ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
︽ ᠲᠤ ᠪᠠᠨ ᠳᠤ ᠪᠠᠨ ᠲᠤ ᠨᠢ ᠳᠤ ᠨᠢ ᠲᠤ ᠬᠢ ᠳᠤ ᠬᠢ︾ ᠶᠢᠨ ᠪᠢᠴᠢᠯᠭᠡ ᠶᠢᠨ ᠲᠤᠬᠠᠢ ᠵᠦᠪᠯᠡᠯᠭᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/7/6
    ᠨᠢᠭᠡ      ᠬᠡᠯᠡᠨ ᠵᠦᠢ ᠨᠠᠷᠢᠨ ᠴᠢᠩᠭ᠎ᠠ ᠳᠦᠷᠢᠮᠵᠢᠵᠦ ᠵᠢᠷᠤᠮᠵᠢᠵᠤ ᠲᠡᠶᠢᠯᠥᠭᠡᠲᠦᠢ ᠪᠠᠶᠢᠭᠰᠠᠨ ᠡᠷᠲᠡᠨ ᠤ ᠪᠢᠴᠢᠭ ᠲᠤ ︽ ᠲᠠᠭᠠᠨ ᠲᠡᠭᠡᠨ᠂ ᠳᠠᠭᠠᠨ ᠳᠡᠭᠡᠨ︾ ᠭᠡᠵᠦ ᠪᠢᠴᠢᠲᠡᠭ ᠨᠢ ᠪᠠᠶᠢᠩᠭᠤ ᠬᠠᠷᠠᠭᠳᠠᠳᠠᠭ ᠪᠠᠶᠢᠵᠠᠢ᠃ ᠡᠷᠲᠡ ᠴᠠᠭ ᠤᠨ ︽ ᠲᠠᠭᠠᠨ ᠲᠡᠭᠡᠨ᠂ ᠳᠠᠭᠠᠨ ᠳᠡᠭᠡᠨ︾ ᠪᠤᠯ ᠣᠳᠤ ᠦᠶ᠎ᠡ ᠶᠢᠨ ︽ ᠲᠤ ᠪᠠᠨ᠂ ᠳᠤ ᠪᠠᠨ︾ ᠪᠠᠶᠢᠭ᠎ᠠ ᠶᠣᠮ᠃ ᠳᠠᠷᠤᠢ᠂ ᠦᠭᠬᠦ ᠣᠷᠤᠰᠢᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ ᠤᠭᠰᠠᠷᠠᠭᠤᠯᠵᠤ ᠬᠡᠷᠡᠭᠯᠡᠭᠰᠡᠨ ᠬᠡᠯᠪᠡᠷᠢ ᠪᠤᠯᠬᠤ ᠶᠤᠮ᠃ ᠬᠡᠯᠡᠨ ᠵᠦᠢ ᠮᠠᠰᠢ ᠨᠠᠷᠢᠨ ᠴᠢᠩᠭ᠎ᠠ ᠳᠦᠷᠢᠮᠵᠢᠨ ᠵᠢᠷᠤᠮᠵᠢᠵᠤ ᠪᠠᠶᠢᠭ᠎ᠠ ᠥᠨᠦᠲᠦᠷ ᠪᠠᠰᠠ ᠪᠠᠷ ᠬᠡᠪᠯᠡᠯ ᠳᠤ ︽ ᠲᠠᠭᠠᠨ ᠲᠡᠭᠡᠨ᠂ ᠳᠠᠭᠠᠨ ᠳᠡᠭᠡᠨ︾ ᠭᠡᠵᠦ ᠪᠢᠴᠢᠲᠡᠭ ᠢ ᠨᠡᠶᠢᠳᠡᠮ ᠦᠵᠡᠲᠡᠭ ᠪᠤᠯᠤᠯ᠎ᠠ᠃ ᠡᠶᠢᠨ ᠬᠦ ᠲᠡᠶᠢᠨ ᠢᠯᠭᠠᠯ ᠪᠠ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ ᠨᠡᠶᠢᠯᠡᠭᠦᠯᠵᠦ ᠪᠢᠴᠢᠬᠦ ᠨᠢ ᠣᠳᠤ ᠦᠶ᠎ᠡ ᠳᠤ ᠪᠣᠯ ᠬᠠᠷᠢᠨ ᠬᠡᠯᠡᠨ ᠵᠦᠢ ᠶᠢᠨ ᠰᠠᠮᠠᠭᠤᠷᠠᠯ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠵᠦ ᠲᠠᠨᠢᠵᠤ ᠪᠠᠶᠢᠨ᠎ᠠ᠃      ᠬᠡᠯᠡᠨ ᠵᠦᠢ ᠳᠤ ᠲᠡᠶᠢᠨ ᠢᠯᠭᠠᠯ ᠪᠠ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ ᠤᠭᠰᠠᠷᠠᠭᠤᠯᠵᠤ ᠬᠡᠷᠡᠭᠯᠡᠬᠦ ᠪᠠᠶᠢᠳᠠᠯ ᠵᠦᠩᠳᠡᠭᠡᠨ᠃ ᠵᠢᠱᠢᠶᠡᠯᠡᠪᠡᠯ᠄ ᠪᠠᠭᠰᠢ ᠪᠠᠷ ᠢᠶᠠᠨ ᠵᠢᠭᠠᠯᠭ᠎ᠠ᠃ ᠪᠠᠭᠰᠢ ᠠᠴᠠ ᠪᠠᠨ ᠠᠰᠠᠭᠤ᠃ ᠪᠠᠭᠰᠢ ᠶᠢᠨ ᠢᠶᠠᠨ ᠦᠭᠡ ᠶᠢ ᠰᠤᠨᠤᠰ᠃ ᠪᠠᠭᠰᠢ ᠲᠠᠢ ᠪᠠᠨ ᠬᠠᠮᠲᠤ ᠢᠷ᠎ᠡ᠃ ᠪᠠᠭᠰᠢ ᠠᠴᠠ ᠨᠢ ᠠᠰᠠᠭᠤ᠃ ᠪᠠᠭᠰᠢ ᠶᠢ ᠴᠢᠨᠢ ᠵᠠᠯᠠᠶ᠎ᠠ᠃ ᠲᠡᠭᠦᠦ ᠶᠢ ᠨᠢ ᠳᠠᠭᠤᠳᠠ᠃ ᠠᠬ᠎ᠠ ᠲᠠᠢ ᠨᠢ ᠢᠷ᠎ᠡ᠃ ᠬᠠᠮᠳᠤ ᠰᠤᠷᠤᠯᠭᠠᠳᠠᠨ ᠤ ᠪᠠᠨ ᠨᠣᠮ ᠢ ᠦᠵᠡ ᠁ ᠭᠡᠬᠦ ᠮᠡᠲᠦ᠃      ︽ ᠪᠠᠷ ᠢᠶᠠᠨ︾ ᠪᠤᠯ ᠦᠢᠯᠡᠳᠬᠦ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠠᠴᠠ ᠪᠠᠨ︾ ᠪᠤᠯ ᠭᠠᠷᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠶᠢᠨ ᠢᠶᠠᠨ︾ ᠪᠤᠯ ᠬᠠᠷᠢᠶᠠᠯᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠲᠠᠢ ᠪᠠᠨ︾ ᠪᠤᠯ ᠬᠠᠮᠳᠤᠷᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠠᠴᠠ ᠨᠢ︾ ᠪᠤᠯ ᠭᠠᠷᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠭᠤᠷᠪᠠᠳᠤᠭᠠᠷ ᠪᠡᠶ᠎ᠡ ᠳᠤ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠶᠢ ᠴᠢᠨᠢ︾ ᠪᠤᠯ ᠵᠢᠭᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠬᠤᠶᠠᠳᠤᠭᠠᠷ ᠪᠡᠶ᠎ᠡ ᠳᠤ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠶᠢ ᠨᠢ︾ ᠪᠤᠯ ᠵᠢᠭᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠭᠤᠷᠪᠠᠳᠤᠭᠠᠷ ᠪᠡᠶ᠎ᠡ ᠳᠤ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠲᠠᠢ ᠨᠢ︾ ᠪᠣᠯ ᠬᠠᠮᠳᠤᠷᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠭᠤᠷᠪᠠᠳᠤᠭᠠᠷ ᠪᠡᠶ᠎ᠡ ᠳᠤ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ︔ ︽ ᠤ ᠪᠠᠨ︾ ᠪᠣᠯ ᠬᠠᠷᠢᠶᠠᠯᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠪᠠ ᠶᠡᠷᠦᠩᠬᠡᠢ ᠬᠠᠮᠢᠶᠠᠳᠠᠭᠤᠯᠬᠤ ᠬᠤᠶᠠᠷ ᠲᠦᠷᠦᠯ ᠤᠨ ᠳᠠᠭᠠᠪᠤᠷᠢ ᠶᠢ ᠳᠤᠰ ᠳᠤᠰ ᠤᠭᠰᠠᠷᠠᠭᠤᠯᠵᠤ ᠬᠡᠷᠡᠭᠯᠡᠭᠰᠡᠨ ᠪᠠᠶᠢᠳᠠᠯ ᠪᠣᠯᠣᠨ᠎ᠠ᠃      ᠡᠲᠡᠭᠡᠷ ᠳᠠᠭᠠᠪᠤᠷᠢ ᠨᠤᠭᠤᠳ ᠤᠨ ᠬᠡᠷᠡᠭᠯᠡᠭᠲᠡᠭᠰᠡᠨ ᠪᠠᠶᠢᠳᠠᠯ ᠪᠠ ᠦᠢᠯᠡᠲᠦᠯ ᠪᠦᠷ ᠠᠳᠠᠯᠢᠬᠠᠨ ᠪᠠᠶᠢᠭ᠎ᠠ ᠶᠤᠮ᠃ ᠲᠡᠶᠢᠮᠥ ᠠᠴᠠ ᠪᠢᠴᠢᠭᠲᠡᠬᠦ ᠶᠤᠰᠤ ᠪᠠ ᠬᠡᠯᠪᠡᠷᠢ ᠶᠢᠨ ᠬᠤᠪᠢ ᠳᠤ ᠶᠠᠭᠠᠬᠢᠭᠰᠠᠨ ᠴᠤ ᠨᠢᠭᠡᠲᠦᠯᠲᠡᠢ ᠪᠠᠶᠢᠬᠤ ᠶᠤᠰᠤᠳᠠᠢ ᠃ ᠬᠡᠷᠪᠡ ︽ ᠲᠤ ᠪᠠᠨ᠂ ᠳᠤ ᠪᠠᠨ︾ ᠢ ᠨᠡᠶᠢᠯᠡᠭᠦᠯᠵᠦ ᠬᠤᠪᠢᠷᠠᠭᠠᠵᠤ ᠪᠢᠴᠢᠬᠦ ᠳᠤ ᠬᠦᠷᠪᠡᠯ ᠪᠤᠰᠤᠳ ᠢ ᠨᠢ ᠪᠠᠰᠠ ᠨᠡᠶᠢᠯᠡᠭᠦᠯᠵᠦ ᠬᠤᠪᠢᠷᠠᠭᠠᠵᠤ ᠪᠢᠴᠢᠬᠦ ᠬᠡᠷᠡᠭᠲᠡᠢ ᠪᠤᠯᠤᠨ᠎ᠠ᠃ ᠵᠢᠱᠢᠶᠡᠯᠡᠪᠡᠯ᠄ ︽ ᠠᠴᠠ ᠪᠠᠨ︾ ᠢ ︽ ᠠᠴᠠᠭᠠᠨ ᠡᠴᠡᠭᠡᠨ︾᠂ ︽ ᠲᠠᠢ ᠪᠠᠨ︾ ᠢ ︽ ᠲᠠᠶᠢᠭᠠᠨ ᠲᠡᠶᠢᠬᠡᠨ︾᠂ ︽ ᠤ ᠪᠠᠨ︾ ᠢ ︽ᠨᠠᠶᠢᠭᠠᠨ ︵ ᠨᠠᠶᠢᠬᠠᠨ︶ ᠨᠡᠶᠢᠬᠡᠨ︾᠂ ︽ ᠠᠴᠠ ᠨᠢ︾ ᠶᠢ ︽ᠡᠴᠡᠨᠢ︾᠂ ︽ ᠲᠠᠢ ᠨᠢ︾ ᠶᠢ ︽ᠲᠠᠶᠢᠨᠢ︾ ᠁ ᠭᠡᠬᠦ ᠮᠡᠲᠦ ᠪᠠᠷ ᠪᠢᠴᠢᠬᠦ ᠶᠤᠰᠤᠳᠠᠢ ᠪᠤᠯᠵᠤ ᠢᠷᠡᠨ᠎ᠡ ︵ᠡᠷᠲᠡᠨ ᠤ ᠪᠢᠴᠢᠭ ᠲᠤ ︽ ᠠᠴᠠᠭᠠᠨ ᠡᠴᠡᠭᠡᠨ᠂ ᠲᠠᠶᠢᠭᠠᠨ ᠲᠡᠶᠢᠬᠡᠨ᠂ ᠶᠤᠭᠠᠨ ᠶᠦᠭᠡᠨ᠂  ᠨᠠᠶᠢᠬᠠᠨ ᠨᠡᠶᠢᠬᠡᠨ︾ ᠭᠡᠵᠦ ᠪᠢᠴᠢᠵᠦ ᠴᠤ ᠪᠠᠶᠢᠭᠰᠠᠨ︶᠃ ᠢᠩᠭᠢᠭᠰᠡᠭᠡᠷ ᠴᠣᠬᠤᠮ ᠶᠡᠭᠡ ᠶᠠᠷᠰᠢᠭ ᠪᠤᠯᠬᠤ ᠨᠢ ᠡ︕ ᠠᠳᠠᠯᠢ ᠶᠤᠰᠤᠭᠠᠷ ᠦᠭᠬᠦ ᠣᠷᠤᠰᠢᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠳᠠᠭᠠᠪᠤᠷᠢ ︽ ᠲᠤ ᠳᠤ︾ ᠪᠤᠯᠤᠨ ᠬᠤᠶᠠᠳᠤᠭᠠᠷ ᠪᠤᠶᠤ ᠭᠤᠷᠪᠠᠳᠤᠭᠠᠷ ᠪᠡᠶ᠎ᠡ ᠶᠢᠨ ᠬᠠᠮᠢᠶᠠᠳᠠᠭᠤᠯᠬᠤ ᠳᠠᠭᠠᠪᠤᠷᠢ ︽ ᠨᠢ︾ ᠶᠢ ᠤᠭᠰᠠᠷᠠᠭᠤᠯᠤᠨ ᠬᠡᠷᠡᠭᠯᠡᠬᠦ ᠦᠶ᠎ᠡ ᠳᠤ ᠬᠠᠰᠢ ᠯᠨ ︽ ᠲᠤ ᠨᠢ᠂ ᠳᠤ ᠨᠢ︾ ᠬᠡᠵᠦ ᠳᠤᠰ ᠳᠤᠰ ᠲᠤ ᠨᠢ ᠰᠠᠯᠭᠠᠵᠤ ᠪᠢᠴᠢᠪᠡᠯ ᠵᠤᠬᠢᠨ᠎ᠠ᠃ ᠬᠡᠷᠪᠡ ︽ ᠲᠤᠨᠢ ᠳᠤᠨᠢ︾ ᠭᠡᠵᠦ ᠨᠡᠶᠢᠯᠡᠭᠦᠯᠵᠦ ᠪᠢᠴᠢᠪᠡᠯ ᠪᠠᠰᠠ ᠴᠤ ᠰᠠᠮᠠᠭᠤᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠬᠡᠷᠡᠭ ᠪᠤᠯᠤᠨ᠎ᠠ᠃      ᠡᠳᠡᠭᠡᠷ ᠳᠠᠭᠠᠪᠤᠷᠢ ᠶᠢ ᠳᠤᠰ ᠳᠤᠰ ᠢᠶᠠᠷ ᠨᠢ ᠰᠠᠯᠭᠠᠵᠤ ᠪᠢᠴᠢᠪᠡᠯ ᠪᠠᠭᠰᠢ ᠨᠠᠷ ᠵᠢᠭᠠᠬᠤ ᠳᠤ ᠴᠤ ᠮᠠᠰᠢ ᠳᠦᠭᠦᠮ ᠪᠣᠯᠵᠣ ︽ ᠲᠤ︾ ᠨᠢ ᠶᠠᠭᠤᠨ ᠤ ᠳᠠᠭᠠᠪᠤᠷᠢ᠂ ︽ ᠪᠠᠨ︾ ᠨᠢ ᠶᠠᠭᠤᠨ ᠤ ᠳᠠᠭᠠᠪᠤᠷᠢ ᠭᠡᠵᠦ ᠲᠦᠷᠢᠮ ᠭᠤᠷᠢᠮ ᠳᠤ ᠨᠡᠶᠢᠴᠡᠭᠦᠯᠥᠨ ᠵᠦᠪ ᠨᠡᠷᠡᠯᠡᠵᠦ ᠣᠨᠣᠪᠴᠢᠲᠠᠢ ᠵᠢᠭᠠᠵᠤ ᠴᠢᠳᠠᠨ᠎ᠠ᠃ ᠬᠡᠷᠪᠡ ᠨᠡᠶᠢᠯᠡᠭᠦᠯᠥᠭᠡᠳ ᠪᠢᠴᠢᠬᠦ ᠳᠤ ᠬᠦᠷᠪᠡᠯ ᠵᠦᠪᠬᠡᠨ ︽ᠡᠷᠲᠡᠨ ᠤ ᠪᠢᠴᠢᠭ ᠲᠤ ᠢᠩᠭᠢᠵᠦ ᠪᠢᠴᠢᠳᠡᠭ ᠪᠠᠶᠢᠭᠰᠠᠨ︾ ᠭᠡᠵᠦ ᠯᠨ ᠶᠠᠷᠢᠳᠠᠭ ᠠᠴᠠ ᠪᠢᠰᠢ᠂ ᠬᠠᠷᠢᠨ ︽ᠶᠠᠭᠤᠨ ᠤ ᠶᠠᠮᠠᠷ ᠳᠠᠭᠠᠪᠤᠷᠢ︾ ᠭᠡᠵᠦ ᠳᠤᠱᠬᠢᠳᠠᠯ᠎ᠠ ᠨᠡᠷᠡᠯᠡᠵᠦ ᠳᠤᠳᠤᠷᠬᠠᠢ ᠳᠤᠰᠢᠶᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠭᠦᠨ ᠢᠶᠠᠷ ᠦᠯᠦ ᠪᠠᠷᠠᠮ ︽ ᠤ ︵v᠂ u︶᠂ ᠲ᠊ ︵ᠳ᠋᠊︶᠂ ᠪ᠊ ︵b︶︾ ᠵᠡᠷᠭᠡ ᠬᠡᠲᠦᠨ ᠠᠪᠢᠶ᠎ᠠ ᠣᠯᠠᠨ ᠥᠭᠡᠷ᠎ᠡ ᠠᠪᠢᠶ᠎ᠠ ᠪᠤᠯᠤᠨ ᠬᠤᠪᠢᠷᠠᠵᠤ ᠣᠯᠠᠮ ᠶᠠᠷᠰᠢᠭ ᠪᠣᠢ ᠪᠣᠯᠣᠨ᠎ᠠ᠃      ᠬᠤᠶᠠᠷ      ︽ ᠲᠤ ᠬᠢ᠂ ᠳᠤ ᠬᠢ ︵ ᠲᠠᠬᠢ ᠳᠠᠬᠢ︶︾ ᠶᠢᠨ ︽ ᠬᠢ᠂ ᠬᠢᠨ︾ ᠢ ᠱ᠊ · ᠯᠣᠪᠰᠠᠩᠸᠠᠩᠳᠠᠨ ᠤ ︽ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠤᠯ ᠬᠡᠯᠨ︾ ᠳᠤ ︽ᠨᠡᠷ᠎ᠡ ᠦᠭᠡ ᠶᠢᠨ ᠵᠦᠢᠯ ᠠᠴᠠ ᠪᠣᠳᠠᠳᠤ ᠨᠡᠷ᠎ᠡ ᠡᠭᠦᠰᠭᠡᠬᠦ ᠳᠠᠭᠠᠪᠤᠷᠢ︾ ᠭᠡᠵᠦ ᠳᠠᠶᠢᠯᠪᠤᠷᠢᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠭᠡᠬᠦ ᠳᠤ ᠪᠠᠨ ︽ ᠬᠢ᠂ ᠬᠢᠨ ᠢ ᠬᠠᠷᠢᠶᠠᠯᠠᠬᠤ ᠪᠠ ᠦᠭᠬᠦ ᠣᠷᠤᠰᠢᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠬᠡᠯᠪᠡᠷᠢᠲᠦ ᠦᠭᠡᠨ ᠳᠤ ᠵᠠᠯᠭᠠᠨ᠎ᠠ᠃ ︽︿ ᠬᠢ﹀ ᠶᠢ ᠬᠠᠷᠢᠶᠠᠯᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠬᠡᠯᠪᠡᠷᠢᠲᠦ ᠦᠭᠡᠨ ᠳᠤ ᠵᠠᠯᠭᠠᠪᠠᠯ ᠠᠯᠢ ᠨᠢᠭᠡᠨ ᠤ ᠬᠠᠮᠢᠶᠠᠳᠤ ᠬᠦᠮᠥᠨ ᠶᠠᠭᠤᠮ᠎ᠠ ᠶᠢ ᠵᠢᠭᠠᠭᠰᠠᠨ ᠨᠡᠷ᠎ᠡ ᠦᠭᠡ ᠡᠭᠦᠰᠭᠡᠨ᠎ᠡ᠂ ᠦᠭᠬᠦ ᠣᠷᠤᠰᠢᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠬᠡᠯᠪᠡᠷᠢᠲᠦ ᠦᠭᠡᠨ ᠳᠤ ᠵᠠᠯᠭᠠᠪᠠᠯ ᠠᠯᠢ ᠨᠢᠭᠡᠨ ᠬᠦᠮᠥᠨ ᠶᠠᠭᠤᠮ᠎ᠠ ᠶᠢᠨ ᠣᠷᠤᠰᠢᠬᠤ ᠣᠷᠤᠨ ᠢ ᠵᠢᠭᠠᠭᠰᠠᠨ ᠨᠡᠷ᠎ᠡ ᠦᠭᠡ ᠡᠭᠦᠰᠭᠡᠨ᠎ᠡ︾᠂ ︽︿ ᠬᠢᠨ﹀ ᠢ ᠬᠠᠷᠢᠶᠠᠯᠠᠬᠤ ᠪᠣᠶᠣ ᠦᠭᠬᠦ ᠣᠷᠤᠰᠢᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯ ᠤᠨ ᠬᠡᠯᠪᠡᠷᠢᠲᠦ ᠦᠭᠡᠨ ᠳᠤ ᠵᠠᠯᠭᠠᠪᠠᠯ ᠠᠯᠢ ᠨᠢᠭᠡᠨ ᠤ ᠬᠠᠮᠢᠶᠠᠳᠤ ᠬᠦᠮᠥᠨ ᠭᠡᠰᠡᠨ ᠤᠳᠬ᠎ᠠ ᠪᠦᠬᠦᠢ ᠪᠣᠳᠠᠳᠤ ᠨᠡᠷ᠎ᠡ ᠶᠢ ᠡᠭᠦᠰᠭᠡᠨ᠎ᠡ︾ ᠭᠡᠵᠦ ᠳᠤᠰ ᠳᠤᠰ ᠳᠤᠳᠤᠷᠬᠠᠶᠢᠯᠠᠪᠠ᠃ ᠲᠡᠭᠡᠭᠡᠳ ᠠᠬ᠎ᠠ ᠶᠢᠨ ＋ ᠬᠢ ︵ ᠬᠢᠨ︶ ᠊᠊᠊᠊᠊ ᠠᠬ᠎ᠠ ᠶᠢᠨ ᠬᠢ᠂ ᠠᠬ᠎ᠠ ᠶᠢᠨ ᠬᠢᠨ︔ ᠮᠠᠨ ᠤ ＋ ᠬᠢ ︵ ᠬᠢᠨ︶ ᠊᠊᠊᠊᠊᠊᠊ ᠮᠠᠨᠤᠬᠢ᠂ ᠮᠠᠨᠤᠬᠢᠨ ︵ᠪᠣᠰᠤᠳ ᠲᠤᠯᠢ ᠪᠢᠴᠢᠭ ᠪᠠ ᠨᠣᠮ ᠵᠣᠬᠢᠶᠠᠯ ᠳᠤ ᠮᠠᠨᠠᠶᠢᠬᠢ᠂ ᠮᠠᠨᠠᠶᠢᠬᠢᠨ ᠁ ᠭᠡᠵᠦ ᠪᠢᠴᠢᠲᠡᠭ ᠨᠢ ᠴᠤ ᠪᠣᠢ︶︔ ᠲᠡᠲᠡᠨ ᠤ ＋ ᠬᠢ ︵ ᠬᠢᠨ︶ ᠊᠊᠊᠊᠊ ᠲᠡᠲᠡᠨ ᠤ ᠬᠢ᠂ ᠲᠡᠲᠡᠨ ᠤ ᠬᠢᠨ︔ ᠮᠢᠨᠦ ＋ ᠬᠢ ᠊᠊᠊᠊᠊ ᠮᠢᠨᠦᠬᠢ ︔ ᠬᠤᠳᠠ ᠶᠢᠨ ＋ ᠬᠢ ︵ ᠬᠢᠨ︶ ᠊᠊᠊᠊᠊ ᠬᠤᠳᠠ ᠶᠢᠨ ᠬᠢ᠂ ᠬᠤᠳᠠ ᠶᠢᠨ ᠬᠢᠨ︔ ᠪᠡᠭᠡᠵᠢᠩ ᠤᠨ ＋ ᠬᠢ ︵ ᠬᠢᠨ︶ ᠊᠊᠊᠊᠊ ᠪᠡᠭᠡᠵᠢᠩ ᠤᠨ ᠬᠢ᠂ ᠪᠡᠭᠡᠵᠢᠩ ᠤᠨ ᠬᠢᠨ︔ ᠠᠽᠢᠶ᠎ᠠ ᠳᠤ ＋ ᠬᠢ ᠊᠊᠊᠊᠊ ᠠᠽᠢᠶ᠎ᠠ ᠳᠠᠬᠢ︔ ᠲᠡᠯᠡᠬᠡᠢ ᠳᠤ ＋ ᠬᠢ ᠊᠊᠊᠊᠊ ᠲᠡᠯᠡᠬᠡᠢ ᠳᠠᠬᠢ ᠁ ᠭᠡᠬᠦ ᠮᠡᠲᠦ ᠪᠠᠷ ᠵᠢᠱᠢᠶ᠎ᠡ ᠦᠵᠡᠭᠦᠯᠪᠡ᠃ ᠵᠢᠱᠢᠶ᠎ᠡ ᠳᠤ ᠰᠠᠯᠭᠠᠵᠤ ᠪᠢᠴᠢᠭᠰᠡᠨ ᠪᠠ ᠨᠡᠶᠢᠯᠡᠭᠦᠯᠵᠦ ᠪᠢᠴᠢᠭᠰᠡᠨ ᠬᠤᠶᠠᠷ ᠶᠠᠩᠵᠤ ᠶᠢᠨ ᠬᠡᠯᠪᠡᠷᠢ ᠢᠯᠡᠷᠡᠭᠰᠡᠨ ᠪᠦᠭᠡᠳ ᠠᠪᠢᠶ᠎ᠠ ᠬᠤᠪᠢᠷᠠᠭᠰᠠᠨ ᠪᠠ ᠡᠰᠡ ᠬᠤᠪᠢᠷᠠᠭᠰᠠᠨ ᠬᠤᠶᠠᠷ ᠵᠦᠢᠯ ᠤᠨ ᠪᠢᠴᠢᠯᠭᠡ ᠴᠤ ᠪᠣᠢ ᠪᠣᠯᠪᠠ᠃ ᠡᠨᠡ ᠨᠢ ᠵᠦᠪ ᠪᠢᠴᠢᠯᠭᠡ ᠪᠤᠶᠤ ᠲᠦᠷᠢᠮᠵᠢᠭᠦᠨ ᠪᠢᠴᠢᠯᠭᠡ ᠳᠤ ᠶᠡᠭᠡ ᠶᠠᠷᠰᠢᠭ ᠤᠴᠠᠷᠠᠭᠤᠯᠤᠭᠰᠠᠨ ᠪᠦᠭᠡᠳ ᠪᠠᠭᠰᠢ ᠨᠠᠷ ᠤᠨ ᠲᠠᠶᠢᠯᠪᠤᠷᠢᠯᠠᠬᠤ ᠳᠤ ᠴᠤ ᠲᠤᠩ ᠲᠦᠪᠡᠭ ᠪᠣᠯᠭᠠᠪᠠ᠃      ᠲᠡᠭᠡᠲᠦ ᠰᠤᠷᠭᠠᠭᠤᠯᠢ ᠳᠤ ᠵᠣᠷᠢᠭᠤᠯᠤᠭᠰᠠᠨ ︽ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠤᠯ ᠬᠡᠯᠨ︾ ᠳᠤ ︽ ᠬᠢ᠂ ᠬᠢᠨ︾ ᠳᠠᠭᠠᠪᠤᠷᠢ ᠶᠢᠨ ᠲᠤᠬᠠᠢ ᠲᠠᠶᠢᠪᠤᠷᠢᠯᠠᠬᠤ ᠳᠤ ᠪᠠᠨ᠄ ︽ᠬᠠᠷᠢᠶᠠᠯᠠᠬᠤ ᠶᠢᠨ ᠲᠡᠶᠢᠨ ᠢᠯᠭᠠᠯᠲᠤ ᠨᠡᠷ᠎ᠡ ᠦᠭᠡ᠂ ᠲᠦᠯᠥᠭᠡᠨ ᠤ ᠦᠭᠡ ᠬᠢᠭᠡᠳ ᠨᠡᠷ᠎ᠡ ᠦᠭᠡ ᠶᠢᠨ ᠴᠢᠨᠠᠷᠳᠠᠢ ᠵᠠᠷᠢᠮ ᠦᠭᠡᠨ ᠳᠤ ︿ ᠬᠢ﹀ ᠶᠢ ᠵᠠᠯᠭᠠᠪᠠᠯ ᠣᠤᠯ ᠬᠦᠮᠥᠨ ᠂ ᠶᠠᠭᠤᠮ᠎ᠠ ᠶᠢᠨ ᠬᠠᠷᠢᠶᠠᠨ ᠤ ᠪᠤᠶᠤ ᠬᠠᠮᠢᠶᠠᠳᠠᠢ ᠪᠣᠯᠬᠤ ᠤᠳᠬ᠎ᠠ ᠶᠢ︔ ︿ ᠬᠢᠨ﹀ ᠢ ᠵᠠᠯᠭᠠᠪᠠᠯ ᠬᠠᠷᠢᠶᠠᠨ ᠤ ᠬᠠᠮ ᠣᠯᠠᠨ ᠪᠤᠶᠤ ᠬᠠᠮᠢᠶᠠᠳᠠᠢ ᠬᠦᠮᠥᠰ ᠪᠣᠯᠬᠤ ᠤᠳᠬ᠎ᠠ ᠶᠢ ᠵᠢᠭᠠᠭᠰᠠᠨ ᠨᠡᠷ᠎ᠡ ᠦᠬᠡ ᠶᠢ ᠳᠤᠰ ᠳᠤᠰ ᠡᠭᠦᠰᠭᠡᠨ᠎ᠡ︾ ᠭᠡᠵᠦ ᠳᠤᠳᠤᠷᠬᠠᠶᠢᠯᠠᠭᠠᠳ ︽ᠤᠯᠤᠰ ᠤᠨ ᠬᠢ᠂ ᠠᠩᠭᠢ ᠶᠢᠨ ᠬᠢᠨ᠂ ᠮᠢᠨᠦᠬᠢ᠂ ᠤᠷᠠᠨ ᠰᠠᠶᠢᠬᠠᠨ ᠤ ᠬᠢᠨ᠂ ᠭᠠᠳᠠᠭᠠᠳᠤ ᠶᠢᠨ ᠬᠢᠨ ᠁︾ ᠭᠡᠬᠦ ᠮᠡᠲᠦ ᠪᠠᠷ ᠵᠢᠱᠢᠶᠡᠯᠡᠪᠡ᠃ ᠡᠭᠦᠨ ᠳᠤ ︽ᠮᠢᠨᠦᠬᠢ︾ ᠭᠡᠲᠡᠭ ᠦᠭᠡ ᠠᠴᠠ ᠪᠣᠰᠤᠳ ᠢ ᠨᠢ ᠪᠦᠷ ᠰᠠᠯᠭᠠᠵᠤ ᠪᠢᠴᠢᠪᠡ᠃      ᠨᠡᠷ᠎ᠡ ᠦᠭᠡ ︵ᠨᠡᠷ᠎ᠡ ᠦᠭᠡ ᠶᠢᠨ ᠴᠢᠨᠠᠷᠳᠠᠢ ᠵᠠᠷᠢᠮ ᠦᠭᠡ ᠴᠤ ᠪᠠᠭᠳᠠᠨ᠎ᠠ︶ ᠠᠴᠠ ᠨᠡᠷ᠎ᠡ ᠦᠭᠡ ᠡᠭᠦᠰᠭᠡᠬᠦ ᠳᠠᠭᠠᠪᠤᠷᠢ ᠶᠢ ᠶᠤᠰᠤᠨ ᠳᠤ ᠪᠠᠨ ᠨᠡᠶᠢᠯᠡᠭᠦᠯᠵᠦ ᠪᠢᠴᠢᠲᠡᠭ ᠵᠢᠷᠤᠮ ᠲᠠᠢ ᠶᠣᠮ᠃ ᠭᠠᠭᠴᠠ ᠳᠤᠰ ᠳᠠᠭᠠᠪᠤᠷᠢ ᠡᠮᠥᠨᠡᠬᠢ ᠦᠭᠡ ︵ᠦᠨᠳᠦᠰᠦ︶ ᠲᠠᠢ ᠪᠠᠨ ᠲᠡᠶᠢᠨ ᠢᠯᠭᠠᠯ ᠢᠶᠠᠷ ᠵᠠᠭᠠᠭᠯᠠᠭᠳᠠᠭᠰᠠᠨ ᠪᠣᠯᠬᠤᠷ ᠰᠢᠭᠤᠳ ᠵᠠᠯᠭᠠᠵᠤ ᠪᠢᠴᠢᠬᠦ ᠳᠤ ᠪᠡᠷᠬᠡ ᠳᠤᠯᠭᠠᠷᠠᠪᠠ᠃ ᠲᠡᠶᠢᠮᠥ ᠠᠴᠠ ᠲᠡᠭᠡᠷᠡᠬᠢ ᠦᠭᠡᠨ ᠤ ᠪᠠᠶᠢᠳᠠᠯ ᠢ ᠨᠢ ᠦᠵᠡᠵᠦ ᠨᠡᠶᠢᠯᠡᠭᠦᠯᠵᠦ ᠪᠢᠴᠢᠬᠦ ᠪᠠ ᠰᠠᠯᠭᠠᠵᠤ ᠪᠢᠴᠢᠬᠦ ᠬᠡᠲᠦᠨ ᠵᠦᠢᠯ ᠤᠨ ᠪᠠᠶᠢᠳᠠᠯ ᠪᠣᠢ ᠪᠣᠯᠪᠠ᠃ ᠬᠡᠯᠡᠨ ᠵᠦᠢ ᠤᠯᠠᠮ ᠠᠴᠠ ᠤᠯᠠᠮ ᠲᠦᠷᠢᠮᠵᠢᠨ ᠵᠢᠷᠤᠮᠵᠢᠵᠤ ᠡᠲᠦᠷ ᠠᠴᠠ ᠡᠲᠦᠷ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠵᠦᠭ ᠬᠦᠭᠵᠢᠵᠦ ᠪᠠᠶᠢᠳᠠᠭ ᠶᠤᠰᠤᠲᠠᠢ᠃ ᠡᠨᠡ ᠬᠦ ᠵᠢᠮ᠎ᠡ ᠵᠢᠷᠤᠮ ᠢ ᠦᠨᠳᠦᠰᠦᠯᠡᠵᠦ ︽ᠨᠡᠷ᠎ᠡ ᠦᠭᠡ ︵ᠨᠡᠷ᠎ᠡ ᠦᠭᠡ ᠶᠢᠨ ᠴᠢᠨᠠᠷᠳᠠᠢ ᠵᠠᠷᠢᠮ ᠦᠭᠡ ᠴᠤ ᠪᠠᠭᠳᠠᠨ᠎ᠠ︶ ᠶᠢᠨ ᠵᠦᠢᠯ ᠠᠴᠠ ᠨᠡᠷ᠎ᠡ ᠡᠭᠦᠰᠭᠡᠬᠦ ᠳᠠᠭᠠᠪᠤᠷᠢ︾ ᠪᠣᠯᠬᠤ ︽ ᠬᠢ᠂ ᠬᠢᠨ︾ ᠢ ᠴᠤ ︽ ᠲᠤ ᠪᠠᠨ᠂ ᠳᠤ ᠪᠠᠨ︾ ᠲᠠᠢ ᠠᠳᠠᠯᠢᠬᠠᠨ ᠢᠶᠠᠷ ᠪᠦᠷ ᠰᠠᠯᠤᠩᠬᠢᠳᠠ ᠪᠢᠴᠢᠪᠡᠯ ᠶᠠᠮᠠᠷ︖ ᠵᠢᠱᠢᠶᠡᠯᠡᠪᠡᠯ᠄ ᠠᠬ᠎ᠠ ᠶᠢᠨ ᠬᠢ᠂ ᠠᠬ᠎ᠠ ᠶᠢᠨ ᠬᠢᠨ︔ ᠮᠠᠨ ᠤ ＋ ᠬᠢ ︵ ᠬᠢᠨ︶ ᠊᠊᠊᠊᠊᠊᠊ ᠮᠠᠨ ᠤ ᠬᠢ᠂ ᠮᠠᠨ ᠤ ᠬᠢᠨ︔ ᠲᠡᠲᠡᠨ ᠤ ＋ ᠬᠢ ︵ ᠬᠢᠨ︶ ᠊᠊᠊᠊᠊᠊᠊ ᠲᠡᠲᠡᠨ ᠤ ᠬᠢ ᠂ ᠲᠡᠲᠡᠨ ᠤ ᠬᠢᠨ︔ ᠭᠡᠷ ᠲᠤ ᠬᠢ᠂ ᠠᠶᠢᠯ ᠳᠤ ᠬᠢ᠂ ᠲᠢᠪ ᠲᠤ ᠬᠢ᠂ ᠲᠡᠯᠡᠬᠡᠢ ᠳᠤ ᠬᠢ᠂ ᠁ ᠭᠡᠬᠦ ᠮᠡᠲᠦ ᠪᠠᠷ ᠪᠢᠴᠢᠴᠢᠬᠡᠪᠡᠯ ᠰᠠᠶᠢᠨ︕ ᠢᠩᠬᠢᠴᠢᠭᠡᠭᠰᠡᠭᠡᠷ ᠬᠡᠯᠡᠨ ᠵᠦᠢ ᠶᠢᠨ ᠲᠦᠷᠢᠮᠵᠢᠯ ᠪᠠ ᠵᠢᠷᠤᠮᠵᠢᠯ ᠳᠤ ᠠᠰᠢᠭᠳᠠᠢ ᠪᠠᠶᠢᠵᠤ᠂ ᠵᠢᠭᠠᠨ ᠰᠤᠷᠭᠠᠯᠳᠠ ᠳᠤ ᠴᠤ ᠪᠠᠷᠢᠵᠤ ᠲᠦᠰᠢᠬᠦ ᠶᠤᠰᠤ ᠲᠦᠷᠢᠮ ᠲᠠᠢ ᠪᠣᠯᠵᠤ᠂ ᠰᠤᠷᠴᠤ ᠬᠡᠷᠡᠭᠯᠡᠬᠦ ᠳᠤ ᠰᠠᠮᠠᠭᠤᠷᠠᠯ ᠪᠠ ᠡ᠊ᠠᠳᠡᠭᠦᠷᠡᠯ ᠦᠭᠡᠢ ᠪᠣᠯᠣᠨ᠎ᠠ᠃      ᠠᠳᠠᠯᠢ ᠶᠤᠰᠤᠭᠠᠷ ︽ᠮᠢᠨᠦ ᠬᠢ᠂ ᠴᠢᠨᠦ ᠬᠢ᠂ ᠭᠠᠳᠠᠨ᠎ᠠ ᠬᠢ᠂ ᠳᠤᠳᠤᠨ᠎ᠠ ᠬᠢ᠂ ᠨᠠᠮ᠎ᠠ ᠶᠢ᠂ ᠴᠢᠮ᠎ᠠ ᠶᠢ᠂ ᠨᠠᠳᠠ ᠳᠤ᠂ ᠨᠠᠮ᠎ᠠ ᠳᠤ᠂ ᠴᠢᠮ᠎ᠠ ᠳᠤ︾ ᠬᠡᠮᠡᠨ ᠨᠢᠭᠡᠲᠦᠯ ᠲᠠᠢ ᠰᠠᠯᠭᠠᠨ ᠪᠢᠴᠢᠵᠦ ᠲᠦᠷᠢᠮᠵᠢᠬᠦᠯᠵᠦ ᠵᠢᠷᠤᠮᠵᠢᠭᠤᠯᠪᠠᠯ ᠶᠠᠮᠠᠷ︖      ᠵᠠ᠂ ᠪᠢᠳᠠ ᠬᠡᠯᠡᠨ ᠵᠦᠢ ᠶᠢᠨ ᠡᠲᠦᠷ ᠢᠷᠡᠬᠦᠶ᠎ᠡ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢᠯᠠᠬᠤ ᠪᠠ ᠲᠡᠭᠦᠯᠲᠡᠷᠵᠢᠬᠦ ᠶᠢᠨ ᠳᠠᠭᠠᠤ ᠡᠶᠢᠨ ᠬᠦ ᠨᠢᠭᠡᠲᠦᠯᠲᠡᠢ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ ᠵᠦᠢᠯ ᠢ ᠵᠠᠪᠠᠯ ᠨᠢᠭᠡᠲᠦᠯᠲᠡᠢ ᠪᠣᠯᠭᠠᠵᠤ ᠵᠢᠭᠠᠨ ᠰᠤᠷᠭᠠᠬᠤ ᠪᠠ ᠰᠤᠷᠴᠤ ᠬᠡᠷᠡᠭᠯᠡᠬᠦ ᠳᠤ ᠲᠦᠷᠢᠮ ᠵᠢᠷᠤᠮ ᠲᠠᠢ ᠪᠣᠯᠭᠠᠵᠤ ᠶᠠᠪᠤᠪᠠᠯ ᠰᠠᠶᠢᠨ ᠭᠡᠵᠦ ᠵᠥᠪᠯᠡᠵᠦ ᠪᠠᠶᠢᠨ᠎ᠠ︕
 
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠤᠬᠴᠢᠳ ᠲᠤ ᠬᠡᠷᠬᠢᠨ ᠡᠷᠡᠬᠦᠯ ᠮᠡᠨᠳᠤ ᠪᠡᠶ᠎ᠡ ᠰᠡᠳᠬᠢᠴᠡ ᠶᠢᠨ ᠵᠢᠯᠣᠭᠤᠳᠤᠮᠵᠢ ᠬᠢᠬᠦ ᠁
ᠬᠡᠯᠡ ᠪᠢᠴᠢᠭ ᠤᠨ ᠪᠠᠭᠰᠢ ᠪᠤᠯᠤᠭᠰᠠᠳ ᠰᠤᠷᠤᠭᠴᠢᠳ ᠤᠨ ᠬᠢᠷᠢ ᠲᠡᠩᠴᠡᠭᠰᠡᠨ ︽ᠨᠠᠶᠢᠷᠠᠭᠤᠯᠤᠭᠴᠢ︾ ᠪᠤᠯᠬᠤ ᠁
ᠰᠤᠷᠭᠠᠨ ᠬᠦᠮᠥᠵᠢᠯ ᠤᠨ ᠶᠠᠮᠤᠨ᠄ ᠰᠤᠷᠤᠯᠴᠠᠬᠤ ᠴᠢᠳᠠᠪᠤᠷᠢ ᠲᠠᠢ ᠰᠤᠷᠭᠠᠭᠤᠯᠢ ᠶᠢᠨ ᠨᠠᠰᠤᠨ ᠤ ᠵᠡᠮᠳᠡᠭ ᠬᠡᠤᠬᠡᠳ ᠁
ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠤᠭᠴᠢ ᠡᠯᠰᠡᠬᠦ ᠰᠢᠯᠭᠠᠯᠲᠠ ᠠᠴᠠ ᠡᠮᠦᠨ᠎ᠡ ᠢᠩᠭᠢᠵᠦ ᠬᠢᠪᠡᠯ ᠨᠡᠩ ᠰᠠᠶᠢᠨ
ᠰᠤᠷᠤᠭᠴᠢᠳ ᠰᠢᠯᠭᠠᠯᠳᠠ ᠳᠤ ᠤᠷᠤᠯᠴᠠᠵᠤ ᠪᠠᠶᠢᠬᠤ ᠲᠠᠭᠠᠨ ᠬᠠᠯᠠᠭᠤᠷᠠᠵᠤ ᠬᠠᠨᠢᠶᠠᠪᠠᠯ ᠶᠠᠭᠠᠬᠢᠬᠤ ᠪᠤᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号