠰᠠᠭᠠᠳᠠᠬ ᠠᠬᠰᠠᠵᠣ ᠡᠵᠠᠨ ᠢ ᠬᠠᠮᠠᠭᠠᠯᠠᠳᠠᠬ ᠰᠢᠳᠠᠷ ᠴᠡᠷᠢᠭ
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠰᠢᠳᠦᠯᠭᠡ ︵ᠲᠤᠤᠷᠠᠳᠤ︶
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号