ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠵᠠᠮᠤᠬ᠎ᠠ ᠶᠢ ᠴᠢᠰᠤ ᠦᠵᠡᠬᠦ ᠦᠭᠡᠢ ᠪᠠᠷ ᠨᠦᠭᠴᠢᠭᠡᠭᠰᠡᠨ ᠤ ᠤᠴᠢᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-12-06
     ᠵᠠᠮᠤᠬ᠎ᠠ ᠭᠡᠭᠰᠡᠭᠡᠷ ᠶᠢᠷᠲᠢᠨᠴᠤ ᠪᠠᠷ ᠢᠶᠠᠨ ᠮᠠᠭᠤᠯᠠᠳᠠᠭ︕ ᠬᠤᠯᠵᠢᠨ ᠵᠠᠯᠢᠬᠠᠢ᠂ ᠬᠤᠶᠠᠷ ᠨᠢᠭᠤᠷᠲᠠᠨ᠂ ᠬᠤᠩᠰᠢᠶᠠᠷ ᠬᠤᠳᠠᠯᠳᠤᠭᠴᠢ ᠭᠡᠬᠦ ᠵᠡᠷᠭᠡ ᠪᠠᠷ ᠳᠦᠷᠰᠤᠯᠡᠬᠦ ᠶᠢᠨ ᠮᠠᠭᠤ ᠪᠠᠷ ᠳᠦᠷᠰᠤᠯᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠺᠢᠨᠣ᠋ ᠲᠧᠯᠸᠢᠰ ᠬᠦᠷᠲᠡᠯ᠎ᠡ ᠠᠪᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠳᠦᠷᠢ ᠪᠠᠷ ᠪᠦᠲᠦᠭᠡᠭᠰᠡᠨ ᠪᠠᠶᠢᠳᠠᠭ︕ ᠭᠡᠶ᠎ᠡ᠂ ᠴᠢᠩᠭᠢᠰ ᠬᠠᠭᠠᠨ ᠬᠦᠷᠲᠡᠯ᠎ᠡ ᠵᠠᠮᠤᠬ᠎ᠠ ᠶᠢ ᠮᠠᠭᠤ ᠭᠡᠵᠤ ᠬᠡᠯᠡᠭᠰᠡᠨ ᠦᠭᠡᠢ ᠪᠠᠶᠢᠲᠠᠯ᠎ᠠ᠂ ᠣᠣᠯᠢᠬᠠᠢ ᠮᠠᠭᠤ ᠲᠡᠣᠬᠡᠴᠢᠳ ᠯᠠ ᠣᠬᠠᠭᠠᠨ ᠨᠢ ᠲᠣᠲᠠᠭᠤ ᠶᠣᠮ ᠪᠣᠯᠬᠤᠷ ᠳᠣᠷ᠎ᠠ ᠮᠡᠳᠡᠨ ᠴᠠᠯᠴᠢᠭᠰᠠᠨ ᠠᠴᠠ ᠪᠣᠯᠣᠭᠰᠠᠨ ᠭᠡᠳᠡᠭ ᠨᠢ ᠭᠠᠷᠴᠠᠭ᠎ᠠ ᠦᠭᠡᠢ ᠶᠣᠮ᠃ ᠬᠠᠷᠢᠨ ᠣᠷᠴᠢᠮ ᠤᠨ ᠬᠡᠳᠣᠨ ᠵᠢᠯ ᠠᠴᠠ ᠵᠠᠮᠤᠬ᠎ᠠ ᠶᠢ ᠴᠠᠭᠠᠳᠬᠠᠬᠤ ᠬᠠᠨᠳᠤᠰᠢ ᠭᠠᠷᠴᠤ ᠪᠠᠶᠢᠭ᠎ᠠ ᠨᠢ ᠨᠢᠭᠡ ᠶᠡᠭᠡ ᠳᠠᠪᠰᠢᠯᠲᠠ ᠭᠡᠵᠤ ᠬᠡᠯᠡᠵᠤ ᠪᠣᠯᠬᠤ ᠶᠣᠮ᠃ ᠠᠲᠡ᠂ ᠪᠢ ᠪᠠᠷ ᠲᠡᠮᠤᠵᠢᠨ᠂ ᠵᠠᠮᠤᠬ᠎ᠠ ᠬᠤᠶᠠᠷ ᠤᠨ ᠠᠨᠳᠠ ᠶᠢᠨ ᠰᠠᠪᠳᠠᠯ ᠡᠭᠦᠰᠦᠭᠰᠡᠨ ᠰᠢᠯᠲᠠᠭᠠᠨ ᠢ ᠮᠣᠩᠭᠤᠯ ᠤᠨ ᠵᠠᠩ ᠰᠡᠳᠭᠢᠬᠦᠢ ᠪᠠᠷ ᠨᠢᠭᠤᠴᠠ ᠲᠣᠪᠴᠢᠶᠠᠨ ᠳᠤ ᠲᠣᠯᠭᠠᠭᠤᠷᠢᠯᠠᠵᠤ ᠮᠦᠷᠳᠠᠯᠲᠠ ᠬᠢᠵᠤ ᠦᠵᠡᠯ᠎ᠡ᠃      ︽ᠣᠰᠣᠨ ᠳᠠᠮᠵᠢᠭᠤᠷ ᠢᠶᠠᠷ ᠭᠠᠯᠵᠠᠭᠤ ᠨᠣᠬᠠᠢ ᠶᠢ ᠴᠣᠬᠢᠪᠠᠯ ᠠᠯᠠᠳᠠᠭ ᠲᠠᠩᠭᠠᠷᠢᠭ ᠲᠠᠢ︕︾ ︽ᠲᠠᠶᠠ ︵ᠲᠠᠮᠠᠬᠢ ᠲᠠᠲᠠᠬᠤ ᠳ᠋ᠠᠢ︶ ᠪᠠᠷ ᠬᠦᠮᠤᠨ ᠤ ᠲᠤᠯᠤᠭᠠᠢ ᠶᠢ ᠴᠣᠬᠢᠪᠠᠯ ᠦᠮᠦᠷᠳᠡᠭ ᠲᠠᠩᠭᠠᠷᠢᠭ ᠲᠠᠢ︕︾ ᠁ ᠭᠡᠬᠦ ᠵᠡᠷᠭᠡ ᠠᠴᠠ ᠲᠠᠩᠭᠠᠷᠢᠭ ᠨᠢ ᠶᠠᠮᠠᠷ ᠨᠢᠭᠡᠨ ᠳᠠᠯᠳᠠ ᠶᠢᠨ ᠷᠢᠳᠢ ᠰᠢᠳᠢ ᠠᠴᠠ ᠪᠣᠯᠵᠤ ᠵᠠᠶᠢᠯᠠᠰᠢ ᠦᠭᠡᠢ ᠦᠷ᠎ᠡ ᠳ᠋ᠦᠩ ᠢ ᠠᠪᠴᠢᠷᠠᠳᠠᠭ ᠭᠡᠮᠡᠨ ᠦᠵᠡᠳᠡᠭ᠃      ᠦᠨᠡᠨ ᠳᠡᠭᠡᠨ ᠲᠡᠭᠦᠨ ᠤ ᠴᠠᠭᠠᠨ᠎ᠠ ᠨᠢ ᠪᠦᠷ ᠶᠣᠰᠣ ᠣᠴᠢᠷ ᠪᠠᠶᠢᠳᠠᠭ ᠶᠣᠮ᠃ ᠲᠠᠪᠣᠨ ᠮᠠᠬᠠᠪᠣᠳ ᠢᠶᠠᠷ ᠦᠵᠡᠪᠡᠯ ᠭᠠᠯ ᠣᠰᠣ ᠬᠠᠷᠰᠢ ᠲᠣᠯᠠ ᠭᠠᠯ ᠤᠨ ᠢᠵᠠᠭᠤᠷ ᠲᠠᠢ ᠭᠠᠯᠵᠠᠭᠤ ᠶᠢ ᠣᠰᠣᠨ ᠤ ᠡᠳ᠋ᠯᠡᠯ ᠣᠰᠣᠨ ᠳᠠᠮᠵᠢᠭᠤᠷ ᠢᠶᠠᠷ ᠴᠤᠬᠢᠳᠠᠭ ᠨᠢ ᠶᠣᠰᠣᠲᠠᠢ᠂ ᠵᠦᠢᠲᠠᠢ᠂ ᠲᠠᠩᠭᠠᠷᠢᠭ ᠲᠠᠢ᠂ ᠵᠠᠶᠢᠯᠠᠰᠠᠢ ᠭᠡᠰᠡᠨ ᠣᠴᠢᠷ ᠶᠣᠮ᠃ ᠲᠠᠮᠠᠬᠢ ᠶᠢᠨ ᠭᠠᠩᠰᠠ ︵ᠲᠠᠶᠠ︶ ᠪᠠᠷ ᠬᠦᠮᠣᠨ ᠢ ᠴᠤᠬᠢᠵᠤ ᠪᠣᠯᠬᠤ ᠦᠭᠡᠢ ᠲᠠᠩᠭᠠᠷᠢᠭ ᠲᠠᠢ ᠭᠡᠳᠡᠭ ᠨᠢ ᠭᠠᠩᠰᠠ ᠨᠢ ᠭᠠᠯ ᠬᠡᠷᠡᠭᠰᠡᠳᠡᠭ ᠲᠣᠯᠠ ᠲᠡᠭᠦᠨ ᠢ ᠪᠠᠨ ᠬᠠᠮᠤᠭ ᠵᠢᠵᠢᠭ ᠭᠤᠯᠣᠮᠲᠠ ᠭᠡᠵᠤ ᠦᠵᠡᠳᠡᠭ᠂ ᠬᠦᠮᠤᠨ ᠤ ᠲᠤᠯᠤᠭᠠᠢ ᠶᠢ ᠴᠤᠬᠢᠬᠤ ᠨᠢ ᠲᠤᠯᠭ᠎ᠠ ᠪᠠᠷ ᠢᠶᠠᠨ ᠬᠦᠮᠤᠨ ᠴᠤᠬᠢᠭᠰᠠᠨ ᠣᠴᠢᠷ ᠪᠣᠯᠬᠤ ᠶᠣᠮ ᠪᠠᠶᠢᠨ᠎ᠠ᠃ ᠣᠷᠳᠣᠰᠴᠣᠳ ᠡᠴᠢᠭᠡ ᠬᠦᠤ ᠡᠰᠡ ᠲᠠᠭᠠᠷᠠᠯᠴᠠᠵᠤ ᠰᠠᠯᠣᠯᠴᠠᠬᠤ ᠶᠢ ︽ᠲᠠᠩᠭᠠᠷᠢᠭ ᠠᠯᠳᠠᠪᠠ︾ ᠭᠡᠳᠡᠭ ᠨᠢ ᠵᠠᠶᠢᠯᠠᠰᠢ ᠦᠭᠡᠢ ᠵᠢᠮ᠎ᠠ ᠶᠣᠰᠣ ᠠᠴᠠ ᠭᠠᠵᠢᠭᠰᠠᠨ ᠲᠡᠷᠰᠡᠯᠡᠭᠰᠡᠨ ᠤᠴᠢᠷ ᠢ ᠵᠢᠭᠠᠭᠰᠠᠨ ᠪᠠᠶᠢᠳᠠᠭ᠃ ᠁ ᠡᠭᠦᠨ ᠲᠠᠢ ᠠᠳᠠᠯᠢ ᠬᠦᠮᠣᠨ ᠤ ᠴᠡᠭᠡᠵᠢᠨ ᠠᠴᠠ ᠭᠠᠷᠣᠭᠰᠠᠨ ᠦᠭᠡᠨ ᠨᠢ ᠴᠤ ᠰᠠᠶᠢᠨ ᠪᠣᠯ ᠰᠠᠶᠢᠨ ᠦᠷ᠎ᠡ᠂ ᠮᠠᠭᠤ ᠪᠣᠯ ᠮᠠᠭᠤ ᠦᠷ᠎ᠡ ᠶᠢ ᠠᠪᠴᠢᠷᠠᠳᠠᠭ ᠵᠠᠶᠢᠯᠠᠰᠢ ᠦᠭᠡᠢ ᠵᠢᠮ᠎ᠠ ᠲᠠᠩᠭᠠᠷᠢᠭ ᠲᠠᠢ ᠭᠡᠵᠤ ᠮᠣᠩᠭᠤᠯᠴᠣᠳ ᠦᠵᠡᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠬᠡᠯᠡᠭᠡᠳ ᠪᠠᠲᠣᠯᠠᠭᠠᠳ ᠭᠠᠷᠭᠠᠭᠰᠠᠨ ᠦᠭᠡ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠶᠢᠨ ᠲᠦᠯᠤᠭᠡ ᠨᠠᠰᠣᠨ ᠲᠣᠷᠰᠢ ᠲᠡᠮᠡᠴᠡᠳᠡᠭ ᠪᠦᠯᠤᠭᠡ ︕ ᠲᠡᠮᠣᠵᠢᠨ᠂ ᠵᠠᠮᠤᠬ᠎ᠠ ᠶᠢᠨ ᠠᠨᠳᠠᠯᠠᠭᠰᠠᠨ ᠲᠡᠣᠬᠡ ᠴᠤ ᠲᠡᠶᠢᠮᠤ ᠶᠣᠮ︕ ᠭᠡᠬᠦ ᠳᠤ ᠮᠠᠨ ᠲᠡᠣᠬᠡᠴᠢᠳ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠤᠨ ᠶᠤᠰᠤ ᠶᠢ ᠬᠡᠣᠬᠡᠳ ᠤᠨ ᠨᠠᠭᠠᠳᠣᠮ ᠢᠶᠠᠷ ᠦᠵᠡᠵᠤ ᠰᠣᠶᠣᠯ ᠰᠡᠳᠭᠢᠬᠦᠢ ᠣᠷᠣᠭᠤ ᠪᠠᠨ ᠣᠰᠣ ᠴᠢᠳᠬᠤᠭᠰᠠᠨ ᠨᠣᠮ ᠪᠢᠴᠢᠳᠡᠭ ᠢ ᠶᠠᠭᠠᠬᠢᠨ᠎ᠠ ᠳ᠋ᠠ︕      ᠵᠠᠮᠤᠬ᠎ᠠ᠂ ᠲᠡᠮᠣᠵᠢᠨ ᠤ ᠠᠨᠳᠠ ᠪᠣᠯᠣᠯᠴᠠᠭᠰᠠᠨ ᠦᠩᠭᠡᠷᠡᠯᠲᠡ ᠪᠣᠯ ᠲᠡᠮᠣᠵᠢᠨ ᠢ ᠠᠷᠪᠠᠨ ᠨᠢᠭᠡ ᠲᠠᠢ ᠵᠢᠯ ᠳᠤ ᠬᠠᠷᠢᠯᠴᠠᠨ ᠱᠠᠭ᠎ᠠ ᠰᠣᠯᠢᠯᠴᠠᠨ ᠠᠨᠳᠠᠯᠠᠪᠠ᠃ ᠳᠠᠷᠠᠭ᠎ᠠ ᠵᠢᠯ ᠨᠢ ᠬᠠᠷᠢᠯᠴᠠᠨ ᠰᠣᠮᠣ ᠰᠣᠯᠢᠯᠴᠠᠨ ᠠᠨᠳᠠᠯᠠᠪᠠ᠃ ᠡ᠊ᠨᠳᠡ ᠲᠣᠳᠣᠷᠬᠠᠶᠢᠯᠠᠬᠤ ᠨᠢ᠂ ᠮᠠᠨ ᠤ ᠡᠷᠳᠡᠮᠲᠡᠨ ᠮᠡᠷᠭᠡᠲᠡᠨ ᠲᠠᠩᠭᠠᠷᠢᠭ ᠰᠣᠯᠢᠯᠴᠠᠬᠤ ᠶᠢ ᠬᠠᠷᠢᠨ ᠪᠡᠯᠡᠭ ᠰᠣᠯᠢᠯᠴᠠᠵᠤ ᠪᠠᠶᠢᠬᠤ ᠪᠠᠷ ᠨᠣᠮ ᠵᠣᠬᠢᠶᠠᠯ ᠳᠠᠭᠠᠨ ᠲᠡᠮᠳᠡᠭᠯᠡᠵᠤ ᠪᠠᠶᠢᠳᠠᠭ᠃ ᠲᠡᠷᠡ ᠪᠣᠯ ᠪᠣᠷᠣᠭᠤ ᠶᠣᠮ᠃ ᠣᠴᠢᠷ ᠨᠢ ᠠᠨᠳᠠ ᠶᠢᠨ ᠵᠢᠷᠣᠮ ᠠᠴᠠ ᠬᠠᠷᠢᠯᠴᠠᠨ ᠭᠠᠵᠠᠭᠤ ᠦᠭᠡᠢ ᠪᠣᠯ ᠶᠠᠷᠢᠶᠠᠨ ᠦᠭᠡᠢ ᠬᠠᠷᠢᠯᠴᠠᠨ ᠰᠣᠯᠢᠯᠴᠠᠭᠰᠠᠨ ᠡᠳ᠋ ᠨᠢ ᠮᠦᠩᠬᠡ ᠶᠢᠨ ᠰᠠᠶᠢᠬᠠᠨ ᠳᠣᠷᠠᠰᠬᠠᠯ ᠪᠣᠯᠵᠤ ᠪᠡᠯᠡᠭ ᠪᠣᠯᠵᠤ ᠬᠤᠴᠣᠷᠤᠨ᠎ᠠ᠃ ᠬᠡᠷᠪᠡ ᠲᠠᠩᠭᠠᠷᠢᠭ ᠠᠯᠳᠠᠪᠠᠯ ᠰᠤᠯᠢᠯᠴᠠᠭᠰᠠᠨ ᠬᠢᠲᠤᠭ᠎ᠠ᠂ ᠰᠤᠮᠤᠨ ᠤ ᠪᠠᠨ ᠲᠣᠣᠷ᠎ᠡ ᠠᠮᠢ ᠪᠠᠨ ᠦᠭᠳᠡᠭ ᠬᠠᠲᠠᠭᠤ ᠶᠤᠰᠤ ᠲᠠᠢ ᠲᠤᠯᠠ ᠪᠡᠯᠡᠭ ᠤᠨ ᠶᠠᠭᠤᠮ᠎ᠠ ᠪᠠᠷ ᠦᠵᠡᠵᠤ ᠪᠤᠯᠬᠤ ᠦᠭᠡᠢ ᠶᠤᠮ᠃ ᠲᠡᠭᠦᠨ ᠢ ᠪᠡᠯᠡᠭ ᠭᠡᠬᠦ ᠦᠭᠡᠢ ᠲᠠᠩᠭᠠᠷᠢᠭ ᠭᠡᠳᠡᠭ︕ ᠠᠩᠬ᠎ᠠ ᠱᠠᠭ᠎ᠠ ᠰᠣᠯᠢᠯᠴᠠᠭᠰᠠᠨ ᠪᠤᠯ ᠡᠩ ᠤᠨ ᠨᠠᠶᠢᠵᠠ ᠨᠦᠬᠦᠷ ᠤᠨ ᠬᠡᠯᠪᠡᠷᠢ ᠲᠠᠢ ᠠᠨᠳᠠ ᠪᠠᠶᠢᠭᠰᠠᠨ ᠪᠤᠯ ᠬᠤᠶᠠᠳᠤᠭᠠᠷ ᠤᠳᠠᠭ᠎ᠠ ᠰᠤᠮᠤ ᠰᠤᠯᠢᠯᠴᠠᠭᠰᠠᠨ ᠪᠤᠯ ᠨᠢᠭᠡᠨᠲᠡ ᠠᠮᠢᠨ ᠳᠤ ᠣᠷᠣᠬᠤ ᠬᠠᠲᠠᠭᠤ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠪᠠᠶᠢᠨ᠎ᠠ᠃ ︽ᠠᠨᠳᠠ ᠬᠦᠮᠤᠨ ᠠᠮᠢᠨ ᠨᠢᠭᠡ᠂ ᠦᠯᠤ ᠲᠠᠪᠴᠢᠯᠳᠤᠨ᠂ ᠠᠮᠢᠨ ᠤ ᠠᠷᠠᠴᠢ ᠪᠤᠯᠤᠶᠤ︕︾ ᠭᠡᠬᠦ ᠦᠭᠡ ᠠᠴᠠ ᠦᠢᠯᠠᠭᠠᠵᠤ ᠪᠤᠯᠤᠨ᠎ᠠ᠃ ᠲᠡᠭᠡᠪᠡᠯ ᠪᠦᠷᠲᠡ ᠦᠵᠡᠨ ᠢ ᠮᠡᠷᠭᠡᠳ ᠠᠴᠠ ᠪᠤᠴᠠᠭᠠᠵᠤ ᠠᠪᠴᠢᠷᠠᠬᠤ ᠳᠠᠶᠢᠨ ᠳᠤ ᠤᠯᠵᠠᠯᠠᠭᠰᠠᠨ ᠬᠤᠪᠢ ᠬᠤᠪᠢᠨ ᠤ ᠠᠯᠲᠠᠨ ᠪᠦᠰᠠ ᠪᠠᠨ ᠬᠠᠷᠢᠯᠴᠠᠨ ᠰᠤᠯᠢᠯᠴᠠᠭᠰᠠᠨ ᠪᠤᠯ ᠨᠡᠩ ᠣᠳᠬ᠎ᠠ ᠭᠦᠨ ᠶᠤᠮ᠃ ᠮᠤᠩᠭᠤᠯ ᠶᠤᠰᠤᠨ ᠳᠤ ᠡᠩ ᠤᠨ ᠪᠠᠶᠢᠳᠠᠯ ᠳᠤ ᠪᠦᠰᠠ ᠪᠠᠨ ᠬᠦᠮᠤᠨ ᠳᠤ ᠦᠭᠬᠦ ᠪᠤᠶᠤ ᠰᠤᠯᠢᠯᠴᠠᠳᠠᠭ ᠦᠭᠡᠢ ᠶᠤᠮ᠃ ᠣᠴᠢᠷ ᠨᠢ ᠡᠷ᠎ᠡ ᠬᠦᠮᠤᠨ ᠤ ᠪᠦᠰᠠᠨ ᠳᠤ ᠬᠡᠢ ᠮᠤᠷᠢ ᠰᠦᠯᠲᠠ ᠪᠤᠶᠤ ᠰᠦᠨᠡᠰᠤ ᠮᠦᠷ ᠨᠢ ᠣᠷᠣᠰᠢᠳᠠᠭ ᠭᠡᠬᠦ ᠶᠠᠷᠢᠶ᠎ᠠ ᠪᠤᠢ ᠶᠤᠮ᠃ ᠡᠭᠦᠨ ᠢᠶᠠᠷ ᠮᠦᠷᠳᠡᠪᠡᠯ ᠵᠠᠮᠤᠬ᠎ᠠ ᠲᠡᠮᠤᠵᠢᠨ ᠤ ᠠᠨᠳᠠ ᠪᠤᠯ ᠡᠩ ᠵᠢᠷ ᠤᠨ ᠪᠢᠰᠢ᠂ ᠰᠦᠭ ᠰᠦᠨᠡᠰᠤ ᠪᠠᠨ ᠬᠦᠷᠲᠡᠯ᠎ᠡ ᠰᠤᠯᠢᠯᠴᠠᠵᠤ ᠬᠠᠭᠠᠴᠠᠵᠤ ᠪᠤᠯᠤᠰᠢ ᠦᠭᠡᠢ ᠠᠮᠢᠨ ᠳᠤ ᠤᠷᠤᠭᠰᠠᠨ ᠠᠨᠳᠠ ᠭᠡᠳᠡᠭ ᠨᠢ ᠵᠠᠶᠢᠯᠠᠰᠢ ᠦᠭᠡᠢ ᠶᠤᠮ ᠪᠠᠶᠢᠨ᠎ᠠ︕ ᠢᠩᠬᠢᠵᠤ ᠡᠨᠡ ᠬᠤᠶᠠᠷ ᠠᠨᠳᠠ ᠴᠢᠨᠤ ᠮᠢᠨᠤ ᠦᠭᠡᠢ ᠵᠢᠯ ᠭᠠᠷᠤᠢ ᠨᠢᠭᠡ ᠬᠦᠨᠵᠢᠯᠡ ᠳᠤ ᠦᠩᠬᠦᠷᠢᠵᠤ ᠦᠵᠡᠭᠰᠡᠨ ᠪᠠᠶᠢᠳᠠᠭ︕ ᠨᠤᠲᠤᠭ ᠨᠡᠭᠦᠬᠦ ᠳᠤ ᠵᠠᠮᠤᠬ᠎ᠠ ︽᠁ ᠭᠤᠤᠯ ᠰᠢᠬᠠᠨ ᠪᠠᠭᠤᠶ᠎ᠠ᠂ ᠬᠤᠨᠢᠴᠢᠳ ᠬᠤᠷᠠᠭᠠᠴᠢᠳ ᠪᠢᠳᠠᠨᠤ ᠬᠤᠭᠤᠯᠠᠶ᠎ᠠ ᠬᠦᠷᠲᠤᠭᠡᠢ︕︾ ᠭᠡᠰᠡᠨ ᠢ ᠲᠡᠮᠤᠵᠢᠨ ᠤᠬᠠᠵᠤ ᠶᠠᠳᠠᠨ ᠦᠭᠡᠯᠤᠨ ᠡᠬᠡ ᠠᠴᠠ ᠠᠰᠠᠭᠤᠬᠤ ᠪᠠᠷ ᠬᠦᠷᠴᠤ ᠤᠴᠢᠬᠤ ᠳᠤ ᠦᠭᠡᠯᠤᠨ ᠡᠬᠡ ᠶᠢ ᠳᠣᠣᠭᠠᠷᠴᠤ ᠠᠮᠵᠢᠬᠤ ᠠᠴᠠ ᠡᠮᠤᠨ᠎ᠠ ᠡᠬᠡᠨᠡᠷ ᠪᠦᠷᠲᠡ ︽ᠵᠠᠮᠤᠬ᠎ᠠ ᠠᠨᠳᠠ ᠦᠢᠳᠠᠩᠬ᠎ᠠ ᠭᠡᠮᠡᠭᠲᠡ ᠪᠦᠯᠤᠭᠡ᠂ ᠡᠳᠤᠭᠡ ᠪᠢᠳᠠᠨ ᠠᠴᠠ ᠦᠢᠳᠬᠤ ᠴᠠᠭ ᠪᠤᠯᠪᠠ᠃ ᠁ ᠪᠢᠳᠠ ᠪᠤᠤ ᠪᠠᠭᠤᠶ᠎ᠠ᠂ ᠡᠨᠠ ᠬᠦᠳᠡᠯᠦᠭᠰᠡᠭᠡᠷ ᠰᠢᠯᠤᠭᠤᠶ᠎ᠠ ᠁︾ ᠭᠡᠵᠤ ᠵᠠᠮᠤᠬ᠎ᠠ ᠠᠴᠠ ᠰᠠᠯᠵᠤ ᠶᠠᠪᠤᠭᠰᠠᠨ ᠪᠠᠶᠢᠨ᠎ᠠ᠃      ᠡᠭᠦᠨ ᠳᠤ ᠵᠠᠮᠤᠬ᠎ᠠ ᠦᠨᠡᠨ ᠲᠡᠶᠢᠮᠤ ᠰᠠᠨᠠᠭ᠎ᠠ ᠲᠠᠢ ᠬᠡᠯᠡᠭᠰᠡᠨ ᠢᠶᠠᠷ ᠪᠤᠳᠤᠬᠤ ᠳᠤ ᠴᠢᠨᠤ ᠮᠢᠨᠤ ᠦᠭᠡᠢ ᠪᠠᠶᠢᠭᠰᠠᠨ ᠠᠨᠳᠠ ᠠᠴᠠ ᠪᠠᠨ ᠲᠡᠮᠤᠵᠢᠨ᠂ ᠦᠭᠡ ᠳᠠᠭᠤᠨ ᠦᠭᠡᠢ ᠪᠠᠷ ᠡᠬᠡᠨᠡᠷ ᠤᠨ ᠢᠶᠠᠨ ᠦᠭᠡ ᠪᠠᠷ ᠰᠠᠯᠵᠤ ᠤᠳᠬᠤ ᠳᠤ ᠵᠠᠮᠤᠬ᠎ᠠ ᠪᠠᠶᠢᠲᠤᠭᠠᠢ ᠡᠩ ᠵᠢᠷ ᠤᠨ ᠠᠷᠠᠳ ᠪᠤᠯᠪᠠᠴᠤ ᠭᠤᠮᠳᠠᠬᠤ ᠦᠭᠡᠢ ᠴᠤ ᠭᠡᠰᠡᠨ ᠶᠠᠭᠤᠮ᠎ᠠ ᠪᠤᠳᠤᠬᠤ ᠦᠭᠡᠢ ᠣᠴᠢᠷ ᠪᠠᠶᠢᠨ᠎ᠠ ᠤᠤ︖ ᠲᠡᠭᠡᠪᠡᠯ᠂ ᠲᠡᠮᠤᠵᠢᠨ ᠨᠢ ᠡᠬᠡᠨᠡᠷ ᠤᠨ ᠢᠶᠠᠨ ᠦᠭᠡ ᠠᠴᠠ ᠳᠠᠪᠠᠵᠤ ᠴᠢᠳᠠᠬᠤ ᠦᠭᠡᠢ ᠣᠤᠯᠢᠬᠠᠢ ᠡᠷ᠎ᠡ ᠪᠤᠯᠴᠢᠬᠠᠪᠠᠣ ᠭᠡᠪᠡᠯ ᠠᠷᠡᠢ ᠲᠡᠶᠢᠮᠤ ᠪᠢᠰᠢ ᠶᠤᠮ᠃ ᠶᠠᠭᠤ ᠭᠡᠪᠡᠯ᠂ ᠲᠡᠮᠤᠵᠢᠨ ᠡᠮ᠎ᠡ ᠦᠷ᠎ᠡ ᠠᠪᠴᠤ᠂ ᠡᠷ᠎ᠡ ᠶᠢᠨ ᠴᠡᠭᠡᠯ ᠳᠤ ᠬᠦᠷᠦᠭᠰᠡᠨ ᠭᠡᠳᠡᠭ ᠴᠤ ᠠᠷᠪᠠᠨ ᠨᠠᠰᠤᠨ ᠳᠠᠭᠠᠨ ᠠᠪᠦ ᠶᠢᠨ ᠬᠠᠶᠢᠷ᠎ᠠ ᠠᠴᠠ ᠬᠠᠭᠠᠴᠠᠵᠤ᠂ ᠠᠭᠤᠤ ᠶᠡᠭᠡ ᠦᠭᠡᠯᠤᠨ ᠡᠬᠡ ᠶᠢᠨ ᠬᠠᠶᠢᠷ᠎ᠠ ᠰᠤᠷᠭᠠᠯ ᠳᠤ ᠦᠰᠴᠤ ᠲᠤᠷᠨᠢᠭᠰᠡᠨ ᠤ ᠬᠤᠪᠢ ᠳᠤ ᠡᠮᠡᠭᠲᠠᠢ ᠬᠦᠮᠤᠨ ᠤ ᠨᠠᠷᠢᠨ ᠣᠬᠠᠪᠣᠷᠢ ᠲᠦᠰᠢᠵᠤ ᠮᠣᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠤ ᠠᠩᠬᠠᠯᠠᠨ ᠪᠤᠰᠴᠤ ᠵᠤᠭᠰᠤᠭᠰᠠᠨ ᠲᠠᠢ ᠨᠢᠭᠳᠠ ᠬᠠᠷᠢᠴᠠᠭ᠎ᠠ ᠲᠠᠢ ᠶᠤᠮ᠃ ᠶᠠᠭ ᠡ᠊ᠨᠡ ᠬᠦ ᠲᠠᠯ᠎ᠠ ᠳᠡᠭᠡᠷ᠎ᠡ ᠡᠬᠡᠨᠡᠷ ᠤᠨ ᠦᠭᠡᠨ ᠳᠤ ᠣᠷᠣᠵᠤ᠂ ᠵᠠᠮᠤᠬ᠎ᠠ ᠠᠨᠳᠠ ᠶᠢᠨ ᠰᠠᠳᠭᠢᠯ ᠳᠤ ᠰᠠᠪ ᠰᠠᠭᠤᠯᠭᠠᠭᠰᠠᠨ ᠶᠤᠮ᠃      ᠵᠠᠮᠤᠬ᠎ᠠ ᠪᠠᠷ ᠵᠢᠭᠠᠬᠠᠨ ᠴᠤ ᠭᠡᠰᠡᠨ ᠰᠡᠳᠭᠢᠯ ᠳᠡᠭᠡᠨ ᠰᠡᠵᠢᠭ ᠲᠠᠭᠠᠪᠤᠷᠢ ᠲᠠᠢ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ ᠳᠡᠮᠡᠢ ᠤᠳᠠᠯ ᠦᠭᠡᠢ ᠲᠡᠮᠤᠵᠢᠨ ︽ᠴᠢᠩᠭᠢᠰ︾ ᠴᠤᠯᠠ ᠲᠠᠢ ᠬᠠᠭᠠᠨ ᠪᠤᠯᠤᠭᠰᠠᠨ ᠶᠠᠪᠤᠳᠠᠯ ᠲᠠᠪᠬᠤᠴᠠᠵᠤ ᠵᠠᠮᠤᠬ᠎ᠠ ᠶᠢ ᠣᠯᠠᠮ ᠨᠢᠭᠡ ᠠᠯᠬᠤᠮ ᠰᠡᠵᠢᠭ ᠲᠦᠷᠦᠭᠦᠯᠪᠡ᠃ ︽ᠠᠯᠲᠠᠨ᠂ ᠬᠤᠴᠠᠷ ᠲᠠ ᠬᠤᠶᠠᠷ ᠁ ᠠᠨᠳᠠ ᠪᠢᠳᠠᠨ ᠬᠤᠶᠠᠷ ᠢ ᠰᠠᠯᠬᠤ ᠠᠴᠠ ᠡᠮᠤᠨ᠎ᠡ ᠬᠠᠮᠲᠤ ᠪᠠᠶᠢᠬᠤ ᠦᠶ᠎ᠡ ᠳᠤ ᠲᠡᠮᠤᠵᠢᠨ ᠢ ᠬᠠᠨ ᠡᠷᠭᠦᠮᠵᠢᠯᠡᠭᠰᠡᠨ ᠦᠭᠡᠢ᠂ ᠡᠳᠤᠭᠡ ᠶᠠᠮᠠᠷ ᠰᠠᠨᠠᠭ᠎ᠠ ᠪᠠᠷ ᠪᠣᠯᠭᠠᠪᠠ︖ ᠁︾ ᠭᠡᠰᠡᠨ ᠵᠠᠮᠤᠬ᠎ᠠ ᠶᠢᠨ ᠠᠯᠲᠠᠨ᠂ ᠬᠤᠴᠠᠷ ᠬᠤᠶᠠᠷ ᠲᠤ ᠬᠡᠯᠡᠵᠤ ᠶᠠᠪᠤᠭᠤᠯᠤᠭᠰᠠᠨ ᠦᠭᠡ ᠪᠤᠯ ᠢᠯᠡᠷᠬᠢᠢᠶ᠎ᠠ ᠲᠡᠮᠤᠵᠢᠨ ᠠᠨᠳᠠ ᠳᠠᠭᠠᠨ ᠰᠤᠨᠤᠰᠬᠠᠭᠰᠠᠨ ᠦᠭᠡ ᠪᠤᠯᠬᠤ ᠶᠤᠮ᠃ ᠡᠶᠢᠨ ᠬᠦ ᠵᠠᠮᠤᠬ᠎ᠠ ᠶᠢᠨ ᠬᠤᠪᠢ ᠳᠤ ᠰᠡᠳᠭᠢᠯ ᠳᠤᠨᠢ ᠶᠤᠰᠤᠲᠠᠢ ᠬᠢᠷᠠᠭᠤ ᠳᠡᠭᠡᠷ᠎ᠡ ᠨᠢ ᠴᠠᠰᠤ ᠪᠠᠭᠤᠭᠰᠠᠨ ᠪᠤᠯᠵᠤ ᠵᠢᠭᠡᠭᠦᠰᠦᠭᠰᠡᠨ ᠶᠤᠮ᠃ ᠭᠡᠬᠦ ᠳᠤ ᠲᠡᠮᠤᠵᠢᠨ ᠤ ᠬᠤᠪᠢ ᠳᠤ ᠠᠪᠴᠤ ᠬᠡᠯᠡᠪᠡᠯ ᠦᠪᠡᠷᠲᠡᠭᠡᠨ ᠬᠠᠨ ᠰᠠᠭᠤᠶ᠎ᠠ ᠭᠡᠬᠦ ᠰᠠᠨᠠᠭ᠎ᠠ ᠪᠠᠶᠢᠭᠰᠠᠨ ᠢᠶᠠᠷ ᠪᠤᠳᠤᠬᠤ ᠳᠤ ᠢᠯᠡ ᠪᠠᠷ ᠬᠡᠯᠡᠬᠦ ᠪᠤᠯᠤᠮᠵᠢ ᠦᠭᠡᠢ ᠶᠤᠮ᠃ ᠣᠴᠢᠷ ᠨᠢ ᠣᠪᠣᠭ ᠠᠶᠢᠮᠠᠭ ᠤᠨ ᠳᠣᠲᠣᠷ᠎ᠠ ᠲᠡᠮᠤᠵᠢᠨ ᠬᠠᠨ ᠰᠠᠭᠤᠬᠤ ᠪᠠᠶᠢᠷᠢ ᠰᠠᠭᠤᠷᠢ ᠦᠭᠡᠢ ᠶᠤᠮ᠃      ᠤᠳᠤᠮ ᠤᠭᠰᠠᠭ᠎ᠠ ᠶᠢᠨ ᠶᠤᠰᠤᠭᠠᠷ ᠪᠤᠯ ᠠᠯᠲᠠᠨ᠂ ᠬᠤᠴᠠᠷ᠂ ᠰᠡᠴᠡᠨ ᠪᠠᠬᠢ ᠨᠠᠷ ᠬᠠᠨ ᠪᠤᠯᠬᠤ ᠶᠤᠰᠤᠲᠠᠢ ᠶᠤᠮ᠃ ᠨᠦᠭᠦᠭᠡ ᠲᠠᠯᠠᠭᠠᠷ ᠬᠠᠨ ᠪᠤᠯᠬᠤ ᠨᠢ ᠤᠪᠤᠭ ᠠᠶᠢᠮᠠᠭ ᠤᠨ ᠳᠤᠲᠤᠷ᠎ᠡ ᠬᠤᠷᠠᠯᠲᠠᠢ ᠪᠠᠷ ᠳᠠᠮᠵᠢᠬᠤ ᠶᠤᠰᠤᠲᠠᠢ ᠶᠤᠮ᠃ ᠲᠡᠮᠤᠵᠢᠨ ᠦᠪᠡᠷᠲᠡᠭᠡᠨ ᠬᠠᠨ ᠪᠤᠯᠬᠤ ᠡᠷᠬᠡ ᠦᠭᠡᠢ ᠶᠤᠮ᠃ ᠭᠡᠶ᠎ᠡ᠂ ᠵᠠᠮᠤᠬ᠎ᠠ ᠶᠢᠨ ᠮᠠᠭᠤ ᠰᠠᠨᠠᠬᠤ ᠶᠢ ᠴᠤ ᠪᠤᠷᠤᠭᠤ ᠭᠡᠵᠤ ᠬᠡᠯᠡᠵᠤ ᠪᠤᠯᠬᠤ ᠦᠭᠡᠢ ᠶᠤᠮ᠃ ︽ᠠᠨᠳᠠ ᠬᠦᠮᠤᠨ ᠤ ᠠᠮᠢᠨ ᠨᠢᠭᠡ︕︾ ᠪᠠᠶᠢᠲᠠᠯ᠎ᠠ ᠪᠠᠨ ᠦ ᠰᠠᠪ ᠮᠡᠳᠡᠭᠳᠡᠯ ᠦᠭᠡᠢ ᠵᠠᠶᠢᠯᠠᠵᠤ ᠬᠠᠶᠠᠵᠤ ᠶᠠᠪᠤᠭᠠᠳ ᠤᠬᠤᠷᠬᠠᠨ ᠴᠠᠭ ᠤᠨ ᠳᠤᠲᠤᠷ᠎ᠠ ᠬᠠᠨ ᠰᠠᠭᠤᠭᠰᠠᠨ ᠨᠢ ᠨᠢᠭᠡ ᠶᠤᠰᠤᠨ ᠤ ᠰᠡᠵᠢᠭ ᠲᠠᠭᠠᠪᠤᠷᠢ ᠡᠭᠦᠰᠭᠡᠬᠦ ᠨᠢ ᠶᠠᠷᠢᠶᠠᠨ ᠦᠭᠡᠢ ᠶᠤᠮ᠃ ᠭᠡᠬᠦ ᠳᠤ ᠵᠠᠮᠤᠬ᠎ᠠ ᠳᠤ ᠠᠪᠴᠤ ᠬᠡᠯᠡᠪᠡᠯ ︽ᠲᠠᠩᠭᠠᠷᠢᠭ ᠠᠰᠠᠭᠤᠬᠤ︾ ︽ᠠᠨᠳᠠᠭᠠᠢ ᠨᠡᠬᠡᠬᠦ︾ ᠬᠡᠮᠵᠢᠶᠡᠨ ᠬᠦᠷᠤᠭᠡ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ︵ᠲᠠᠩᠭᠠᠷᠢᠭ ᠠᠰᠠᠭᠤᠬᠤ᠂ ᠠᠨᠳᠠᠭᠠᠢ ᠨᠡᠬᠡᠬᠦ ᠭᠡᠵᠤ ᠨᠢᠭᠡ ᠡᠳᠡᠭᠡᠳ ᠨᠢ ᠠᠨᠳᠠᠭᠠᠢ᠂ ᠲᠠᠩᠭᠠᠷᠢᠭ ᠠᠯᠳᠠᠭᠰᠠᠨ ᠪᠠᠶᠢᠪᠠᠯ ᠨᠦᠭᠦᠭᠡ ᠡᠳᠡᠭᠡᠳ ᠨᠢ ᠡᠯᠴᠢ ᠲᠤᠮᠢᠯᠠᠨ ᠳᠠᠭᠤᠤ ᠪᠠᠷᠢᠭᠤᠯᠵᠤ᠂ ᠤᠷᠢᠳᠤ ᠶᠢᠨ ᠠᠮᠠᠯᠳᠠᠭᠰᠠᠨ ᠤᠴᠢᠷ᠂ ᠠᠨᠳᠠᠭᠠᠶᠢᠯᠠᠭᠰᠠᠨ ᠲᠠᠩᠭᠠᠷᠢᠭ ᠢᠶᠠᠨ ᠳᠣᠷᠠᠳᠬᠠᠨ ᠰᠠᠨᠠᠭᠤᠯᠵᠣ᠂ ᠠᠨᠳᠠᠭᠠᠢ ᠠᠯᠳᠠᠭᠰᠠᠨ ᠠᠵᠢᠯᠯᠠᠭ᠎ᠠ ᠶᠢ ᠰᠢᠭᠦᠮᠵᠢᠯᠡᠨ ᠲᠤᠩᠭᠤᠳᠬᠤ ᠶᠢ ᠬᠡᠯᠡᠨ᠎ᠠ︶ ᠭᠡᠪᠡᠴᠤ ᠵᠠᠮᠤᠬ᠎ᠠ ᠪᠠᠷ ᠰᠡᠵᠢᠭ ᠠᠯᠳᠠᠷᠠᠭᠰᠠᠨ ᠦᠭᠡᠢ ᠮᠦᠷᠲᠡᠭᠡᠨ ᠲᠡᠮᠤᠵᠢᠨ ᠢ ᠲᠡᠩᠰᠡᠵᠤ ᠦᠵᠡᠬᠦ ᠪᠤᠳᠤᠯ ᠡᠭᠦᠰᠦᠭᠰᠡᠨ ᠶᠤᠮ᠃      ᠵᠠᠮᠤᠬ᠎ᠠ ᠶᠢᠨ ᠳᠡᠭᠦᠤ ᠲᠠᠶᠢᠴᠢᠷ ᠲᠡᠮᠤᠵᠢᠨ ᠤ ᠠᠳᠤᠭᠤ ᠶᠢ ᠲᠠᠭᠤᠵᠤ᠂ ᠠᠳᠤᠭᠤᠴᠢᠨ ᠳᠤᠨᠢ ᠠᠯᠠᠭᠳᠠᠯ᠎ᠠ᠃ ᠡ᠊ᠨᠳᠡ ᠰᠡᠵᠢᠭᠯᠡᠬᠦ ᠨᠢ ᠵᠠᠮᠤᠬ᠎ᠠ ᠰᠢᠭ᠋ ᠠᠪᠤᠨ ᠳᠣᠣᠷ᠎ᠡ ᠨᠢ ᠲᠦᠮᠡᠨ ᠴᠡᠷᠢᠭ ᠢ ᠵᠤᠬᠢᠶᠠᠨ ᠪᠠᠶᠢᠭᠤᠯᠬᠤ ᠴᠢᠳᠠᠯ ᠲᠠᠢ ᠮᠤᠩᠭᠤᠯ ᠤᠨ ᠲᠤᠮᠤ ᠢᠵᠠᠭᠤᠷᠲᠠᠨ ᠤ ᠳᠡᠭᠦᠤ ᠲᠠᠶᠢᠴᠢᠷ ᠠᠳᠤᠭᠤ ᠪᠠᠷ ᠳᠣᠲᠠᠪᠠ ᠤᠤ︖ ᠲᠠᠭᠤᠬᠤ ᠳᠠᠭᠠᠨ ᠦᠭᠡᠷ᠎ᠡ ᠬᠦᠮᠤᠨ ᠤ ᠠᠳᠤᠭᠤ ᠪᠢᠰᠢ ᠶᠠᠭᠤᠨ ᠳᠤ ᠲᠡᠮᠤᠵᠢᠨ ᠤ ᠠᠳᠣᠭᠤ ᠶᠢ ᠲᠠᠭᠤᠪᠠ︖ ᠡᠭᠦᠨ ᠤ ᠬᠠᠷᠢᠭᠤᠯᠲᠠ ᠨᠢ ︽ᠨᠢᠭᠡ ᠮᠤᠷᠢ ᠪᠠᠶᠢᠪᠠᠯ ᠡᠭᠡᠯᠵᠢᠯᠡᠵᠤ ᠣᠨᠤᠨ᠎ᠠ︾ ︽ᠴᠢᠨᠤᠬᠢ ᠴᠤ ᠮᠢᠨᠤᠬᠢ︕︾ ︽ᠮᠢᠨᠤᠬᠢ ᠴᠤ ᠴᠢᠨᠤᠬᠢ︾ ︽ᠠᠨᠳᠡ ᠬᠦᠮᠤᠨ ᠤ ᠠᠮᠢ ᠨᠢ ᠨᠢᠭᠡ︾ ᠭᠡᠳᠡᠭ ᠠᠨᠳᠠ ᠶᠢᠨ ᠶᠤᠰᠤ ᠪᠠᠶᠢᠳᠠᠭ ᠲᠤᠯᠠ ᠵᠤᠷᠢᠯᠭ᠎ᠠ ᠲᠠᠢ ᠪᠠᠷ ᠳᠡᠭᠦᠤ ᠪᠠᠨ ᠲᠤᠬᠢᠵᠤ ᠲᠡᠮᠤᠵᠢᠨ ᠤ ᠠᠳᠣᠭᠤ ᠶᠢ ᠬᠦᠭᠡᠭᠡᠯᠭᠡᠵᠤ ᠳᠡᠩᠰᠠᠯᠲᠠ ᠬᠢᠭᠰᠡᠨ ᠶᠤᠮ᠃ ᠭᠡᠲᠡᠯ᠎ᠡ᠂ ᠭᠠᠢ ᠪᠤᠯᠵᠤ ᠳᠡᠭᠦᠤ ᠨᠢ ᠠᠯᠠᠭᠳᠠᠭᠰᠠᠨ ᠤᠴᠢᠷ ᠪᠤᠯᠤᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠃ ᠬᠤᠶᠠᠷ ᠠᠨᠳᠠ ᠶᠢᠨ ᠰᠠᠪᠳᠠᠬᠦ ᠴᠠᠭ ᠪᠤᠯᠤᠭᠰᠠᠨ ᠤ ᠬᠢ ᠤᠤ︕ ᠦᠨᠡᠨ ᠳᠡᠭᠡᠨ ᠲᠡᠮᠤᠵᠢᠨ ᠲᠠᠶᠢᠴᠢᠷ ᠢ ᠠᠯᠠᠭᠰᠠᠨ ᠦᠭᠡᠢ ᠮᠦᠷᠲᠡᠭᠡᠨ ᠠᠯᠠ ᠭᠡᠰᠡᠨ ᠵᠠᠷᠯᠢᠭ ᠴᠤ ᠦᠭᠭᠦᠭᠰᠡᠨ ᠦᠭᠡᠢ ᠪᠠᠷ ᠠᠳᠣᠭᠤᠴᠢᠨ ᠨᠢ ᠠᠯᠠᠭᠰᠠᠨ ᠶᠤᠮ᠃      ᠡᠭᠦᠨ ᠳᠤ ᠲᠡᠮᠤᠵᠢᠨ ᠤ ᠦᠢᠯᠡ ᠳᠤ ᠬᠤᠶᠠᠷ ᠤᠳᠠᠭ᠎ᠠ ᠰᠡᠵᠢᠭ ᠲᠦᠷᠦᠵᠤ ᠪᠠᠶᠢᠭᠰᠠᠨ ᠵᠠᠮᠤᠬ᠎ᠠ᠂ ᠡᠨᠡ ᠣᠳᠠᠭ᠎ᠠ ᠶᠢᠨ ᠬᠡᠳᠣᠨ ᠠᠳᠣᠭᠤ ᠶᠢᠨ ᠣᠴᠢᠷ ᠲᠤ ᠳᠡᠭᠦᠤ ᠪᠠᠨ ᠠᠯᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠨᠢ ᠠᠨᠳᠠ ᠲᠡᠮᠤᠵᠢᠨ ᠳᠤ ᠨᠢᠭᠡᠮᠤᠰᠤᠨ ᠢᠲᠡᠭᠡᠯ ᠠᠯᠳᠠᠵᠤ ︽ᠲᠠᠩᠭᠠᠷᠢᠭ ᠠᠰᠠᠭᠤᠬᠤ︾ ︽ᠠᠨᠳᠠᠭᠠᠢ ᠨᠡᠭᠡᠬᠦ︾ ᠳᠠᠶᠢᠨ ᠢ ᠡᠭᠦᠰᠭᠡᠭᠰᠡᠨ ᠪᠠᠶᠢᠨ᠎ᠠ᠃ ᠭᠡᠬᠦ ᠳᠤ ᠡ᠊ᠨᠳᠡ ᠲᠤᠳᠣᠷᠬᠠᠶᠢᠯᠠᠬᠤ ᠨᠢ ᠵᠠᠮᠤᠬ᠎ᠠ᠂ ᠲᠡᠮᠤᠵᠢᠨ ᠬᠤᠭᠤᠷᠤᠨᠳᠤᠬᠢ ᠳᠠᠶᠢᠨ ᠨᠢ ᠦᠰᠢᠶᠡᠲᠡᠨ ᠳᠠᠶᠢᠰᠤᠨ ᠤ ᠳᠠᠶᠢᠨ ᠪᠢᠰᠢ᠂ ᠬᠠᠷᠢᠨ ᠲᠠᠩᠭᠠᠷᠢᠭ ᠠᠰᠠᠭᠤᠬᠤ᠂ ᠠᠨᠳᠠᠭᠠᠢ ᠨᠡᠬᠡᠬᠦ ᠳᠠᠶᠢᠨ ᠭᠡᠳᠡᠭ ᠢ ᠮᠡᠳᠡᠬᠦ ᠬᠡᠷᠡᠭᠲᠠᠢ ᠶᠤᠮ᠃ ᠮᠦᠨ ᠴᠤ ᠬᠤᠶᠠᠷ ᠠᠨᠳᠠ ᠶᠢᠨ ᠪᠤᠷᠤᠭᠤ ᠦᠢᠯᠭᠠᠯᠲᠠ ᠠᠴᠠ ᠡᠭᠦᠰᠦᠭᠰᠡᠨ ᠳᠠᠶᠢᠨ ᠪᠤᠯᠬᠤ ᠶᠤᠮ᠃ ᠡᠨᠡ ᠳᠠᠶᠢᠨ ᠳᠤ ᠦᠩᠭᠡᠨ ᠲᠠᠯ᠎ᠠ ᠠᠴᠠ ᠨᠢ ᠦᠵᠡᠪᠡᠯ ᠳᠡᠭᠦᠤ ᠪᠠᠨ ᠠᠯᠠᠭᠤᠯᠤᠭᠰᠠᠨ ᠵᠠᠮᠤᠬ᠎ᠠ ᠳᠤ ᠶᠠᠷᠢᠶᠠᠨ ᠦᠭᠡᠢ ᠠᠰᠢᠭᠲᠠᠢ᠂ ᠶᠤᠰᠤᠲᠠᠢ ᠪᠠᠶᠢᠬᠤ ᠶᠤᠮ᠃ ᠮᠦᠨ ᠴᠤ ᠶᠤᠰᠤ ᠶᠢ ᠣᠯᠣᠭᠴᠢᠳ ᠢᠯᠠᠳᠠᠭ ᠤᠨ ᠵᠢᠮ ᠢᠶᠠᠷ ᠡᠨᠡ ᠳᠠᠶᠢᠨ ᠳᠤ ᠵᠠᠮᠤᠬ᠎ᠠ ᠳᠠᠶᠢᠯᠠᠵᠤ ᠲᠡᠮᠤᠵᠢᠨ ᠢᠶᠠᠷ ᠵᠢᠷᠭᠤᠭᠠᠳᠠᠢ ᠳᠤ ᠬᠦᠵᠤᠭᠦᠤ ᠪᠠᠨ ᠬᠠᠷᠪᠤᠭᠤᠯᠵᠤ ᠠᠮᠢᠨ ᠲᠤᠯᠤᠭᠰᠠᠨ ᠶᠤᠮ᠃ ᠡᠭᠦᠨ ᠠᠴᠠ ᠬᠤᠵᠢᠮ᠂ ᠵᠠᠮᠤᠬ᠎ᠠ ᠪᠠᠷ ᠭᠡᠷᠡᠶᠢᠳ᠂ ᠨᠠᠶᠮᠠᠨ ᠢ ᠦᠳᠡᠭᠡᠵᠤ ᠲᠡᠮᠤᠵᠢᠨ ᠳᠤ ᠳᠠᠶᠢᠰᠤᠨ ᠪᠤᠯᠭᠠᠭᠰᠠᠨ ᠭᠡᠳᠡᠭ ᠴᠤ ᠵᠠᠮᠤᠬ᠎ᠠ ᠶᠢᠨ ᠬᠤᠪᠢ ᠳᠤ ᠦᠰᠢᠶᠡᠲᠡᠨ ᠳᠠᠶᠢᠰᠣᠨ ᠢᠶᠠᠷ ᠲᠡᠮᠤᠵᠢᠨ ᠢ ᠦᠵᠡᠭᠰᠡᠨ ᠦᠭᠡᠢ ᠮᠦᠨ ᠯᠠ ︽ᠲᠠᠩᠭᠠᠷᠢᠭ ᠠᠰᠠᠭᠤᠬᠤ︾ ︽ᠠᠨᠳᠠᠭᠠᠢ ᠨᠡᠬᠡᠬᠦ︾ ᠪᠠᠨ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠪᠠᠶᠢᠭᠰᠠᠨ ᠶᠤᠮ᠃ ᠭᠡᠷᠡᠶᠢᠳ᠂ ᠨᠠᠶᠮᠠᠨ ᠤ ᠴᠡᠷᠢᠭ ᠤᠨ ᠨᠢᠭᠤᠴᠠ ᠶᠢ ᠲᠡᠮᠤᠵᠢᠨ ᠳᠤ ᠵᠠᠳᠠᠷᠠᠭᠤᠯᠵᠤ ᠪᠠᠶᠢᠭᠰᠠᠨ ᠨᠢ ᠭᠡᠷᠡᠴᠢ ᠪᠤᠯᠬᠤ ᠶᠤᠮ᠃ ᠭᠡᠲᠡᠯ᠎ᠡ᠂ ᠮᠠᠨ ᠤ ᠲᠡᠣᠬᠡᠴᠢᠳ ᠵᠠᠮᠤᠬ᠎ᠠ ᠶᠢ ᠬᠤᠶᠠᠷ ᠨᠢᠭᠤᠷᠲᠠᠨ᠂ ᠬᠤᠩᠰᠢᠶᠠᠷ ᠵᠦᠭᠡᠭᠴᠢ ᠭᠡᠵᠤ ᠵᠦᠭᠡᠳᠡᠭ ᠪᠠᠶᠢᠯ᠎ᠠ ᠃ ᠴᠣᠬᠤᠮ ᠬᠦ ᠲᠠᠩᠭᠠᠷᠢᠭ ᠢᠶᠠᠨ ᠪᠠᠷᠢᠭᠰᠠᠨ᠂ ᠰᠠᠬᠢᠭᠰᠠᠨ ᠵᠠᠮᠤᠬ᠎ᠠ ᠶᠢᠨ ᠬᠤᠰᠢᠭᠤ ᠮᠠᠭᠤ ᠤᠤ︖ ᠶᠤᠰᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠲᠡᠤᠬᠡᠴᠢᠳ ᠤᠨ ᠦᠮᠡᠬᠡᠢ ᠬᠤᠩᠰᠢᠶᠠᠷ ᠠᠰᠠᠭᠤᠳᠠᠯ ᠲᠠᠢ ᠤᠤ︖ ᠵᠠᠮᠤᠬ᠎ᠠ ᠲᠤᠤᠷᠠᠬᠢ ᠨᠦᠬᠦᠳ ᠲᠡᠭᠡᠨ ᠪᠠᠷᠢᠭᠳᠠᠵᠤ ᠲᠡᠮᠤᠵᠢᠨ ᠳᠤ ᠢᠷᠡᠯ᠎ᠡ᠃ ᠵᠠᠮᠤᠬ᠎ᠠ᠄ ︽ᠢᠯᠡᠭᠦᠤ ᠦᠭᠡ ᠲᠠᠢ ᠲᠤᠮᠤᠭᠴᠢ ᠡᠬᠡᠨᠡᠷ ᠲᠠᠢ ᠪᠤᠯᠡᠢ᠃ ᠁ ᠠᠨᠳᠠ ᠴᠢᠮ᠎ᠠ ᠳᠤ ᠳᠠᠶᠢᠯᠦᠭᠳᠠᠪᠠ᠃︾ ᠭᠡᠵᠤ ᠦᠪᠡᠷ ᠤᠨ ᠡᠬᠡᠨᠡᠷ ᠢᠶᠠᠨ ᠮᠠᠭᠤᠯᠠᠭᠰᠠᠨ ᠨᠢ ᠲᠡᠮᠤᠵᠢᠨ ᠪᠦᠷᠲᠡ ᠦᠵᠡᠨ ᠤ ᠦᠭᠡᠨ ᠳᠤ ᠤᠷᠤᠵᠤ ᠠᠨᠳᠠ ᠤᠷᠬᠢᠵᠤ ᠶᠠᠪᠤᠭᠰᠨ ᠢ ᠪᠢᠲᠡᠭᠦᠤ ᠪᠠᠷ ᠶᠠᠷᠢᠭᠰᠠᠨ ᠶᠤᠮ᠃ ︽᠁ ᠡᠷᠳᠡᠮ ᠪᠢᠯᠢᠭᠲᠦ ᠳᠡᠭᠦᠤ ᠨᠠᠷ ᠲᠠᠢ ᠁ ᠮᠢᠨᠤ ᠪᠡᠶ᠎ᠡ ᠁ ᠡᠯᠢᠭᠡ ᠲᠠᠢ ᠳᠡᠭᠦᠦ ᠨᠠᠷ ᠦᠭᠡᠢ ᠁︾ ᠭᠡᠰᠡᠨ ᠨᠢ ᠭᠠᠭᠴᠠ ᠳᠡᠭᠦᠤ ᠪᠠᠨ ᠠᠯᠠᠭᠤᠯᠤᠭᠰᠠᠨ ᠢᠶᠠᠨ ᠲᠠᠮ ᠶᠠᠷᠢᠭᠰᠠᠨ ᠴᠤ ᠶᠤᠮ ᠰᠢᠭ︕ ᠶᠠᠭᠤ ᠴᠤ ᠪᠤᠯ ᠬᠤᠶᠠᠷ ᠠᠨᠳᠠ ᠣᠴᠢᠷ ᠤᠬᠠᠭᠠᠨ ᠢᠶᠠᠨ ᠤᠯᠤᠭᠰᠠᠨ ᠮᠦᠷᠲᠡᠭᠡᠨ ᠲᠡᠮᠤᠵᠢᠨ ᠢᠶᠠᠷ᠄ ︽ᠡᠳᠣᠭᠡ ᠪᠢᠳᠠ ᠬᠤᠶᠠᠷ ᠬᠠᠮᠲᠤᠷᠠᠵᠤ ᠨᠦᠬᠦᠷᠯᠡᠶ᠎ᠡ︕︾ ᠭᠡᠰᠡᠨ ᠪᠤᠯᠪᠠᠴᠤ ᠵᠠᠮᠤᠬ᠎ᠠ ᠪᠠᠷ ︽ᠨᠦᠬᠦᠷᠯᠡᠬᠦ ᠴᠠᠭ ᠲᠤ ᠨᠦᠬᠦᠷᠯᠡᠭᠰᠡᠨ ᠦᠭᠡᠢ ᠪᠢᠯᠡ᠃︾ ︽ᠠᠨᠳᠠ ᠮᠢᠨᠢ ᠦᠷᠤᠰᠢᠶᠡᠪᠡᠯ ᠨᠠᠮᠠᠶᠢ ᠦᠬᠦᠬᠦᠯᠵᠤ ᠦᠪᠡᠷ ᠤᠨ ᠰᠡᠳᠭᠢᠯ ᠢᠶᠠᠨ ᠠᠮᠤᠷᠵᠢᠭᠤᠯᠲᠤᠭᠠᠢ᠃ ᠠᠨᠳᠠ ᠲᠠ ᠰᠤᠶᠤᠷᠬᠠᠵᠤ ᠠᠯᠠᠬᠤ ᠳᠤ ᠬᠦᠷᠪᠡᠯ ᠴᠢᠰᠤ ᠭᠠᠷᠭᠠᠯ ᠦᠭᠡᠢ ᠦᠬᠦᠭᠦᠯᠬᠦ ᠪᠤᠯᠪᠠ ᠤᠤ︖︾ ᠭᠡᠮᠡᠪᠡ᠃ ᠡᠭᠦᠨ ᠳᠤ ᠵᠠᠮᠤᠬ᠎ᠠ ᠶᠢᠨ ᠬᠤᠪᠢ ᠳᠤ ᠬᠡᠯᠡᠪᠡᠯ ᠭᠤᠷᠪᠠ ᠣᠳᠠᠭ᠎ᠠ ᠶᠢᠨ ᠠᠨᠳᠠ ᠳᠠᠭᠠᠨ ᠭᠤᠮᠤᠳᠠᠭᠰᠠᠨ ᠶᠠᠪᠤᠳᠠᠯ ᠨᠢ ᠪᠤᠳᠠᠲᠤ ᠪᠠᠶᠢᠳᠠᠯ ᠳᠤ ᠦᠯᠤ ᠨᠡᠶᠢᠴᠡᠭᠰᠡᠨ ᠢᠶᠠᠨ ᠰᠡᠷᠡᠵᠤ ᠣᠬᠠᠭᠠᠷᠠᠭᠰᠠᠨ ᠪᠦᠭᠡᠳ ᠴᠢᠨᠠᠭᠰᠢ ᠪᠤᠳᠠᠯᠠᠵᠤ ᠨᠦᠬᠦᠰᠢ ᠦᠭᠡᠢ ᠪᠤᠯᠤᠭᠰᠠᠨ ᠢᠶᠠᠨ ᠴᠤ ᠮᠡᠳᠡᠭᠰᠡᠨ ᠪᠤᠯᠤᠨ᠎ᠠ᠃ ᠲᠡᠮᠤᠵᠢᠨ ᠤ ᠬᠤᠪᠢ ᠳᠤ ᠮᠦᠨ ᠵᠠᠮᠤᠬ᠎ᠠ ᠶᠢ ᠪᠤᠷᠤᠭᠤᠳᠬᠠᠬᠤ ᠦ ᠰᠠᠪ ᠤᠯᠤᠭᠰᠠᠨ ᠦᠭᠡᠢ ᠨᠢ ᠵᠠᠷᠢᠮ ᠦᠶ᠎ᠡ ᠳᠤ ᠠᠨᠳᠠ ᠳᠠᠭᠠᠨ ᠰᠡᠵᠢᠭ ᠠᠵᠢᠭ ᠲᠦᠷᠦᠭᠦᠯᠦᠭᠰᠡᠨ ᠢᠶᠠᠨ ᠮᠡᠳᠡᠷᠡᠭᠰᠡᠨ ᠣᠴᠢᠷ ᠪᠤᠯᠬᠤ ᠶᠤᠮ᠃ ᠲᠡᠮᠤᠵᠢᠨ ᠢᠶᠠᠷ ᠵᠠᠮᠤᠬ᠎ᠠ ᠠᠨᠳᠠ ᠪᠠᠨ ᠠᠯᠠᠬᠤ ᠰᠢᠯᠲᠠᠭ ᠤᠯᠬᠤ ᠦᠭᠡᠢ ᠪᠤᠯᠵᠤ᠂ ᠠᠷᠭ᠎ᠠ ᠦᠭᠡᠢ ᠠᠷᠪᠠᠨ ᠭᠤᠷᠪᠠᠨ ᠬᠦᠷᠢᠶ᠎ᠠ ᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠬᠦᠵᠤᠭᠦᠤ ᠪᠠᠨ ᠬᠠᠷᠪᠤᠭᠤᠯᠵᠤ ᠠᠮᠢᠨ ᠲᠤᠯᠤᠭᠰᠠᠨ ᠢᠶᠠᠷ ᠰᠢᠯᠲᠠᠭᠠᠨ ᠪᠤᠯᠭᠠᠭᠰᠠᠨ ᠶᠤᠮ᠃ ᠨᠦᠭᠦᠭᠡ ᠲᠠᠯ᠎ᠠ ᠪᠠᠷ ︽ᠴᠢᠰᠤ ᠦᠵᠡᠬᠦ ᠦᠭᠡᠢ ᠪᠠᠷ ᠦᠬᠦᠭᠦᠯᠬᠦ︾ ᠭᠡᠳᠡᠭ ᠪᠤᠯ ᠵᠠᠮᠤᠬ᠎ᠠ ᠠᠴᠠ ᠦᠪᠡᠷ ᠢ ᠪᠠᠨ ᠲᠠᠩᠭᠠᠷᠢᠭ ᠡᠪᠳᠡᠭᠰᠡᠨ ᠦᠭᠡᠢ ᠭᠡᠳᠡᠭ ᠢᠶᠠᠨ ᠪᠠᠲᠤᠯᠠᠭᠰᠠᠨ ᠮᠦᠷᠲᠡᠭᠡᠨ ᠲᠡᠮᠤᠵᠢᠨ ᠴᠤ ᠲᠡᠭᠡᠵᠤ ᠦᠬᠦᠭᠦᠯᠬᠦ ᠶᠢ ᠵᠦᠪᠰᠢᠶᠡᠷᠡᠭᠰᠡᠨ ᠨᠢ ᠵᠠᠮᠤᠬ᠎ᠠ ᠠᠨᠳᠠ ᠲᠠᠩᠭᠠᠷᠢᠭ ᠠᠯᠳᠠᠭᠰᠠᠨ ᠦᠭᠡᠢ ᠭᠡᠳᠡᠭ ᠢ ᠮᠡᠳᠡᠷᠡᠭᠰᠡᠨ ᠶᠠᠪᠣᠳᠠᠯ ᠪᠤᠯᠬᠤ ᠶᠤᠮ᠃      ᠶᠠᠭᠤ ᠭᠡᠪᠡᠯ᠂ ᠠᠨᠳᠠ ᠪᠠᠨ ᠪᠠᠲᠤᠳᠭᠠᠬᠤ ᠦᠶ᠎ᠡ ᠳᠤ ᠬᠠᠷᠢᠯᠴᠠᠨ ᠰᠤᠮᠤ ᠰᠤᠯᠢᠯᠴᠠᠨ ᠬᠠᠲᠠᠭᠤ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠶᠠᠪᠤᠳᠠᠯ ᠢ ᠮᠠᠷᠲᠠᠭ᠎ᠠ ᠦᠭᠡᠢ ᠪᠢᠵᠠ᠃ ᠮᠣᠩᠭᠤᠯ ᠤᠨ ᠶᠣᠰᠣᠨ ᠳᠤ ᠨᠢᠭᠡᠨ ᠲᠠᠩᠭᠠᠷᠢᠭ ᠠᠯᠳᠠᠪᠠᠯ ᠰᠤᠯᠢᠯᠴᠠᠭᠰᠠᠨ ᠰᠣᠮᠣ ᠪᠣᠶᠣ ᠬᠢᠲᠣᠭᠠᠨ ᠳᠡᠭᠡᠨ ᠦᠬᠦᠬᠦ ᠲᠠᠩᠭᠠᠷᠢᠭ ᠲᠠᠢ ᠶᠤᠮ᠃ ᠬᠢᠲᠤᠭ᠎ᠠ᠂ ᠰᠤᠮᠤᠨ ᠳᠤ ᠦᠬᠦᠬᠦ ᠨᠢ ᠴᠢᠰᠤ ᠭᠠᠷᠬᠤ ᠨᠢ ᠳᠠᠮᠵᠢᠭ ᠦᠭᠡᠢ᠃ ︽ᠴᠢᠰᠤ ᠦᠵᠡᠬᠦ ᠦᠭᠡᠢ︾ ᠦᠬᠦᠨ᠎ᠠ ᠭᠡᠳᠡᠭ ᠨᠢ ᠳᠠᠷᠤᠢ ᠠᠨᠳᠠ ᠶᠢᠨ ᠲᠠᠩᠭᠠᠷᠢᠭ ᠡᠪᠳᠡᠷᠡᠭᠰᠡᠨ ᠦᠭᠡᠢ ᠭᠡᠰᠡᠨ ᠢ ᠡᠰᠡᠷᠭᠦᠤ ᠨᠤᠲᠠᠯᠠᠵᠤ ᠪᠠᠶᠢᠭ᠎ᠠ ᠶᠤᠮ︕      ᠡᠶᠢᠮᠤᠷᠬᠦᠤ᠂ ᠳᠡᠯᠡᠬᠡᠢ ᠶᠢᠨ ᠠᠭᠤᠤ ᠶᠡᠭᠡ ᠰᠡᠴᠡᠨ ᠮᠡᠷᠭᠡᠨ ᠴᠢᠩᠭᠢᠰ ᠬᠠᠭᠠᠨ ᠬᠦᠷᠲᠡᠯ᠎ᠠ ᠵᠠᠮᠤᠬ᠎ᠠ ᠶᠢ ᠮᠠᠭᠤ ᠭᠡᠵᠤ ᠠᠮᠠᠨ ᠵᠠᠪᠵᠢ ᠠᠴᠠ ᠪᠠᠨ ᠭᠠᠷᠭᠠᠭᠰᠠᠨ ᠦᠭᠡᠢ ᠪᠠᠶᠢᠲᠠᠯ᠎ᠠ ᠮᠠᠨ ᠤ ᠲᠡᠣᠬᠡᠴᠢᠳ ᠴᠢᠩᠭᠢᠰ ᠠᠴᠠ ᠠᠬᠠᠳᠠᠭᠰᠠᠨ ᠮᠡᠷᠭᠡᠳ ᠪᠣᠯᠵᠣ ᠵᠠᠮᠤᠬ᠎ᠠ ᠶᠢ ᠮᠠᠭᠤᠯᠠᠬᠤ ᠳᠠᠭᠠᠨ ᠢᠴᠢᠳᠡᠭ ᠦᠭᠡᠢ ᠨᠢ ᠭᠤᠲᠤᠮᠰᠢᠭ ᠪᠢᠰᠢ ᠭᠡᠵᠤ ᠤᠤ︖ ᠡᠶᠢᠮᠤ ᠴᠤ ᠣᠴᠢᠷ ᠠᠴᠠ ᠪᠢᠳᠠ ᠦᠨᠳᠣᠰᠣᠲᠡᠨ ᠤ ᠪᠠᠨ ᠦᠤᠬᠡ ᠲᠡᠤᠬᠡ ᠶᠢ ᠦᠢᠯᠠᠭᠠᠵᠤ ᠮᠡᠳᠡᠶ᠎ᠠ ᠭᠡᠪᠡᠯ ᠦᠨᠳᠤᠰᠤᠲᠡᠨ ᠤ ᠪᠠᠨ ᠰᠤᠶᠤᠯ ᠰᠡᠳᠭᠢᠬᠦᠢ᠂ ᠵᠠᠩ ᠰᠣᠷᠲᠠᠬᠤᠨ ᠢ ᠣᠷᠢᠳᠠᠪᠡᠷ ᠮᠡᠳᠡᠵᠤ ᠪᠠᠶᠢᠪᠠᠯ ᠵᠤᠬᠢᠬᠤ ᠶᠤᠮ᠃ ᠨᠦᠬᠦᠭᠡᠳ ᠬᠡᠯᠡᠪᠡᠯ᠂ ᠮᠤᠩᠭᠤᠯ ᠤᠨ ᠢᠷᠠᠭᠤ ᠲᠤᠤᠯᠢ ᠠᠴᠠ ᠬᠡᠯᠡᠬᠦ ᠦᠭᠡᠢ᠂ ᠡᠷᠲᠡᠨ ᠤ ᠮᠤᠩᠭᠤᠯᠴᠣᠳ ᠤᠨ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠭᠡᠵᠤ ᠶᠠᠮᠠᠷ ᠬᠡᠴᠡᠭᠦᠣ ᠶᠠᠭᠤᠮ᠎ᠠ ᠪᠠᠶᠢᠵᠡᠢ ᠭᠡᠰᠡᠨ ᠢ ᠲᠡᠮᠤᠵᠢᠨ᠂ ᠵᠠᠮᠤᠬ᠎ᠠ᠂ ᠡᠨᠠ ᠬᠤᠶᠠᠷ ᠠᠭᠤᠤ ᠬᠦᠮᠤᠨ ᠤ ᠨᠦᠬᠦᠷᠯᠡᠯ ᠠᠴᠠ ᠮᠡᠳᠡᠵᠤ ᠪᠤᠯᠤᠨ᠎ᠠ ᠭᠡᠵᠤ ᠢᠲᠡᠭᠡᠵᠤ ᠪᠠᠶᠢᠨ᠎ᠠ᠃ ᠳᠠᠭᠠᠯᠳᠣᠭᠤᠯᠣᠭᠠᠳ ᠶᠠᠷᠢᠪᠠᠯ ᠵᠠᠮᠤᠬ᠎ᠠ ᠶᠢᠨ ᠬᠠᠮᠤᠭ ᠡᠴᠤᠰ ᠤᠨ ᠭᠡᠷᠢᠶᠡᠰ᠄      ︽ᠦᠬᠦᠭᠡᠳ ᠬᠡᠪᠲᠡᠬᠦ ᠶᠠᠰᠤ ᠶᠢ      ᠦᠨᠳᠤᠷ ᠡᠳᠤᠭᠡᠨ ᠭᠠᠵᠠᠷ ᠲᠠᠯᠪᠢᠭᠲᠤᠨ      ᠦᠨᠢ ᠡᠭᠦᠷᠢᠳᠡ      ᠣᠷᠤᠭ ᠤᠨ ᠣᠷᠤᠭ ᠲᠤ ᠴᠢᠨᠢ      ᠢᠪᠡᠭᠡᠨ ᠲᠡᠳᠭᠦᠬᠦ      ᠢᠷᠤᠭᠡᠯ ᠲᠠᠯᠪᠢᠶ᠎ᠠ︕ ᠁︾ ᠭᠡᠬᠦ ᠦᠭᠡ ᠠᠴᠠ ᠦᠪᠡᠷ ᠤᠨ ᠢᠶᠠᠨ ᠣᠪᠤᠭᠠᠨ ᠤ ᠰᠠᠬᠢᠭᠤᠰᠤ ᠪᠤᠯᠵᠦ ᠠᠨᠳᠠ ᠪᠠᠨ ᠲᠡᠳᠭᠦᠬᠦ ᠰᠠᠨᠠᠭ᠎ᠠ ᠶᠤᠮ ᠪᠠᠶᠢᠨ᠎ᠠ᠃ ᠲᠡᠮᠤᠵᠢᠨ ᠴᠤ᠄ ︽ᠶᠠᠰᠤ ᠶᠢ ᠠᠨᠤ ᠢᠯᠠ ᠪᠤᠤ ᠭᠡᠭᠡᠭᠲᠤᠨ︕ ᠰᠠᠶᠢᠲᠣᠷ ᠪᠠᠷᠢᠭᠲᠤᠨ︕︾ ᠭᠡᠵᠤ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠪᠠᠶᠢᠨ᠎ᠠ᠃      ᠣᠷᠴᠢᠮ ᠤᠨ ᠴᠢᠩᠭᠢᠰ ᠬᠠᠭᠠᠨ ᠤ ᠬᠡᠭᠦᠷ ᠢ ᠡᠷᠢᠭᠴᠢᠳ ᠪᠤᠷᠬᠠᠨ ᠭᠠᠯᠳᠣᠨ ᠭᠡᠪᠡ ᠤᠤ︖ ᠲᠡᠭᠦᠯᠡᠨ ᠪᠤᠯᠳᠠᠭ ᠭᠡᠪᠡ ᠤᠤ︖ ᠣᠷᠣᠢ ᠳᠤᠨᠢ ᠨᠢᠭᠡ ᠣᠪᠤᠭ᠎ᠠ ᠴᠤ ᠰᠢᠭ᠋᠂ ᠣᠩᠭᠤᠨ ᠴᠤ ᠰᠢᠭ᠋ ᠲᠤᠮᠤ ᠶᠠᠭᠤᠮ᠎ᠠ ᠪᠠᠶᠢᠨ᠎ᠠ ᠭᠡᠰᠠᠨ ᠮᠡᠳᠡᠭᠡᠯᠡᠯ ᠪᠠᠶᠢᠭᠰᠠᠨ ᠨᠢ ᠵᠠᠮᠤᠬ᠎ᠠ ᠶᠢᠨ ᠰᠠᠬᠢᠭᠤᠰᠣ ᠣᠪᠣᠭ᠎ᠠ ᠪᠠᠶᠢᠵᠣ ᠮᠡᠳᠡᠨ᠎ᠠ ᠭᠡᠵᠤ ᠪᠢ ᠬᠤᠪᠢᠨ ᠳᠠᠭᠠᠨ ᠰᠠᠨᠠᠵᠤ ᠪᠠᠶᠢᠨ᠎ᠠ︕
  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
︽ᠨᠠᠢᠮᠠᠨ︾ ᠭᠡᠰᠡᠨ ᠨᠡᠷ᠎ᠡ ᠶᠢᠨ ᠢᠷᠡᠯᠳᠡ ᠶᠢᠨ ᠲᠣᠬᠠᠢ
ᠮᠤᠩᠭᠤᠯ ᠤᠨ ᠤᠯᠠᠮᠵᠢᠯᠠᠯᠲᠤ ᠨᠤᠮ ᠰᠠᠭᠠᠲᠤᠭ ᠤᠨ ᠲᠤᠬᠠᠢ
ᠮᠤᠩᠭᠤᠯ ᠪᠥᠭᠡ ᠶᠢᠨ ᠱᠠᠰᠢᠨ ᠤ ᠡᠭᠦᠰᠦᠯ
︽ᠱᠤᠩᠬᠤᠷ ᠤᠨ ᠠᠭᠤᠯᠠᠨ ᠤ ᠲᠤᠮᠤᠭ︾ ᠤᠨ ᠲᠤᠬᠠᠢ
ᠡᠷᠳᠡᠮᠳᠠᠨ ᠡᠷᠳᠡᠨᠢᠳᠤᠬᠳᠠᠬᠤ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号