ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠡᠵᠢ ᠮᠢᠨᠢ ᠲᠡᠷᠬᠡᠳᠡ ᠥᠬᠡᠢ ᠳᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/5/11
     ᠡᠵᠢ ᠮᠢᠨᠢ ᠲᠡᠷᠬᠡᠳᠡ ᠥᠬᠡᠢ ᠳᠤ                            ᠵᠣᠬᠢᠶᠠᠭᠴᠢ᠄ ᠬᠡᠰᠢᠭᠵᠢᠷᠭᠠᠯ      ᠥᠷᠢ ᠲᠠᠢ ᠶᠤᠮ ᠰᠢᠭ ᠡᠳᠤᠷ ᠲᠠᠰᠤᠯᠳᠠᠯ ᠥᠬᠡᠢ ᠰᠠᠴᠤᠯᠢ ᠪᠠᠨ ᠡᠷᠬᠦᠨ᠂ ᠥᠬᠡᠳᠡ ᠮᠥᠷ ᠲᠠᠢ ᠶᠠᠪᠤᠬᠤ ᠶᠢ ᠮᠢᠨᠢ ᠵᠠᠯᠪᠠᠷᠢᠨ ᠲᠠᠭᠠᠳᠬᠠᠨ ᠵᠢᠳᠬᠦᠵᠤ᠂ ᠡᠷᠢᠶᠠᠨ ᠪᠠᠷᠠᠭᠠᠨ ᠲᠠᠢ ᠬᠤᠷᠸ᠎ᠠ ᠶᠢᠨ ᠡᠪ ᠪᠥᠬᠦᠨ ᠢ ᠨᠢ ᠬᠥᠰᠡᠨ ᠰᠠᠨᠠᠨ ᠵᠢᠷᠭᠠᠳᠠᠭ ᠥᠷ᠎ᠠ ᠬᠡᠤᠬᠡᠤᠨ ᠤᠨ ᠢᠶᠠᠨ ᠰᠢᠳᠤᠬᠡᠨ ᠪᠤᠯᠤᠭᠰᠠᠨ ᠪᠤᠷᠬᠠᠨ ᠡᠵᠢ ᠮᠢᠨᠢ ᠲᠡᠷᠬᠡᠳᠡ ᠠᠴᠠ ᠰᠠᠯᠤᠭᠠᠤᠨ ᠠᠷᠪᠠ ᠢᠯᠡᠭᠦᠤ ᠵᠢᠯ ᠪᠤᠯᠵᠠᠢ᠃ ᠲᠥᠷᠪᠡᠨ ᠬᠥᠪᠡᠬᠦᠨ᠂ ᠵᠢᠷᠭᠤᠭᠠᠨ ᠥᠬᠢᠨ ᠢ ᠲᠥᠷᠤᠬᠦᠯᠵᠤ ᠥᠰᠬᠡᠨ᠂ ᠥᠷ᠎ᠠ ᠤᠳᠤᠮ ᠲᠠᠮᠵᠢᠭᠤᠯᠤᠨ᠂ ᠥᠨᠳᠤᠰᠤ ᠨᠠᠮᠠᠭ᠎ᠠ ᠵᠠᠯᠭᠠᠭᠤᠯᠤᠭᠰᠠᠨ ᠪᠤᠶᠠᠨᠳᠤ ᠪᠤᠭᠤᠷᠤᠯ ᠡᠵᠢ ᠪᠠᠨ ᠮᠥᠷᠤᠬᠡᠳᠤᠨ ᠰᠠᠨᠠᠬᠤ ᠳᠤ ᠭᠠᠯᠠᠭᠤᠨ ᠴᠤᠪᠤᠭ᠎ᠠ ᠵᠠᠯᠠᠯᠠᠨ ᠬᠤᠯᠠᠳᠠᠵᠤ᠂ ᠭᠠᠨᠭ᠍ᠭᠠᠡᠭ ᠨᠠᠭᠤᠷ ᠬᠥᠪᠡᠬᠡᠨ ᠠᠴᠠ ᠪᠠᠨ ᠵᠠᠶᠢᠷᠮᠠᠭᠳᠤᠨ ᠪᠠᠰᠠ ᠨᠢᠬᠡᠨ ᠨᠠᠮᠤᠷ ᠢᠷᠠᠯ᠎ᠠ᠃      ᠡᠬᠡ ᠬᠥᠮᠤᠨ ᠤ ᠬᠠᠶᠢᠷ᠎ᠠ ᠡᠨᠡ ᠶᠢᠷᠳᠢᠨᠴᠤ ᠶᠢ ᠲᠤᠯᠠᠭᠠᠴᠠᠭᠤᠯᠵᠤ᠂ ᠡᠵᠢ ᠬᠥᠮᠤᠨ ᠤ ᠵᠢᠷᠤᠬᠡ ᠥᠷ᠎ᠠ ᠬᠡᠤᠬᠡᠤᠨ ᠢᠶᠠᠨ ᠬᠡᠵᠤ ᠥᠨᠳᠡᠯᠵᠡᠨ᠎ᠡ᠃ ᠵᠠᠪᠠᠯ ᠭᠤᠨᠢᠭ ᠢ ᠠᠵᠢᠯᠴᠢ ᠵᠠᠩ ᠢᠶᠠᠷ ᠢᠶᠠᠨ ᠮᠠᠷᠳᠠᠵᠤ ᠲᠤᠭᠤᠯᠤᠨ᠂ ᠵᠢᠷᠭᠠᠯ ᠪᠠᠶᠠᠷ ᠢ ᠠᠷᠢᠭᠤᠨ ᠰᠦ ᠪᠠᠷ ᠢᠶᠠᠨ ᠢᠪᠢᠯᠬᠡᠵᠤ ᠠᠪᠴᠢᠷᠠᠭᠰᠠᠨ ᠡᠵᠢ ᠮᠢᠨᠢ ᠲᠡᠬᠡᠬᠡᠤᠨ ᠲᠡᠶᠢᠮᠤ ᠯᠡ ᠠᠭᠤᠤ ᠶᠡᠭᠡ᠃ ᠮᠢᠨᠤ ᠬᠤᠪᠢ ᠳᠤ ᠬᠥᠬᠡᠷᠤᠬᠦᠢ ᠡᠵᠢ ᠲᠠᠢ ᠪᠠᠨ ᠶᠠᠪᠤᠨ ᠶᠠᠪᠤᠳᠠᠯ᠎ᠠ ᠨᠢ ᠢᠯᠡᠬᠦᠤ ᠪᠠᠶᠢᠯᠴᠠᠭᠰᠠᠨ ᠤ ᠤᠴᠢᠷ ᠲᠡᠬᠦᠨ ᠤ ᠪᠠᠶᠠᠷ ᠭᠤᠨᠢᠭᠲᠠᠢ ᠰᠡᠬᠦᠯ ᠤᠨ ᠥᠶ᠎ᠡ ᠶᠢ ᠰᠠᠶᠢᠨ ᠤᠶᠢᠯᠠᠭᠠᠳᠠᠭ᠃ ᠮᠥᠨ ᠴᠤ ᠲᠡᠩᠴᠤ ᠪᠠᠭ᠎ᠠ ᠠᠪᠤ ᠠᠴᠠ ᠪᠠᠨ ᠬᠤᠴᠤᠷᠤᠭᠰᠠᠨ ᠡᠮᠢᠶᠠᠯ ᠭᠤᠳᠤᠷᠠᠯ ᠤᠨ ᠬᠥᠨ ᠳᠤ ᠠᠪᠳᠠᠭᠰᠠᠨ ᠢᠶᠠᠷ ᠬᠠᠶᠢᠷᠠᠳᠠᠢ ᠡᠵᠢ ᠶᠢᠨ ᠢᠶᠠᠨ ᠡᠪᠤᠷ ᠬᠤᠷᠮᠤᠢ ᠳᠤᠨᠢ ᠵᠢᠭᠤᠷᠠᠨ ᠪᠠᠭᠳᠠᠵᠤ᠂ ᠥᠭᠭᠦᠬᠡᠵᠢ ᠶᠡᠭᠡ ᠬᠠᠶᠢᠷ᠎ᠠ ᠶᠢᠨ ᠢᠯᠴᠢᠨ ᠳᠤᠨᠢ ᠪᠠᠭ᠎ᠠ ᠨᠠᠰᠤ ᠪᠠᠨ ᠥᠡᠭᠭᠡᠷᠡᠬᠦᠯᠵᠤ ᠪᠠᠶᠢᠭᠰᠠᠨ ᠮᠢᠨᠢ ᠥᠨᠢᠳᠡ ᠶᠢᠨ ᠲᠤᠷᠠᠳᠬᠠᠯ ᠲᠠᠢ᠃      ᠶᠠᠭᠤᠮ᠎ᠠ ᠮᠡᠳᠡᠵᠤ ᠴᠡᠬᠡᠵᠢᠯᠡᠵᠤ ᠡᠬᠢᠯᠡᠭᠰᠡᠨ ᠲᠠᠯᠠᠭᠠᠤᠨ ᠤᠨ ᠤ ᠡᠬᠢᠨ ᠤ ᠥᠶ᠎ᠡ ᠳᠤ ᠠᠪᠤ ᠮᠢᠨᠢ ᠨᠡᠶᠢᠳᠡ ᠶᠢᠨ ᠬᠤᠨᠢ ᠶᠢ ᠬᠠᠷᠢᠭᠤᠯᠵᠤ᠂ ᠥᠷᠯᠤᠬᠡ ᠥᠳᠡᠰᠢ ᠶᠢᠨ ᠬᠤᠪᠢᠨ ᠳᠤ ᠯᠠ ᠬᠡᠷ ᠲᠡᠭᠡᠨ ᠪᠠᠷ᠎ᠠ ᠪᠤᠯᠵᠤ ᠪᠠᠶᠢᠳᠠᠭ ᠪᠠ ᠠᠬ᠎ᠠ ᠡᠬᠡᠴᠢ ᠨᠠᠷ ᠮᠢᠨᠢ ᠴᠤ ᠠᠶᠢᠯ ᠡᠷᠤᠬᠡ ᠪᠤᠯᠬᠤ ᠨᠢ ᠪᠤᠯᠵᠤ᠂ ᠵᠠᠷᠢᠮ ᠨᠢ ᠪᠠᠷᠢᠭᠠᠳᠠ ᠶᠢᠨ ︽ᠬᠤᠪᠢ︾ ᠲᠠᠢ ᠠᠵᠢᠯ᠂ ᠰᠤᠷᠭᠠᠭᠤᠯᠢ ᠰᠤᠶᠤᠯ ᠬᠡᠤᠨ ᠵᠥᠭ ᠵᠥᠭ ᠲᠡᠭᠡᠨ ᠶᠠᠭᠠᠷᠠᠳᠠᠭ᠃ ᠲᠡᠬᠡᠬᠦ ᠳᠤ ᠡᠵᠢ ᠮᠢᠨᠢ ᠭᠠᠯ ᠲᠤᠭᠤᠭ᠎ᠠ᠂ ᠥᠨᠢᠶ᠎ᠠ ᠲᠤᠭᠤᠯ ᠠᠴᠠ ᠪᠠᠨ ᠰᠠᠯᠵᠤ ᠴᠢᠳᠠᠳᠠᠭ ᠥᠬᠡᠢ ︽ᠬᠡᠷ ᠤᠨ ᠮᠤᠬᠤᠷ ᠰᠠᠬᠢᠭᠰᠠᠨ︾ ᠪᠥᠰᠡᠬᠦᠢ ᠬᠥᠮᠤᠨ ᠪᠤᠯᠵᠤ᠂ ᠬᠠᠮᠤᠭ ᠪᠠᠭ᠎ᠠ ᠨᠢ ᠪᠤᠯᠤᠭᠰᠠᠨ ᠪᠢ ᠬᠠᠵᠠᠭᠤ ᠪᠠᠷ ᠨᠢ ᠠᠷᠭᠠᠯ ᠲᠥᠯᠡᠰᠢ ᠤᠶᠢᠷᠠᠳᠠᠭᠤᠯᠤᠨ᠂ ᠬᠤᠷᠠᠭ᠎ᠠ ᠲᠤᠭᠤᠯ ᠢ ᠨᠢ ᠬᠠᠷᠢᠭᠤᠯᠵᠤ ᠥᠭᠳᠡᠭ ᠡᠵᠢ ᠶᠢᠨ ᠢᠶᠠᠨ ᠡᠷᠬᠡ ᠲᠠᠢ ᠬᠡᠤᠬᠡᠤᠨ ᠨᠢ ᠪᠤᠶᠤ ᠬᠠᠮᠤᠭ ᠤᠨ ᠰᠠᠶᠢᠨ ᠬᠠᠮᠵᠢᠶ᠎ᠠ ᠨᠢ ᠪᠤᠯᠵᠤ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠬᠡᠬᠡᠤᠨ ᠴᠢᠳᠠᠯ ᠤᠨ ᠬᠢᠷᠢᠨ ᠳᠡᠭᠡᠨ ᠵᠤᠷᠢᠭᠵᠢᠨ ᠪᠡᠶᠡᠯᠡᠬᠦᠯᠳᠡᠭ ᠲᠡᠳᠡᠬᠡᠷ ᠬᠥᠳᠡᠯᠮᠤᠷᠢ ᠶᠢᠨ ᠢᠶᠠᠨ ᠬᠠᠷᠢᠭᠤ ᠳᠤ ᠰᠠᠷᠠᠨ ᠭᠤᠸ᠎ᠠ ᠡᠵᠢ ᠶᠢᠨ ᠢᠶᠠᠨ ᠰᠦ ᠲᠠᠢ ᠡᠩᠭᠡᠷ ᠲᠤᠨᠢ ᠨᠠᠭᠠᠯᠳᠤᠵᠤ᠂ ᠰᠠᠨᠠᠵᠤ ᠥᠬᠦᠬᠡᠷᠳᠡᠭᠦ ᠶᠢᠨ ᠥᠨᠤᠰᠤᠯᠳᠠ ᠪᠠᠷ ᠨᠢ ᠵᠢᠷᠭᠠᠯ ᠤᠨ ᠪᠠᠯ ᠠᠮᠳᠠᠯᠠᠵᠤ᠂ ᠬᠤᠷᠸ᠎ᠠ ᠶᠢᠨ ᠬᠠᠮᠤᠭ ᠤᠨ ᠲᠤᠯᠠᠭᠠᠨ ᠢ ᠡᠵᠢ ᠠᠴᠠ ᠪᠠᠨ ᠬᠥᠷᠳᠡᠵᠤ ᠶᠠᠪᠤᠳᠠᠭ ᠢᠶᠠᠷ ᠢᠶᠠᠨ ᠡᠷᠬᠡ ᠬᠤᠨᠭ᠍ᠭᠤᠷ ᠨᠠᠰᠤᠨ ᠳᠠᠭᠠᠨ ᠲᠡᠶᠢᠮᠤ ᠯᠡ ᠬᠡᠶᠢᠮᠤᠷᠢ ᠵᠤᠯᠪᠤᠭ᠎ᠠ ᠲᠠᠢ ᠪᠠᠶᠢᠯ᠎ᠠ᠃ ᠮᠥᠨ ᠴᠤ ᠲᠡᠷᠡ ᠭᠱᠠᠨ ᠤ ᠥᠨᠤᠰᠤᠯᠳᠠ ᠪᠤᠯᠤᠨ ᠤᠷᠮᠠᠰᠢᠭᠤᠯᠤᠯ ᠪᠥᠬᠦᠢ ᠤᠯᠠᠨ ᠰᠤᠷᠭᠠᠯ ᠳᠤᠨᠢ ᠢᠳᠡᠬᠡᠨ ᠵᠤᠷᠢᠭᠵᠢᠵᠤ᠂ ᠲᠡᠬᠦᠨ ᠤ ᠤᠯᠠᠮ ᠠᠴᠠ ᠬᠤᠵᠢᠮ ᠤᠨ ᠠᠮᠢᠳᠤᠷᠠᠯ ᠤᠶᠢᠢᠯᠡ ᠳᠡᠭᠡᠨ ᠬᠥᠰᠡᠯ ᠪᠤᠳᠤᠯ ᠤᠨ ᠪᠡᠶᠡᠯᠡᠯ ᠤᠳ ᠢᠶᠠᠨ ᠠᠯᠬᠤᠮ ᠪᠥᠷᠢ ᠳᠤ ᠤᠯᠵᠤ ᠴᠢᠳᠠᠭᠰᠠᠨ ᠢᠶᠠᠨ ᠡᠵᠢ ᠶᠢᠨ ᠨᠠᠨᠳᠢᠨ ᠰᠤᠷᠭᠠᠯ ᠤᠨ ᠬᠡᠮᠵᠢᠶᠡᠯᠡᠰᠢ ᠥᠬᠡᠢ ᠥᠨ᠎ᠡ ᠥᠷᠳᠡᠭ ᠢ ᠶᠡᠭᠡ ᠰᠡᠬᠦᠯ ᠳᠤ᠂ ᠪᠥᠷ ᠤᠶᠢᠷᠠᠬᠠᠨ ᠰᠠᠷᠠᠵᠤ ᠮᠡᠳᠡᠭᠰᠡᠨ ᠶᠤᠮ ᠰᠠᠨ᠃ ᠲᠡᠶᠢᠮᠤ ᠠᠴᠠ ᠡᠵᠢ ᠶᠢᠨ ᠢᠶᠠᠨ ᠨᠥᠷ᠎ᠠ ᠶᠡᠭᠡ ᠬᠥᠳᠡᠯᠮᠤᠷᠢ᠂ ᠲᠡᠭᠷᠢ ᠮᠡᠳᠤ ᠠᠴᠢ᠂ ᠲᠠᠯᠠᠢ ᠮᠡᠳᠤ ᠰᠤᠷᠭᠠᠯ ᠬᠠᠶᠢᠷ᠎ᠠ ᠵᠢᠴᠢ ᠵᠠᠭᠤᠨ ᠰᠤᠨᠳᠠᠯᠠᠭᠰᠠᠨ ᠪᠤᠳᠤᠯ ᠰᠡᠳᠬᠢᠯ᠂ ᠤᠶᠢᠯᠡ ᠬᠢᠳᠡᠯ ᠤᠨ ᠬᠢᠨ ᠵᠠᠬ᠎ᠠ ᠵᠤᠬ᠎ᠠ ᠶᠢ ᠬᠡᠵᠢᠶᠡᠳᠡ ᠡᠷᠭᠢᠴᠡᠬᠦᠯᠤᠨ ᠪᠤᠳᠤᠵᠤ ᠶᠠᠪᠤᠳᠠᠭ ᠶᠤᠮ᠃      ᠡᠳᠤᠷ ᠬᠤᠨᠤᠭ ᠥᠡᠭᠭᠡᠷᠡᠳᠡᠭ ᠢᠶᠠᠷ ᠢᠶᠠᠨ ᠥᠡᠭᠭᠡᠷᠡᠵᠤ᠂ ᠴᠠᠭ ᠤᠨ ᠬᠥᠷᠳᠤ ᠡᠷᠬᠢᠯᠳᠤᠨ᠂ ᠪᠢ ᠠᠷᠪᠠᠨ ᠨᠢᠬᠡᠨ ᠨᠠᠰᠤᠯᠠᠵᠤ ᠪᠠᠷᠢᠭᠠᠳᠠ ᠶᠢᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠨᠢᠬᠡᠳᠤᠯ ᠤᠨ ᠠᠩᠬ᠎ᠠ ᠲᠤᠮᠳᠠᠳᠤ ᠳᠤ ᠲᠠᠪᠰᠢᠬᠤ ᠪᠤᠯᠤᠭᠰᠠᠨ ᠨᠢ ᠶᠠᠭ ᠰᠠᠶ᠋ᠢᠬᠠᠨ ᠠᠪᠤ ᠮᠢᠨᠢ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠤ ᠪᠤᠯᠤᠭᠰᠠᠨ ᠲᠡᠷᠡ ᠵᠢᠯ ᠤᠨ ᠨᠠᠮᠤᠷ ᠪᠠᠶᠢᠭᠰᠠᠨ ᠶᠤᠮ᠃ ᠰᠢᠨ᠎ᠡ ᠰᠤᠷᠤᠯᠭ᠎ᠠ ᠡᠬᠢᠯᠡᠬᠦ ᠪᠤᠯᠤᠭᠰᠠᠨ ᠨᠢᠬᠡ ᠡᠳᠤᠷ ᠡᠵᠢ ᠮᠢᠨᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠨᠠᠮᠠᠶᠢ ᠨᠢᠬᠡᠳᠤᠯ ᠤᠨ ᠲᠥᠪ ᠤᠷᠤᠭᠤ ᠬᠥᠷᠬᠡᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠷᠡ ᠨᠢ ᠡᠵᠢ ᠬᠥᠤ ᠪᠥᠷ ᠠᠩᠬ᠎ᠠ ᠤᠳᠠᠭ᠎ᠠ ᠯᠠ ᠨᠢᠬᠡᠳᠤᠯ ᠤᠨ ᠲᠥᠪ ᠲᠤ ᠬᠥᠷᠴᠤ ᠪᠠᠶᠢᠭᠰᠠᠨ ᠪᠠᠶᠢᠬᠤ ᠡ᠃ ᠲᠡᠶᠢᠮᠤ ᠡ᠂ ᠬᠥᠬᠡᠷᠤᠬᠦᠢ ᠡᠵᠢ ᠮᠢᠨᠢ ᠬᠡᠤᠬᠡᠤᠨ ᠬᠡᠷ ᠢᠶᠠᠨ ᠬᠡᠭᠰᠡᠬᠡᠷ ᠬᠡᠷ ᠠᠴᠠ ᠪᠠᠨ ᠰᠠᠯᠵᠤ ᠴᠢᠳᠠᠳᠠᠭ ᠥᠬᠡᠢ ᠤᠯᠠᠨ ᠰᠠᠶᠢᠬᠠᠨ ᠬᠥᠳᠡᠭᠡ ᠶᠢᠨ ᠮᠠᠯᠴᠢᠨ ᠡᠵᠢ ᠶᠢᠨ ᠨᠢᠬᠡ ᠨᠢ ᠪᠠᠶᠢᠭᠰᠠᠨ ᠨᠢ ᠲᠤᠳᠤᠬᠠᠨ᠃ ᠠᠪᠤ ᠡᠵᠢ ᠲᠠᠢ ᠪᠠᠨ ᠭᠠᠷ ᠬᠥᠳᠤᠯᠤᠯᠴᠠᠨ ᠬᠤᠷᠰᠢᠶ᠎ᠠ ᠲᠡᠯᠬᠡᠬᠦᠷ᠂ ᠰᠤᠷᠭᠠᠭᠤᠯᠢ ᠶᠢᠨ ᠬᠥᠷᠢᠶ᠎ᠡ ᠪᠠᠷ ᠬᠥᠶᠤᠯᠳᠤᠵᠤ ᠪᠠᠶᠢᠭᠰᠠᠨ ᠤᠯᠠᠨ ᠬᠡᠤᠬᠡᠤᠨ ᠤᠨ ᠲᠤᠮᠳᠠ ᠮᠢᠨᠤ ᠰᠡᠳᠬᠢᠯ ᠪᠠᠶᠠᠷᠯᠠᠩᠭᠤᠢ ᠪᠤᠯᠪᠠᠴᠤ ᠥᠨᠤᠴᠢᠷᠠᠮᠠᠯ ᠪᠠᠶᠢᠭᠰᠠᠠ᠃ ᠤᠳᠤ ᠪᠤᠳᠤᠬᠤ ᠳᠤ ᠡᠵᠢ ᠮᠢᠨᠢ ᠴᠤ ᠲᠡᠶᠢᠮᠤ ᠯᠡ ᠪᠠᠶᠢᠭᠰᠠᠨ ᠪᠠᠶᠢᠬᠤ᠃ ᠮᠥᠨ ᠴᠤ ᠲᠡᠷᠡ ᠬᠦ ᠥᠨᠤᠴᠢᠷᠠᠮᠠᠯ ᠤᠷᠴᠢᠨ ᠳᠤ᠂ ᠡᠵᠢ ᠶᠢᠨ ᠮᠢᠨᠢ ᠵᠠᠬᠢᠭᠰᠠᠨ ᠮᠠᠰᠢ ᠤᠯᠠᠨ ᠵᠠᠬᠢᠶ᠎ᠠ ᠰᠤᠷᠭᠠᠯ ᠪᠤᠯ ᠮᠢᠨᠤ ᠨᠢᠬᠡ ᠨᠠᠰᠤᠨ ᠳᠤ ᠬᠠᠮᠤᠭ ᠤᠨ ᠬᠥᠨ ᠰᠠᠭᠤᠭᠳᠠᠭᠰᠠᠨ ᠵᠠᠬᠢᠶ᠎ᠠ ᠰᠤᠷᠭᠠᠯ ᠤᠨ ᠨᠢᠬᠡᠨ ᠬᠡᠰᠡᠭ ᠪᠠᠶᠢᠭᠰᠠᠨ ᠬᠡᠳᠡᠭ ᠢ ᠤᠳᠤ ᠴᠤ ᠬᠡᠰᠡᠨ ᠴᠡᠬᠡᠵᠢᠯᠡᠵᠤ ᠪᠠᠶᠢᠭᠰᠠᠭᠠᠷ᠃ ᠠᠷᠭ᠎ᠠ ᠥᠬᠡᠢ ᠳ᠋ᠠ᠂ ᠬᠥᠮᠤᠨ ᠬᠡᠭᠴᠢ ᠵᠤᠪᠠᠯᠠᠩ ᠢ ᠲᠠᠭᠠᠭᠠᠬᠤ ᠵᠤᠷᠢᠭ ᠴᠢᠩᠭ᠎ᠠ ᠪᠠᠶᠢᠵᠤ᠂ ᠵᠠᠩᠭᠢᠯᠠᠭ᠎ᠠ ᠶᠢᠨ ᠥᠶ᠎ᠠ ᠳᠤ ᠲᠡᠬᠦᠨ ᠢᠶᠠᠷ ᠢᠶᠠᠨ ᠲᠥᠯᠬᠢᠴᠡ ᠬᠥᠴᠤᠨ ᠪᠤᠯᠭᠠᠳᠠᠭ ᠬᠤᠶᠢᠨ᠎ᠠ᠃ ᠲᠡᠶᠢᠮᠤ ᠤᠴᠢᠷ ᠠᠴᠠ ᠠᠮᠢᠳᠤᠷᠠᠯ ᠰᠤᠷᠤᠯᠭ᠎ᠠ ᠶᠢᠨ ᠲᠤᠮᠳᠠ ᠲᠤᠬᠢᠶᠠᠯᠳᠤᠭᠰᠠᠨ ᠤᠯᠠᠨ ᠤᠯᠠᠨ ᠬᠠᠪᠴᠢᠯᠭ᠎ᠠ ᠵᠤᠪᠠᠯᠠᠩ ᠢ ᠰᠢᠳᠤ ᠵᠠᠭᠤᠨ ᠲᠡᠰᠪᠤᠷᠢᠯᠡᠨ ᠲᠤᠭᠤᠯᠵᠤ᠂ ᠠᠩᠬ᠎ᠠ ᠲᠤᠮᠳᠠ ᠶᠢᠨ ᠭᠤᠷᠪᠠᠨ ᠵᠢᠯ ᠤᠨ ᠰᠤᠷᠤᠯᠭ᠎ᠠ ᠪᠠᠨ ᠠᠩᠭᠢ ᠶᠢᠨ ᠲᠡᠬᠡᠷ᠎ᠠ ᠲᠠᠭᠤᠨ ᠳᠤ ᠲᠠᠭᠤᠷᠢᠰᠤᠭᠤᠯᠤᠨ ᠪᠠᠶᠢᠭᠰᠠᠨ ᠳ᠋ᠠ᠃      1984 ᠤᠨ ᠤ ᠲᠤᠮᠳᠠ ᠰᠢᠯᠭᠠᠯᠳᠠ ᠳᠤ ᠡᠵᠢ ᠶᠢᠨ ᠡᠷᠬᠡ ᠲᠠᠢ ᠬᠥᠤ ᠪᠢ ᠰᠢᠯᠢᠳᠡᠭ ᠪᠥᠳᠤᠮᠵᠢ ᠪᠠᠷ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠭᠳᠠᠨ ᠤᠷᠤᠵᠤ᠂ ᠠᠮᠢᠳᠤᠷᠠᠯ ᠤᠨ ᠵᠠᠮ ᠰᠢᠨ᠎ᠡ ᠡᠷᠬᠢᠯᠳᠡ ᠭᠠᠷᠤᠭᠰᠠᠨ ᠶᠤᠮ᠃ ᠨᠠᠮᠤᠷ ᠤᠨ ᠨᠠᠷᠠ ᠵᠤᠯᠠᠢ ᠰᠢᠷᠠᠵᠤ᠂ ᠭᠠᠵᠠᠷ ᠰᠢᠷᠭᠠᠯᠳᠤᠨ᠂ ᠨᠢᠳᠤ ᠬᠠᠷᠠᠯᠠᠵᠤ᠂ ᠬᠤᠨᠢᠨ ᠤ ᠵᠠᠬ᠎ᠠ ᠳᠤ ᠨᠤᠵᠤᠭᠤᠷᠠᠵᠤ ᠠᠯᠵᠠᠭᠤᠷᠠᠭᠰᠠᠨ ᠪᠠᠰᠠ ᠨᠢᠬᠡ ᠡᠳᠤᠷ᠂ ᠲᠠᠯ᠎ᠠ ᠶᠢᠨ ᠲᠤᠮᠳᠠ ᠵᠡᠷᠬᠡᠯᠬᠡᠨ ᠤ ᠴᠠᠭᠠᠨ᠎ᠠ ᠠᠴᠠ ᠡᠵᠢ ᠶᠢᠨ ᠮᠢᠨᠢ ᠪᠠᠷ᠎ᠠ ᠬᠥᠪᠤᠯᠵᠠᠨ ᠠᠶᠢᠰᠤᠢ᠃ ︽ᠰᠤᠷᠭᠠᠭᠤᠯᠢ ᠳᠤ ᠤᠷᠤᠭᠰᠠᠨ ᠮᠡᠳᠡᠭᠳᠡᠯ︾—ᠡᠵᠢ ᠮᠢᠨᠢ ᠰᠢᠤᠳᠠᠨᠴᠢ ᠶᠢᠨ ᠬᠥᠷᠬᠡᠵᠤ ᠢᠷᠡᠭᠰᠡᠨ ᠮᠡᠳᠡᠭᠳᠡᠯ ᠤᠨ ᠪᠢᠴᠢᠭ ᠢ ᠮᠢᠨᠢ ᠪᠠᠶᠠᠷᠯᠠᠭᠰᠠᠨ ᠬᠥᠴᠤᠨ ᠳᠡᠭᠡᠨ ᠬᠤᠨᠢᠨ ᠳᠤ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠬᠥᠤ ᠨᠠᠳᠠ ᠳᠠᠭᠠᠨ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠨᠢ ᠲᠡᠷᠡ ᠪᠠᠶᠢᠵᠠᠢ᠃ ᠭᠠᠷᠳᠠᠭᠤᠯᠬᠤ ᠲᠤᠰᠬᠤ ᠲᠡᠷᠡ ᠭᠱᠠᠨ ᠳᠤ ᠡᠬᠡ ᠬᠥᠤ ᠶᠢᠨ ᠰᠡᠳᠬᠢᠯ ᠤᠨ ᠬᠥᠨ ᠳᠤ ᠠᠮᠢᠳᠤᠷᠠᠯ ᠤᠨ ᠪᠠᠶᠠᠷ ᠭᠤᠨᠢᠭ᠂ ᠬᠠᠯᠠᠭᠤᠨ ᠬᠥᠢᠳᠡᠨ᠂ ᠰᠢᠷ᠎ᠠ ᠪᠤᠷᠤ ᠬᠤᠨᠤᠭ ᠤᠳ ᠲᠡᠤᠬᠡ ᠶᠢᠨ ᠬᠠᠭᠤᠳᠠᠰᠤ ᠪᠠᠷ ᠰᠡᠬᠦᠭᠳᠡᠨ᠎ᠠ᠃ ᠪᠠᠶᠠᠷᠯᠠᠵᠤ ᠬᠥᠭᠰᠡᠭᠰᠡᠨ ᠲᠡᠷᠡ ᠥᠶ᠎ᠡ ᠳᠤ ᠡᠵᠢ ᠶᠢᠨ ᠢᠶᠠᠨ ᠴᠠᠭ ᠥᠶ᠎ᠡ ᠶᠢᠨ ᠤᠷᠤᠭ᠎ᠠ ᠪᠤᠰᠬᠠᠭ᠎ᠠ ᠶᠢ ᠲᠤᠭᠤᠯᠤᠨ᠂ ᠥᠨᠤᠴᠢᠨ ᠪᠡᠯᠪᠡᠰᠤᠨ ᠤ ᠬᠥᠴᠢᠷ ᠭᠠᠴᠢᠭ ᠢ ᠡᠬᠦᠷᠴᠤ᠂ ᠥᠷ᠎ᠠ ᠪᠢᠳᠡᠨ ᠤ ᠪᠠᠨ ᠲᠥᠯᠤᠬᠡ ᠬᠥᠴᠤ ᠪᠠᠨ ᠴᠤᠴᠠᠭᠠᠵᠤ ᠰᠡᠳᠬᠢᠯ ᠢᠶᠠᠨ ᠵᠥᠳᠡᠬᠡᠵᠤ ᠶᠠᠪᠤᠭᠰᠠᠨ ᠢ ᠪᠤᠳᠤᠬᠤ ᠪᠠᠷ ᠪᠢ ᠥᠪᠡᠷ ᠤᠨ ᠡᠷᠬᠡ ᠥᠬᠡᠢ ᠨᠢᠯᠪᠤᠰᠤ ᠤᠨᠠᠭᠠᠭᠰᠠᠨ ᠪᠢᠯᠠ᠃      ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠬᠦᠰᠤᠨ ᠬᠤᠯᠠ ᠶᠢᠨ ᠨᠤᠳᠤᠭ ᠲᠤ ᠠᠵᠢᠯ ᠤᠨ ᠬᠤᠪᠢᠶᠠᠷᠢ ᠠᠪᠤᠭᠰᠠᠨ᠂ ᠠᠮᠢᠳᠤᠷᠠᠯ ᠪᠤᠰᠬᠠᠨ ᠢᠬᠡᠷ᠎ᠠ ᠬᠥᠤ ᠲᠠᠢ ᠪᠤᠯᠵᠤ ᠭᠠᠯ ᠭᠤᠯᠤᠮᠳᠠ ᠵᠠᠯᠭᠠᠭᠤᠯᠤᠭᠰᠠᠨ᠂ ᠠᠮᠢᠳᠤᠷᠠᠯ ᠤᠶᠢᠯᠡᠰ ᠤᠨ ᠠᠮᠵᠢᠯᠳᠠ ᠪᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠨ ᠤᠴᠢᠵᠤ ᠵᠤᠯᠭᠠᠬᠤ ᠪᠥᠷᠢ ᠳᠤ ᠡᠵᠢ ᠶᠢᠨ ᠮᠢᠨᠢ ᠰᠡᠳᠬᠢᠯ ᠰᠠᠷᠠᠭᠤᠯ ᠲᠡᠭᠷᠢ ᠶᠢᠨ ᠲᠦᠢᠳᠠᠢ ᠠᠭᠤᠵᠢᠷᠠᠨ ᠵᠢᠷᠭᠠᠨ᠎ᠠ᠃ ᠢᠬᠡᠷ᠎ᠠ ᠤᠮᠪᠤᠯᠤ ᠶᠢᠨ ᠢᠶᠠᠨ ᠢᠳᠡᠷᠡᠬᠦᠨ ᠲᠤᠷᠨᠢᠭᠤᠨ ᠢ ᠨᠢ ᠥᠵᠡᠬᠦ ᠪᠥᠷᠢ ᠳᠤ ᠮᠠᠩᠨᠠᠢ ᠨᠢ ᠲᠠᠨᠢᠢᠨ ᠬᠥᠯ ᠨᠢ ᠬᠥᠡᠭᠭᠡᠷᠡᠵᠤ᠂ ᠬᠠᠮᠳᠤ ᠪᠠᠶᠢᠭᠰᠠᠨ ᠡᠳᠤᠷ ᠤᠳ ᠲᠡᠭᠡᠨ ᠬᠡᠯᠡᠬᠡᠤᠨ ᠪᠠᠷᠠᠬᠤ ᠥᠬᠡᠢ ᠵᠤᠭᠤᠭ ᠲᠠᠢ ᠪᠤᠯᠵᠤ᠂ ᠨᠠᠰᠤᠨ ᠤ ᠬᠠᠷᠠᠭ᠎ᠠ ᠪᠠᠷ ᠡᠬᠦᠯᠡᠳᠡᠭᠰᠡᠨ ᠨᠢᠳᠤ ᠨᠢ ᠴᠤ ᠵᠢᠷᠭᠠᠯ ᠤᠨ ᠬᠡᠬᠡ ᠲᠠᠳᠠᠵᠤ ᠬᠡᠷᠡᠯᠳᠤᠨ᠎ᠠ᠃ ᠲᠡᠶᠢᠮᠤ ᠪᠠᠶᠢᠯᠬᠦᠢ᠂ ᠡᠨᠡ ᠶᠢᠷᠳᠢᠨᠴᠤ ᠳᠤ ᠥᠷ᠎ᠠ ᠶᠢᠨ ᠢᠶᠠᠨ ᠰᠠᠶᠢᠨ ᠢ ᠥᠵᠡᠵᠤ ᠪᠠᠶᠠᠰᠬᠤ ᠠᠴᠠ ᠥᠬᠡᠷ᠎ᠡ ᠵᠢᠷᠭᠠᠯ ᠡᠬᠡ ᠬᠥᠮᠤᠨ ᠳᠤ ᠬᠠᠮᠢᠭ᠎ᠠ ᠪᠠᠶᠢᠨᠠᠮ ᠪᠢᠯᠠ᠃ ᠡᠷᠬᠢᠵᠤ ᠥᠵᠡᠬᠦ ᠪᠥᠷᠢ ᠳᠤ ᠨᠠᠷᠠ ᠨᠢ ᠭᠠᠷᠴᠤ ᠬᠥᠭᠰᠡᠨ᠂ ᠪᠤᠴᠠᠬᠤ ᠪᠤᠯᠬᠤ ᠪᠥᠷᠢ ᠳᠤ ᠮᠢᠨᠢ ᠲᠤᠭᠳᠠᠪᠤᠷᠢ ᠠᠯᠳᠠᠵᠤ ᠰᠠᠯᠵᠤ ᠶᠠᠳᠠᠳᠠᠭ ᠪᠤᠯᠤᠭᠰᠠᠨ ᠨᠠᠰᠤᠨ ᠰᠡᠬᠦᠳᠡᠷ ᠲᠠᠯᠠ ᠭᠠᠷᠤᠭᠰᠠᠨ ᠪᠤᠭᠤᠷᠤᠯ ᠡᠵᠢ ᠮᠢᠨᠢ ᠪᠢᠳᠡᠨ ᠲᠠᠢ ᠪᠠᠨ ᠬᠠᠮᠳᠤ ᠪᠠᠶᠢᠬᠤ ᠡᠳᠤᠷ ᠨᠢᠬᠡᠨᠳᠡ ᠠᠭᠤᠯᠠ ᠶᠢᠨ ᠲᠤᠯᠤᠭᠠᠢ ᠶᠢᠨ ᠰᠢᠩᠭᠡᠬᠦ ᠨᠠᠷᠠᠨ ᠪᠤᠯᠤᠭᠰᠠᠨ ᠢ ᠪᠤᠳᠤᠬᠤ ᠪᠥᠷᠢ ᠳᠤ ᠥᠷ᠎ᠠ ᠴᠢᠨᠢ ᠪᠤᠯᠤᠭᠰᠠᠨ ᠮᠢᠨᠤ ᠵᠢᠷᠤᠬᠡ ᠡᠷᠬᠡ ᠥᠬᠡᠢ ᠡᠪᠡᠳᠳᠡᠭ ᠪᠠᠶᠢᠯ᠎ᠠ᠃ ᠲᠡᠶᠢᠮᠤ ᠡ᠂ ᠠᠷᠪᠠᠨ ᠬᠡᠳᠤᠨ ᠵᠢᠯ ᠤᠨ ᠡᠮᠤᠨᠡᠬᠢ ᠬᠠᠪᠤᠷ ᠤᠨ ᠨᠢᠬᠡ ᠡᠳᠤᠷ ᠢᠡᠭᠭᠡᠨ ᠲᠡᠮᠡᠬᠡᠨ ᠤ ᠪᠤᠶᠢᠯᠠᠬᠤ ᠲᠠᠭᠤᠨ ᠪᠤᠳᠤᠭᠤᠨ ᠠᠴᠠ ᠪᠠᠨ ᠬᠤᠯᠠᠳᠠᠨ᠂ ᠢᠳᠡ ᠥᠳᠡ ᠶᠢᠨ ᠨᠠᠷᠠᠨ ᠬᠡᠷᠡᠯ ᠢᠯᠴᠢ ᠪᠠᠨ ᠠᠯᠳᠠᠵᠤ᠂ ᠡᠵᠢ ᠮᠢᠨᠢ ᠲᠠᠯᠠᠨ ᠵᠢᠷᠭᠤᠭᠠᠨ ᠥᠨᠳᠤᠷ ᠬᠤᠳᠤᠭ ᠢ ᠤᠯᠵᠤ᠂ ᠠᠷᠪᠠᠨ ᠬᠡᠤᠬᠡᠤᠨ ᠤᠨ ᠢᠶᠠᠨ ᠬᠥᠷᠢᠶᠡᠯᠡᠭᠰᠡᠨ ᠲᠤᠭᠤᠷᠢᠭ ᠤᠨ ᠲᠤᠮᠳᠠ ᠪᠤᠷᠬᠠᠨ ᠪᠤᠯᠤᠭᠰᠠᠨ ᠪᠢᠯᠠ᠃ ᠲᠤᠬᠠᠢ ᠶᠢᠨ ᠥᠶ᠎ᠡ ᠳᠤ ᠬᠡᠤᠬᠡᠤᠨ ᠤᠳ ᠤᠨ ᠴᠢᠨᠢ ᠲᠠᠨ ᠤ ᠪᠠᠨ ᠲᠡᠭᠷᠢ ᠮᠡᠳᠤ ᠶᠡᠭᠡ ᠠᠴᠢ ᠶᠢᠨ ᠴᠢᠨᠢ ᠬᠠᠷᠢᠭᠤ ᠳᠤ ᠲᠡᠩᠴᠤ ᠥᠷᠢ ᠲᠠᠢ ᠶᠠᠪᠤᠭᠰᠠᠨ ᠬᠡᠵᠤ ᠤᠨᠠᠭᠠᠭᠰᠠᠨ ᠭᠠᠰᠢᠭᠤᠳᠠᠯ ᠤᠨ ᠨᠢᠯᠪᠤᠰᠤ ᠨᠢ ᠤᠶᠠᠷᠠᠯ ᠤᠨ ᠲᠠᠯᠠᠢ ᠪᠤᠯᠵᠤ ᠪᠠᠶᠢᠯ᠎ᠠ᠃ ᠡᠵᠢ ᠮᠢᠨᠢ ᠲᠠ ᠪᠤᠶᠠᠨ ᠲᠠᠢ ᠴᠤ ᠬᠥᠮᠤᠨ᠂ ᠤᠶᠢᠯᠠ ᠲᠠᠢ ᠴᠤ ᠬᠥᠮᠤᠨ ᠪᠠᠶᠢᠵᠠᠢ ᠳ᠋ᠠ᠃      ᠡᠵᠢ ᠥᠬᠡᠢ ᠪᠤᠯᠤᠭᠰᠠᠨ ᠠᠷᠪᠠ ᠭᠠᠷᠤᠢ ᠵᠢᠯ ᠳᠤ᠂ ᠥᠷ᠎ᠠ ᠨᠢ ᠪᠤᠯᠤᠭᠰᠠᠨ ᠪᠢ ᠡᠳᠤᠷ ᠤᠨ ᠪᠤᠳᠤᠯ᠂ ᠰᠥᠨᠢ ᠶᠢᠨ ᠵᠡᠬᠦᠳᠤᠨ ᠳᠡᠭᠡᠨ ᠲᠠᠨ ᠢ ᠪᠠᠨ ᠥᠬᠡᠶᠢᠯᠡᠨ ᠰᠠᠨᠠᠭᠰᠠᠭᠠᠷ ᠢᠷᠡᠯ᠎ᠠ᠃ ᠠᠮᠢᠳᠤᠷᠠᠯ ᠥᠬᠡᠳᠡ᠂ ᠠᠵᠢᠯ ᠤᠷᠤᠭᠰᠢ᠂ ᠪᠥᠬᠦ ᠶᠠᠭᠤᠮ᠎ᠠ ᠰᠠᠶᠢᠬᠠᠨ ᠪᠤᠯᠬᠤ ᠶᠢᠨ ᠤᠯᠠᠮ ᠠᠴᠠ ᠡᠵᠢ ᠶᠢ ᠪᠠᠨ ᠤᠯᠠᠮ ᠢᠯᠡᠬᠦᠤ ᠮᠥᠷᠤᠬᠡᠳᠤᠨ ᠤᠨᠳᠠᠬᠤ ᠨᠦᠢᠷ ᠢᠳᠡᠭᠦ ᠬᠤᠭᠤᠯᠠ ᠪᠠᠨ ᠬᠠᠰᠤᠵᠤ ᠠᠷᠪᠠᠨ ᠬᠡᠤᠬᠡᠤᠨ ᠢᠶᠠᠨ ᠥᠰᠬᠡᠭᠰᠡᠨ ᠠᠭᠤᠤ ᠶᠡᠭᠡ ᠡᠵᠢ ᠪᠠᠨ ᠡᠷᠬᠡ ᠥᠬᠡᠢ ᠮᠥᠷᠤᠬᠡᠳᠤᠨ ᠰᠠᠨᠠᠨ᠎ᠠ᠃      ᠨᠠᠷᠠᠨ ᠤ ᠬᠡᠷᠡᠯ ᠢ ᠬᠤᠷᠢᠶᠠᠬᠤ ᠠᠴᠠ ᠡᠪᠡᠰᠤ ᠤᠷᠭᠤᠮᠠᠯ ᠰᠡᠷᠬᠦᠨ᠎ᠠ᠂ ᠨᠠᠰᠤᠳᠠᠢ ᠡᠵᠢ ᠪᠠᠨ ᠪᠤᠳᠤᠬᠤ ᠪᠠᠷ ᠰᠡᠳᠬᠢᠯ ᠪᠥᠷ ᠰᠡᠷᠬᠦᠨ᠎ᠠ᠃ ᠡᠵᠢ ᠮᠢᠨᠢ ᠲᠠ᠂ ᠠᠯᠳᠠᠨ ᠨᠠᠷᠠᠨ ᠤ ᠬᠡᠷᠡᠯ ᠰᠢᠭ ᠠᠷᠪᠠᠨ ᠴᠠᠭᠠᠨ ᠪᠤᠶᠠᠨ ᠢᠶᠠᠨ ᠬᠠᠶᠢᠷᠠᠯᠠᠭᠰᠠᠨ ᠪᠤᠷᠬᠠᠠ᠂ ᠠᠴᠢᠷ ᠥᠷ᠎ᠠ ᠪᠠᠨ ᠲᠤᠯᠠᠭᠠᠴᠠᠭᠤᠯᠵᠤ ᠶᠠᠪᠤᠭᠰᠠᠨ ᠠᠮᠢᠳᠤᠷᠠᠯ ᠤᠨ ᠲᠤᠮᠤ ᠨᠠᠷᠠᠨ ᠶᠤᠮ ᠰᠠᠨ᠃      ᠡᠵᠢ ᠪᠤᠷᠬᠠᠨ ᠮᠢᠨᠢ︕ ᠪᠤᠷᠬᠠᠨ ᠡᠵᠢ ᠮᠢᠨᠢ︕
  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号